Ĩsomo ya 2

Ngai Nũũ?

Ngai wa wʼo nũũ, na etawa ata syĩtwa yake? (1, 2)

We e mwĩĩ wa mũthemba mwaũ? (3)

Ndaĩa syake ila nene vyũ nĩsyo syĩkũ? (4)

Atĩĩ, nĩtwaĩlĩtwe nĩ kũtũmĩa mĩvwʼanano na movano nthĩnĩ wa ũthaithi witũ kwake? (5)

Nĩ nzĩa ilĩ syĩkũ tũtonya kwĩmanyĩsya ĩũlũ wa Ngai? (6)

1. Andũ mathaithaa syĩndũ mbingĩ. Ĩndĩ Mbivilia ĩtũtavasya kana kwĩ Ngai o ũmwe WA WʼO. We oombie kĩla kĩndũ ĩtunĩ na nthĩ. Nũndũ nĩwatũnengie thayũ, We e weka nĩwe twaĩlĩtwe nĩ kũthaitha.—1 Akolintho 8:5, 6; Ũvuanʼyo 4:11.

2. Ngai etanĩawʼa na monene maingĩ, ĩndĩ e syĩtwa o yĩmwe. Syĩtwa yĩu nĩ YEOVA. Nthĩnĩ wa Mbivilia mbingĩ, syĩtwa ya Ngai nĩyumĩtwʼe na vandũ vayo vakekĩwa monene ma kũmwĩta MWĨAĨI kana NGAI. Ĩndĩ yĩla Mbivilia yaandĩkiwe, syĩtwa Yeova yaumĩlile nthĩnĩ wayo ta mavinda 7,000!—Kuma 3:15; Savuli 83:18.

3. Yeova e mwĩĩ, ĩndĩ ndũilyĩ ta witũ. “Ngai nĩ Veva,” nĩwʼo Mbivilia yaasya. (Yoana 4:24) Veva nĩ mũthemba wa thayũ wa ĩũlũ mũno kũvĩtũka ũla witũ. Kũiĩ mũndũ waaona Ngai nongi. Yeova ekalaa ĩtunĩ, ĩndĩ nũtonya kwona syĩndũ syonthe. (Savuli 11:4, 5; Yoana 1:18) Ĩndĩ-ĩ, nawʼo veva mũtheu nĩ kyaũ? Ti mũndũ ta Ngai. Nĩ vinya wa Ngai wa wĩki.—Savuli 104:30.

4. Mbivilia nĩvuanasya ũmũndũ wa Yeova. Ĩtwonasya kana ndaĩa syake ila nene vyũ nĩ wendo, ũsili-wa-katĩ, ũĩ, na ũtonyi. (Kũtũngĩlĩlwa kwa Mĩao 32:4; Yovu 12:13; Isaia 40:26; 1 Yoana 4:8) Ĩngĩ Mbivilia ĩtwĩaa kana e tei, kanee, ũekeo, ũlau, na e weteelo ũte kĩvya. Ithyĩ, ta syana mbĩwʼi, nĩtwaĩlĩtwe nĩ kũtata kwĩvwʼananʼya nake.—Aeveso 5:1, 2.

5. Atĩĩ, nĩtwaĩlĩtwe nĩ kũkunamĩa kana kũvoya mĩvwʼanano, visa, kana movano nthĩnĩ wa ũthaithi witũ? Aiee! (Kuma 20:4, 5) Yeova aasya kana no nginya tũmũthaithe we e weka. We ndakakwatanĩa ũtheu mũtisu wake na mũndũ ũngĩ o na wĩva kana kĩndũ o na kĩva. Mĩvwʼanano ndĩ ũtonyi wa kũtũtethya.—Savuli 115:4-8; Isaia 42:8.

6. Nata tũtonya kũmanya Ngai nesa mbeange? Nzĩa ĩmwe nĩ kwa kũsũva syĩndũ ila we wũmbĩte na kwĩsilya kwa ũliku ũndũ syĩndũ isu itwĩaa. Mawũmbi ma Ngai matwonasya kana we e ũtonyi na ũĩ mwingĩ. Twonaa wendo wake nthĩnĩ wa syĩndũ syonthe ila we ũseũvĩtye. (Savuli 19:1-6; Alomi 1:20) Nzĩa ĩngĩ ĩla tũtonya kũmanya ĩũlũ wa Ngai nĩ kwa kwĩmanyĩsya Mbivilia. Nthĩnĩ wayo atũtavasya maũndũ maingĩ mbeange aitwonʼya we nĩ Ngai wa mũthemba mwaũ. O na nũtũtavasya ĩũlũ wa kĩeleelo kyake na ũndũ we wendaa twĩke.—Amosi 3:7; 2 Timotheo 3:16, 17.

[Visa Ithanguni ya 5]

Twĩmanyĩasya ĩũlũ wa Ngai kuma kwa wũmbi na kuma kwa Mbivilia