Ũndũ Tũtonya Kũkiita Ngoo sya Ala Tũmanyĩasya
1. Nzĩa ya Yesũ ya kũmanyĩsya yeethĩiwe na mosyao meva kwa ala mamwĩthukĩĩasya?
1 Yesũ Klĩsto nĩwakiitaa ngoo sya ala mamwĩthukĩĩasya. Ĩvindanĩ yĩmwe, ngoo sya amanyĩwʼa make nĩsyeethĩiwe na “muutĩa” ĩtina wa Yesũ kũmaelesya Maandĩko nesa. (Luka 24:32) Nũndũ kũmwĩwʼa Ngai kwaĩle kuma ngoonĩ, nĩ kwa nzĩa yĩva tũtonya kũkiita ngoo sya ala tũũmanyĩsya nĩ kana mewʼe maĩle kwĩka moalyũku?—Alo. 6:17.
2. Ũĩ na ũmanyi itũtetheeasya ata nĩ kana tũkiite ngoo ya mũndũ?
2 Tũmĩa Ũĩ na Ũmanyi: Ti laisi kwa andũ aingĩ kwosa ĩtambya yĩla yaĩle ĩla twamatavya ũndũ ũla waĩle na ũla ũtaĩle tũ. Ũwʼo nĩ kana kũmasomea maandĩko maingĩ meũleana na kĩla maĩkĩĩaa no kũtume malea kũtwĩthukĩĩsya. Nĩ kana tũkiite ngoo ya mũndũ, no nginya twambe kũmanya kĩla kĩtumaa aĩkĩĩa na eka maũndũ kwosana na mũĩkĩĩo wake. Kũtũmĩa ũĩ ĩla ũũkũlya makũlyo ũmasũanĩĩte nesa nĩkũmwĩkĩaa vinya aelesye mawoni make na kĩla ũkũsũanĩa. (Nth. 20:5) Na ĩndĩ, no ũnyuve ũvoo mũna kuma Ndetonĩ ya Ngai ũla ũtonya kũmũkiita ngoo. Kwoou nĩtwaĩle kwendeewʼa nĩwe vyũ na tũyĩthĩwa na wũmĩĩsyo. (Nth. 25:15) Lilikana kana andũ mayĩkaa maendeeo ma kĩ-veva ũndũ ũmwe. Kwondũ wa ũu, mũnenge ĩvinda nĩ kana veva wa Yeova ũtethye wĩa nthĩnĩ wake na ũimũtetheesya kũsũanĩa na kwĩka kwosana na kĩla ũkwĩmanyĩsya.—Mko. 4:26-29.
3. Tũtonya ata kũtetheesya andũ ala tũũmanyĩsya methĩwe na ndaĩa nzeo?
3 Matetheesye Methĩwe na Ndaĩa Nzeo: Maandĩko ala maeleetye ĩũlũ wa ũseo na wendo wa Yeova no matetheesye ala tũmanyĩasya Mbivilia methĩwe na ndaĩa nzeo. No tũtũmĩe maandĩko ta Savuli 139:1-4 kana Luka 12:6, 7 kũmwonyʼa ũndũ Ngai wendeeawʼa nĩ kĩla ũmwe witũ. Ĩla andũ matũnga mũvea kuma ngoonĩ kwondũ wa mumo wa Yeova, nĩmamwendaa mũno na mayĩyumya vyũ kũmũthũkũma. (Alo. 5:6-8; 1 Yoa. 4:19) O na ĩngĩ, ĩla mamanya kana mwĩkalĩle woo no ũmũtanĩthye Yeova kana ũkamũthatya, nĩmewʼaa meekĩwa vinya nĩ kana mamwendeesye na maimũnenga ndaĩa.—Sav. 78:40, 41; Nth. 23:15.
4. Ĩla tũũtavanyʼa, tũtonya kwonyʼa andũ ata kana nĩtũnengete ndaĩa ũthasyo woo wa kwĩnyuvĩa?
4 Yeova ndalasimĩthasya andũ maatĩĩe mĩao yake. Ĩndĩ nũmathuthasya kwa kũmonyʼa ũseo wa kũatĩĩa motao make. (Isa. 48:17, 18) Twĩyĩelekanasya na Yeova ĩla twamanyĩsya andũ kwa nzĩa ĩtonya kũmatetheesya meyĩkĩe motwi. Ĩla andũ moona ve vata wa kwĩka moalyũku thayũnĩ woo, nĩmakwataa moathimo ma ĩvinda ĩasa. (Alo. 12:2) O na ĩngĩ, ũu nũtumaa mamũthengeea Yeova, ũla “ũtataa ngoo.”—Nth. 17:3.