Ve Ĩvinda Kũtakethĩwa na Imaamai?

Yĩla imaamai syamina kũvithũkĩa andũ, no wĩkũlye atĩĩ: ‘We Ngai nũtũthĩnĩkĩaa? Nĩkĩ maũndũ ta aa mekĩkaa? Ve ĩvinda kũtakethĩwa na ũmaamai?a Ndonya kwĩka ata nũmĩanĩsye na wia wa kũkĩa imaamai?’ Mbivilia nĩnenganĩte mosũngĩo maseo ma makũlyo asu.

We Ngai ethĩawa na woni mwaũ ĩũlũ wa ũmaamai?

Ngai nũmenete ũngʼendu na ũmaamai. (Savuli 11:5; Nthimo 6:16, 17) Nake Yesũ, ũla watũmĩtwe nĩ Ngai, nĩwamakanisye amanyĩwʼa make yĩla meekie kĩko kya ũngʼendu. (Mathayo 26:50-52) O na kau andũ amwe matũmĩaa ĩsyĩtwa ya Ngai kwĩka maũndũ ma ũngʼendu, ti we wĩthĩawa amanengete mwanya wa kwĩka ũu. O na eka ũu, ndethukĩĩasya mboya syoo.—Isaia 1:15.

Ngai nũmathĩnĩkĩaa onthe ala mathĩnaa, na asu nĩ vamwe na ala mathĩnaa nũndũ wa kũvithũkĩwa nĩ imaamai. (Savuli 31:7; 1 Vetelo 5:7) O na ĩngĩ, Mbivilia nĩyonanĩtye kana Ngai akoosa ĩtambya ya kũmina ũngʼendu vyũ.—Isaia 60:18.

Kĩla kĩtumaa kwĩthĩwa na ũmaamai

Mbivilia nĩwetete kĩla kĩtumaa kwĩthĩwa na ũmaamai. Yaĩtye atĩĩ: “Andũ ĩũlũ wa nthĩ nĩmatũmĩaa ũtonyi ũla me nawʼo kũthĩnyʼa andũ ala angĩ.” (Mũtavanʼya 8:9, The Holy Bible in Current Kikamba Language) Kwa ĩvinda ĩasa, andũ ala me na ũkũmũ nĩmethĩĩtwe maitũmĩa ũmaamai nĩ kana mavinyĩĩe andũ ala angĩ. Nũndũ wa ũu, namo andũ angĩ nĩmatũmĩĩte ũmaamai nĩ kana meyũkitĩe.—Mũtavanʼya 7:7.

Kũthela kwa ũmaamai

Ngai nĩwathanĩte kũvetanga vyũ wia na ũngʼendu na ayĩete mũuo ĩũlũ wa nthĩ. (Isaia 32:18; Mika 4:3, 4) Ngai:

Akavetanga kĩla kĩtumaa kwĩthĩwa na ũmaamai. Ngai akavetanga silikalĩ sya andũ na ayĩete silikalĩ yake ĩla ĩkasumbĩka nthĩ yonthe. Mũsumbĩ wa silikalĩ ĩsu, Yesũ Klĩsto, ndakethĩwa na kyende, na akamina vyũ kũthĩnwʼa na ũngʼendu. (Savuli 72:2, 14) Ĩvindanĩ yĩu, vai mũndũ o na wĩva ũkatũmĩa ũmaamai. Andũ “makeetanʼya mũuonĩ mwingĩ.”—Savuli 37:10, 11.
Akavetanga mathĩna ala maetetwe nĩ ũmaamai. Ngai akathyũmũsya andũ kumana na mathĩna ala maetetwe nĩ ũmaamai, o na ethĩwa nĩ ma mwĩĩ kana ma kĩlĩko. (Isaia 65:17; Ũvuanyʼo 21:3, 4) O na nĩwathanĩte kũthayũũkya akwʼũ, na mayĩkala nthĩ yĩ mũuo.—Yoana 5:28, 29.

Mbivilia nĩtũnengete itumi nzeo sya kũĩkĩĩa kana nũkwosa ĩtambya o mĩtũkĩ. Ĩndĩ, no wĩkũlye, ‘Nĩkĩ Ngai wĩkalĩte mũno ateũmina ũmaamai?’ Nĩ kana ũkwate ũsũngĩo, ĩloele vitio yĩ na kyongo, Nĩkĩ Ngai Ũekete Mathĩna Methĩwe Kwʼo?

a “Ũmaamai”nĩ kũtĩsya andũ kana kũtũmĩa ũngʼendu nĩ kana ũmekĩe wia, wĩ na kĩeleelo kya kũunĩka kĩ-siasa, kĩ-ndĩni, kana kĩ-ũkwati. O na vailye ũu, andũ no methĩwe na mawoni me kĩvathũkanyʼo ĩũlũ wa nĩ maũndũ meva ala matonya kũtalwa ta ũmaamai.

Mbivilia nĩtetheeasya andũ kũmĩĩsya

Ve maũndũ elĩ Mbivilia yaĩtye ala matonya kũũtetheesya.

Mũvoye Ngai.—Avilivi 4:6, 7.
Sũanĩa ĩũlũ wa wĩkwatyo ũla Mbivilia ĩtũnengete.—Aevelania 6:19.

Nĩ kana ũkwate maũndũ maingangĩ Mbivilianĩ, sisya kĩlungu kĩ na kyongo, “Jinsi ya Kudhibiti Wasiwasi.”

O na ĩngĩ, Ngũsĩ sya Yeova ila ithĩnĩte nũndũ wa ũmaamai nitwʼĩĩkawa nĩ ala ithaithaa namo. Kwasũanĩa ngelekanyʼo ii ilĩ:

Natalya na kamwana kake ke na myaka kenda, ketawa Aslan, maĩ sukulu vandũ vetawa Beslan, Russia, yĩla imaamai syaĩ na mĩio ya kaũ syalikile na syatava andũ mbee wa 1,000. Ũndũ wa kũmakya nĩ kana andũ maana maingĩ nĩmakwie, na aingĩ ma asu maĩ syana. O na kau Natalya na Aslan nĩmavonokie, matiiwe me na wia mwingĩ. Sisya wone kĩla kyamatetheeisye kũmina wia ũsu.
Pablo na Sophie nĩmakwʼĩĩiwe nĩ mwana woo yĩla ngolova yĩtawa Twin Towers yavithũkĩiwe nĩ imaamai taoninĩ ya New York. Ĩloele vitio ĩno wone kĩla kyamatetheeisye vamwe na andũ angĩ ala makwatiwe nĩ mathĩna nũndũ wa ũmaamai ũsu.