No Ũtetheke kwa Kwĩthĩwa na Kĩsio Kyaku Mwene kya Kũtavanyʼa?
1.Nĩkĩ nĩ ũseo kwĩthĩwa na kĩsio kyaku mwene kya kũtavanyʼa?
1 Nĩkĩ waĩle kwĩthĩwa na kĩsio kyaku mwene kya kũtavanyʼa? Ikundi ila syĩthĩawa na kĩsio kĩnene kya ũtavanyʼa, mũtavanyʼa no ose kĩsio kyake mwene vakuvĩ na vala wĩkalaa. Ĩvuku Tengenezo, ĩthangũ ya 103, yĩeleetye: “Kwĩthĩwa na kĩsio kyaku mwene kya kũtavanyʼa vakuvĩ na vala wĩkalaa kũkaũtetheesya kũtũmĩa ĩvinda nesa ũndũ vatonyeka ũtavanyʼanĩ. Ĩngĩ, no ũthokye mũtavanyʼa ũngĩ athũkũme naku kĩsionĩ kĩu kyaku.”
2.Kĩsio kya kũtavanyʼa kya mũndũ mwene kĩtonya kũtũmĩwa ata kwongeleela ũtavanyʼa?
2 Kwongeleela Ũtavanyʼa: Woosa kĩsio kya kũtavanyʼa vakuvĩ na vala ũthũkũmĩaa, no ũtavanyʼe masaa ma kyaũya kya mũthenya kana ũtambĩte kwĩnũka, vatonyeka wĩ na mũtavanyʼa ũngĩ ũthũkũmaa vakuvĩ. Ethĩwa kĩsio kĩu kĩ vakuvĩ na mũsyĩ, no ũtavanyʼe masaa ma mawĩoo wĩ na mũsyĩ waku. Ethĩwa ndwĩthi ũmbanonĩ wa kũthi ũtavanyʼa, nĩ ũseo kumya mboya ũtambĩte kwambĩĩa kũtavanyʼa nĩ kana Yeova akũtongoesye. (Avi. 4:6) Ĩngĩ, ũitavanyʼa kĩsionĩ kyaku nĩwaĩlĩte kwĩthĩwa na ĩvinda ya kũtavanyʼa vamwe na kĩkundi. Nĩ ũseo kũtavanyʼa na kĩkundi kyaku kya ũtavanyʼa mũno mũno Wathanthatũ na Wakyumwa, ĩla atavanyʼa aingĩ maendaa kũtavanyʼa.
3.Kwĩthĩwa na kĩsio kya mũndũ mwene kya kũtavanyʼa kũtethasya ata?
3 Ũtethyo: Ethĩwa wĩ na kĩsio kyaku mwene kya kũtavanyʼa, wĩthĩawa na vandũ va kũtavanyʼa ĩla ĩvinda yaku yakwĩtĩkĩlya. Nũtonya kũtũmĩa ĩvinda yingĩ ũtavanyʼanĩ na ĩvinda ĩnini kũvika kĩsionĩ. Mũvango ũũ nũtumaa amwe methĩwa mavainia atetheesya kana ma kĩla ĩvinda. Nũndũ ene nyũmba ala matonya kwendeewʼa nĩ atũi maku, nĩ laisi kũmasyokea na kwambĩĩsya ĩmanyĩsyo ya Mbivilia. Amwe nĩmonaa kũtavanyʼa kĩsionĩ ta kĩĩ kũimanenga mwanya wa kũmanyana nesa na ene nyũmba, ethĩwa nĩmakĩtavanyʼa mavinda maingĩ matanatũnga kaati ya kĩsio nĩ kana angĩ makyose. Kũtavanyʼa kĩsionĩ kyaku mwene no kũũtethye we na mũsyĩ waku kwĩanĩsya vyũ ũthũkũmi waku?—2 Tim. 4:5.