Makũlyo Kuma Kwa Asomi Maitũ

Nĩkĩ ĩandĩko ya 2 Samueli 21:7-9 yaĩtye kana Ndaviti ‘nĩwatiie [kana, nĩweewʼĩie tei] Mevivosethi,’ ĩndĩ yĩkasyoka yĩkasya nĩwanenganie Mevivosethi oawe?

Andũ amwe ala masomaa ngewa ĩsu na mĩtũkĩ na maiema kũmĩsũanĩa, nĩmekũlasya ĩkũlyo yĩu. Ĩndĩ ve aũme elĩ me kĩvathũkanyʼo mawetetwe ngewanĩ ĩsu meetawa Mevivosethi, na no twĩmanyĩsye kaũndũ twasũanĩa ĩngĩ kĩla kyeethĩiwe.

Mũsumbĩ Saulo wa Isilaeli aĩ na imwana mũonza na eĩtu elĩ. Kĩmwana kyake kĩkũũ kyeetawa Yonathani. Ĩndĩ ĩtina nĩwesie kwĩthĩwa na kĩmwana kyeetawa Mevivosethi, kĩla wasyaĩwe nĩ Lisiva. Ũndũ wa kwendeesya nĩ kana o nake Yonathani nĩwesie kwĩthĩwa na mwana weetawa Mevivosethi. Kwoou Mũsumbĩ Saulo aĩ na kĩmwana kyeetawa Mevivosethi na mwĩsũkũũe weetawa oou.

Ĩndĩ ve ĩvinda Mũsumbĩ Saulo wambĩĩie kũmena Angiveoni ala matwĩe katĩ wa Aisilaeli, na avanga kũmatuta vyũ. Veonekana aingĩ moo nĩmooaiwe. Ũndũ ũsu ndwaaĩle o na vanini. Nĩkĩ? Kĩtumi nũndũ ĩvindanĩ ya Yosua, anene ma Isilaeli nĩmatianĩie ũtianĩo wa mũuo na Angiveoni.—Yos. 9:3-27.

Ũtianĩo ũsu waĩ vo o na ĩvindanĩ ya Mũsumbĩ Saulo. Ĩndĩ vandũ va Mũsumbĩ Saulo kũũnenga ndaĩa, avangie kũtuta Angiveoni vyũ. Kĩu nĩkyaeteie ‘Saulo na nyũmba yake [ĩvĩtyo] ya nthakame.’ (2 Sam. 21:1) Mũthya, Ndaviti nĩwatwʼĩkie mũsumbĩ. Angiveoni ala matialĩte nĩmamũtavisye ũthũku ũla meekĩtwe. Ndaviti nĩwamakũlilye kĩla mendaa kyumwʼe nĩ kana kĩvwʼĩke ũndũ ũsu mũthũku Saulo weekĩte, nĩ kenda Yeova aathime nthĩ ĩsu. Ĩndĩ Angiveoni mayaaĩtya mbesa, vandũ va ũu, makũlilye manengwe ana mũonza ma mũndũ ũla ‘wamasamĩaa kũmananga’ nĩ kana mamoae. (Mot. 35:30, 31) Ndaviti nĩwamekie ũu mendaa.—2 Sam. 21:2-6.

Ĩvindanĩ yĩu, Saulo na mwanae Yonathani maĩ makwʼĩĩie kaũnĩ, ĩndĩ kĩmwana kya Yonathani kyeetawa Mevivosethi kyaĩ o thayũ. Mevivosethi aĩ kĩema nũndũ wa mũisyo wamũkwatie e kana, na kwoou ndaakwata mbau ũndũ ũsu mũthũku ũmae weekie Angiveoni. Ndaviti nĩweevĩtĩte kũlũmanyʼa vyũ na Yonathani na ũsyao wake wʼonthe, Mevivosethi e ũmwe. (1 Sam. 18:1; 20:42) Kĩu nĩkyo kĩtumi Mbivilia yaĩtye ũũ ĩũlũ wa Ndaviti: ‘Mũsumbĩ atia [kana, eewʼĩa tei] Mevivosethi, mwana wa Yonathani mwana wa Saulo, nũndũ wa wĩvĩto wa Yeova ũla waĩ katĩ woo.’—2 Sam. 21:7.

O na ũu wĩ o vo, Ndaviti nĩweetĩkĩlile kwĩka kĩla Angiveoni mendaa. Nĩwamanengie imwana ilĩ sya Saulo, na kĩmwe kyeetawa Mevivosethi, vamwe na esũkũũe atano. (2 Sam. 21:8, 9) Kĩu Ndaviti weekie nĩkyatumie nthĩ ya Isilaeli ĩvetewa ĩvĩtyo ya kwĩtĩkya nthakame.

Ĩĩ ti o ngewa tu. Mwĩao wa Ngai waĩ ũtheinĩ. Waĩtye: “Syana itikoaawe kwondũ wa aaĩthe.” (Kũt. 24:16) Yeova ndesa kwĩthĩwa aaĩtĩkĩlya imwana ilĩ sya Saulo na esũkũũe make atano moawe ta keka mayaĩ ĩvĩtyo. Mwĩao ũsu wongelete kwasya: “Kĩla mũndũ nĩoaawe kwondũ wa naĩ yake mwene.” Veonekana nzyawa isu mũonza sya Saulo syooaiwe iilea kwĩthĩwa ve ũndũ syeekie syakwata mbau mũvango wake wa kũtuta Angiveoni vyũ. Nũndũ wa ũu, me mũonza nĩmaĩvĩie ĩvĩtyo yoo.

Ngewa ĩno yĩtũmanyĩsya kana mũndũ eeka ũndũ mũna mũthũku ndesa kwĩtetea kwa kũsũanĩa kana kwasya eeka ũu nũndũ eĩkaa kũatĩĩa mĩao eenengetwe. Nthimo ĩmwe yaĩtye: “Tindimalya nzĩa ya nyaĩĩ syaku, na mĩendele yaku yonthe ĩthĩwe ĩmĩlũlũmĩlye.”—Nth. 4:24-27; Aev. 5:15.