Nĩkĩ Waĩlĩte Kũvoya?

Ĩkaseti yĩĩ ti ya kũthoosya. Yumĩtwʼe ta kĩlungu kĩmwe kya wĩa wa kũmanyĩsya andũ Mbivilia nthĩ yonthe ũla ũtetheeawʼa na mĩvothi ya ngoo ya kwenda. Nĩ kana umye mĩvothi, lika nthĩnĩ wa donate.jw.org. Ethĩwa vayonanĩtwʼe ũndũ ũngĩ, Maandĩko onthe ma Kĩevelania maumĩte nthĩnĩ wa The Bible in Kikamba, 1974, namo Maandĩko ma Kĩkiliki maumĩte nthĩnĩ wa Mbivilia ya Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto. Vala nthoo sya NWT iatĩĩe ndeto sya ĩandĩko yĩla yumĩĩwʼe, nĩ kwonanyʼa kana yumĩtwʼe nthĩnĩ wa Mbivilia ya New World Translation of the Holy Scriptures ya kĩthyomo kya Kĩsũngũ kya matukũ aa.

ĨKASETI YĨĨ, Mũsyaĩĩsya, yĩmũtaĩaa Yeova Ngai, Mũsumbĩ wa nthĩ yonthe. Nĩyĩkiakiasya andũ kwĩsĩla ũvoo mũseo wa kana o mĩtũkĩ Ũsumbĩ wa ĩtunĩ wa Ngai ũkamina ũthũku wʼonthe, na ũivĩndũa nthĩ ĩno ĩtwʼĩke nzaũ. Ĩkaseti yĩĩ yĩkĩaa andũ vinya mamũĩkĩĩe Yesũ Klĩsto ũla wakwie nĩ kana tũkwate thayũ ũtathela, na ũla yu nĩ Mũsumbĩ wa Ũsumbĩ wa Ngai. Ĩkaseti yĩĩ yĩthĩĩtwe yĩitumbĩthwʼa kuma mwaka wa 1879 na ti ya kĩ-siasa. Momanyĩsyo mayo maumĩte Mbivilianĩ.