Maũmbano Manene Nĩmatũnengae Myanya Mĩseo ya Kwonanyʼa Wendo

Nĩkĩ tũtanĩaa mũno maũmbano maitũ manene ma kĩla mwaka? O ta Aisilaeli, yĩla twathi maũmbanonĩ manene nĩtũkwataa mwanya wa kũmũthaitha Yeova twĩ vamwe na ana-a-asa maana maingĩ kana ngili mbingĩ. Nĩtũtanĩaa lĩu mwingĩ wa kĩ-veva twĩ maũmbanonĩ asu. O na ĩngĩ, nĩtũtanĩaa kũtũmĩa ĩvinda yingĩ vamwe na anyanya na andũ ma mũsyĩ. Kwoou nĩtwaĩle kũendaa maũmbanonĩ mĩthenya yonthe yĩ ĩtatũ nĩ kana twonanyʼe nĩtũũtũnga mũvea.

Yĩla twakwata mwanya wa kũmbana vamwe, tũyaĩle kũsũanĩa o ũndũ tũũtetheka ithyĩ ene, ĩndĩ nũseo tũkasũanĩa ũndũ tũkwonyʼa ala angĩ wendo. (Aka 6:10; Avl 10:24, 25) Yĩla twaia syĩndũ vandũ iteũvĩngĩĩsa ana-a-asa yĩla twĩ maũmbanonĩ, kana twakwata ivĩla ila itwĩanĩtye twĩthĩawa tũyonanyʼa kana tũiũmantha kwĩyĩuna o ithyĩ ene. (Avi 2:3, 4) Maũmbano manene nĩmatũnengae myanya mĩseo ya kwĩthĩwa na anyanya eũ. Tũtanambĩĩa ũmbano, twamina, o na ĩvinda ya kũthyũmũa, no tũtũmĩe mwanya ũsu kũmanyana na mũndũ tũtamwĩsĩ. (2Ko 6:13) Andũ asu twamanyana namo no tũendeee kwĩthĩwa twĩ ndũũ tene na tene! Na ũndũ ũla mũnene vyũ nĩ kana, yĩla andũ ala angĩ moona tũyonanyʼa wendo wa wʼo, no matwʼe kũmũthaitha Yeova vamwe naitũ.—Yoa 13:35.

ĨLOELEI VITIO YĨ NA KYONGO, “WENDO NDŨSINDAWA”!—MAŨMBANO MANENE MA NTHĨ MBINGĨ, NA ĨNDĨ MŨISŨNGĨA MAKŨLYO AA:

• Ana-a-asa ala mathokete nthĩ ingĩ ĩvinda ya maũmbano manene ma nthĩ mbingĩ ma 2019 mooniwʼe wendo ata?

• Nĩkĩ ngwatanĩo na wendo ũla wĩthĩawa na andũ ma Yeova wĩthĩawa wĩ wa mwanya mũno?

• Nĩ maũndũ meva makonanĩtye na wendo wa Kĩklĩsto maneeneiwe nĩ ana-a-asa ma Nzama Ĩla Ĩtongoesye?

• Wendo wa Kĩklĩsto ũtumĩte ata ana-a-asa ma Germany na South Korea methĩwa na ngwatanĩo?

• Twaĩle kũtwʼa kwĩka ata?