MWĨKALĨLE WA AKLĨSTO

Ũndũ Ũtonya Kwĩthĩwa Mũmanyĩwʼa wĩ Kĩthito wa Ndeto ya Ngai

We no wende kwĩthĩwa wĩ mũĩkĩĩku ta Ndanieli o na ĩla wakwatwa nĩ motato? Ndanieli aĩ na kĩthito kya kwĩmanyĩsya Ndeto ya Ngai, vamwe na wathani ũeleetye maũndũ maito. (Nda 9:2) Kwĩthĩwa na kĩthito kya kwĩmanyĩsya Mbivilia no kũũtetheesye kwĩthĩwa wĩ mũĩkĩĩku. Ũu ũtonyeka ata? Kwĩmanyĩsya no kũlũlũmĩĩlye mũĩkĩĩo waku wa kana mawatho ma Yeova makeanĩa. (Yos 23:14) O na no kũũtetheesye ũkamwenda Ngai mũnango, na ũu no ũtume wenda kwĩka kĩla kyaĩle. (Sav 97:10) Ĩndĩ ĩkũlyo nĩ, Waĩle kwambĩĩaa ata? Kwasũanĩa maũndũ aa maatĩĩe.

Nĩ maũndũ meva naĩle kwĩmanyĩsya? Ũndũ ũmwe wonanasya kana mũndũ e na kĩmanyĩo kĩseo kya kwĩmanyĩsya nĩ kwĩyũmbanĩsya maũmbano ma kĩkundi. Ũkatethekaa mũno nĩ kĩlungu kya kũsoma Mbivilia kya kĩla kyumwa ethĩwa ũkoosaa ĩvinda wĩke ũkunĩkĩli ĩũlũ wa maũndũ ala ũtanakwatya. O na andũ amwe nĩmatwʼĩte kwĩmanyĩsya ĩũlũ wa wathani wa Mbivilia, ĩũlũ wa ũsyao wa veva wa Ngai, savalĩ sya mũtũmwa Vaulo sya ũmisonalĩ, kana ĩũlũ wa wũmbi wa Yeova. Wĩ o maũndũnĩ maku na ũisũanĩa ũndũ mũna ũkwenda kũmanya kuma Mbivilianĩ, ũandĩke na ũivanga wĩke ũkunĩkĩli ĩũlũ wawʼo ĩla ũkwĩthĩwa ũyĩmanyĩsya.
Nĩ va ndonya kũkwata ũvoo mwingangĩ? Nĩ kana wone ũndũ ũtonya kwĩka, ĩloele vitio yĩ na kyongo, Syĩndũ sya Kwĩka Ũkunĩkĩli wa Maũndũ ma Vata Kuma Ndetonĩ ya Ngai. Nĩ kana wongeleele ũmanyi, ĩka ũkunĩkĩli ũmanye mosumbĩ kana silikalĩ nene sya nthĩ ila syonanawʼa nĩ nyamũ ila syĩ ĩvukunĩ ya Ndanieli kĩlungu kya 7.
Naĩle kwĩmanyĩsya kwa ĩvinda yĩana ata? Nĩ kana ũendeee nesa kĩ-veva, nĩwaĩle kwĩmanyĩsya kĩla ĩvinda. Woona ve vata, no wambĩĩe kwa kũtũmĩa ĩvinda ĩnini kwĩmanyĩsya, na kavola kwa kavola ũyongeleela ĩvinda yĩla ũtũmĩaa ũyĩmanyĩsya. Kwĩmanyĩsya Ndeto ya Ngai no ũndũ ũmwe na kũmantha syĩndũ sya vata mbithe; o ũndũ ũendeee na kwona syĩndũ mbingĩ sya vata, nowʼo ũkũendeea na kũimantha! (Nth 2:3-6) Ũkendeewʼa mũno nĩ Ndeto ya Ngai, na ũkeethĩawa na kĩmanyĩo kya kwĩmanyĩsya Mbivilia.—1Vet 2:2.

Nĩ kana ũkwate ũvoo mwingangĩ ĩũlũ wa ũndũ ũtonya kũtanĩa kwĩmanyĩsya, sisya ĩkaseti ya Amkeni! ya Mwei wa 2, 2012, ĩth. ya 18-20

NYAMŨ ILA IWETETWE ĨVUKUNĨ YA NDANIELI KĨLUNGU KYA 7 SYONANASYA KYAŨ?

Nda 7:4
Nda 7:5
Nda 7:6
Nda 7:7

ĨKŨLYO YĨNGĨ:

Ndeto ila syĩ ĩandĩkonĩ ya Ndanieli 7:8, 24 syeanĩie ata?

Ũvya mũnini wĩ na metho na kanyw’a ũkĩlĩte katĩkatĩ wa mbya ĩkũmi, na wakũa mbya itatũ

ŨNDŨ ŨNGĨ WA KWĨMANYĨSYA:

Nyamũ ila ieleetwʼe ĩandĩkonĩ ya Ũvuanʼyo kĩlungu kya 13 syonanasya ata?