Nĩ Ũvoo Mwaũ Mũseo Ĩũlũ wa Ndĩni?

1. Syo ndĩni syonthe nĩ nzeo?

Ve andũ me na ngoo nzeo nthĩnĩ wa ndĩni syonthe. Nĩ ũvoo mũseo kũmanya kana Ngai nĩwonaa andũ asu na kũmasũvĩa. Ũndũ wa kũmakya nĩ kana ndĩni yĩthĩĩtwe ĩitũmĩwa kwĩka mothũku. (2 Akolintho 4:3, 4; 11:13-15) Kwosana na maũvoo mana, ndĩni imwe nĩsyĩthĩĩtwe na kĩanda nthĩnĩ wa ũngʼendu, kũawa kwa mbaĩ nima, kaũ, na kũnyamawʼa kwa syana. Ũndũ ũsu ũmakasya vyũ andũ ala maĩkĩĩa Ngai kuma ngoonĩ.​—Soma Mathayo 24:3-5, 11, 12.

Ndĩni ya wʼo nĩmũtaĩaa Ngai, ĩndĩ ndĩni sya ũvũngũ nimũthatasya. Ndĩni sya ũvũngũ imanyĩasya maũndũ mate Mbivilianĩ, ala nĩ vamwe na momanyĩsyo ma ũvũngũ ĩũlũ wa Ngai na akwʼũ. Ĩndĩ Yeova endaa andũ mamanye ũla wʼo ĩũlũ wake.​—Soma Esekieli 18:4; 1 Timotheo 2:3-5.

2. Nĩ ũvoo mwaũ mũseo ĩũlũ wa ndĩni?

Nĩ ũseo kũmanya kana Ngai ndatonya kũkengeka nĩ ndĩni ila syaasya nimwendete o na vala syo syendete nthĩ ya Satani. (Yakovo 4:4) Ndeto ya Ngai yĩtĩte ndĩni syonthe sya ũvũngũ “Mbaviloni ĩla Nene.” Mbaviloni waĩ mũsyĩ wa tene kũla ndĩni sya ũvũngũ syambĩĩie ĩtina wa ĩla Mbua ya Kĩwʼũ Kingĩ ya ĩvinda ya Noa. O mĩtũkĩ, Ngai akilyĩ anaete wanangĩko ũtataĩĩwe ĩũlũ wa ndĩni ila ikengaa na kũvinyĩĩa andũ.​—Soma Ũvuanʼyo 17:1, 2, 5, 16, 17; 18:8.

Ve ũvoo ũngĩ mũseo. Yeova nũlilikene andũ me na ngoo nzeo ala me ndĩninĩ syĩ kĩvathũkanyʼo sya ũvũngũ nthĩ yonthe. Aendee kũmbanyʼa andũ asu kwa kũmamanyĩsya ũla wʼo.​—Soma Mika 4:2, 5.

3. Andũ ala me na ngoo nzeo maĩle kwĩka ata?

Yeova nũsũvĩaa andũ ala mendete ũseo na ũla wʼo. Nũmekĩaa vinya maume ndĩninĩ sya ũvũngũ. Andũ ala mendete Ngai methĩawa na wendi wa kũalyũka nĩ kana mamwendeesye.​—Soma Ũvuanʼyo 18:4.

Ĩvinda ya atũmwa, ĩla andũ me na ngoo nzeo meewie ũvoo mũseo kuma kũla kwĩ atũmwa, mawĩtĩkĩlile na ũtanu. Yeova amamanyĩisye nzĩa nzaũ ya kwĩkala, yĩ na ũtanu mwingangĩ, yĩ na kĩeleelo na wĩkwatyo. Matũtiĩe ngelekanyʼo nzeo nũndũ meetĩkĩlile ũvoo mũseo kwa kwia Yeova mbee mathayũnĩ moo.​—Soma 1 Athesalonika 1:8, 9; 2:13.

Yeova nũthokasya ala matiĩte ndĩni sya ũvũngũ methĩwe amwe ma athaithi make. Weetĩkĩla Yeova akũthokye, ũkatwʼĩka mũnyanyae, ũmwe wa athaithi make me na wendo, na ũikwata thayũ ũtathela.​—Soma Maliko 10:29, 30; 2 Akolintho 6:17, 18.

4. Ngai akaete ũtanu ata kĩla vandũ?

Nĩ ũvoo mũseo kũmanya kana ndĩni sya ũvũngũ ikilyĩ kũsilĩlwa. Ũsilĩlo ũsu ũkavetea andũ thĩna nthĩ yonthe. Ndĩni sya ũvũngũ iikaaelelũkya na kũaanyʼa andũ ĩngĩ nongi. Andũ onthe me thayũ makeethĩwa na ngwatanĩo nthĩnĩ wa kũmũthaitha Ngai ũla wa wʼo weka.​—Soma Ũvuanʼyo 18:20, 21; 21:3, 4.