Nũndũ wa Tei, Yesũ Nĩwavoisye Mũndũ Waĩ na Mangũ

O ũndũ Yesũ na amanyĩwʼa make ana maendeeie kũtavanyʼa “masinakokenĩ kĩla vandũ Kalilii yonthe,” nowʼo ũvoo ĩũlũ wa maũndũ manene ala Yesũ weekaa waendeee kũnyaĩĩka. (Maliko 1:39) Ũvoo ũsu nĩwavikĩie mũndũ ũmwe waĩ mũwau mangũ wekalaa ndũanĩ ĩmwe. Luka, ũla waĩ ndakĩtalĩ aĩtye kana mũndũ ũsu ‘ausũĩte mangũ mwĩĩ wʼonthe.’ (Luka 5:12) Yĩla ũwau wa mangũ waingĩva mwĩĩnĩ, ũtumaa mamutha amwe ma mwĩĩ mambĩĩa kũtilĩka.

Kwoou mũndũ ũsu nĩwathĩnaa mũno na aaĩle kwĩkala vaasa na andũ ala angĩ. Ũndũ ũngĩ nĩ kana mũndũ ũsu aaĩle kũkĩlya wasya na kwasya, “Mũvuku, mũvuku” yĩla andũ ala angĩ mamũthengeea, na kwa kwĩka ũu aimasiĩĩa maikoke vakuvĩ nake na maikakwatwe nĩ ũwau ũsu. (Alivai 13:45, 46) Ĩndĩ mũndũ ũsu ndaaĩka ũndũ mĩao yaĩtye. Eekie ata? Aendie vala ve Yesũ na atulya ndu mbee wake, na amwĩsũva aimwĩa atĩĩ: “Mwĩaĩi, ethĩwa nũkwenda, nũtonya kũnthesya.”—Mathayo 8:2.

Kwa wʼo, no twasye kana mũndũ ũsu nĩwamũĩkĩĩe Yesũ vyũ! Ũwau wake watumaa andũ mamũsisya mewʼa tei mwingĩ mũno! Ĩndĩ we Yesũ eekie ata amwona? Keka waĩ vo na ũyona mũndũ ũsu, wĩthĩwa weekie ata? Yesũ nĩweewʼĩie mũndũ ũsu tei na atambũũkya kwʼoko kwake, amũkwata na ĩndĩ amwĩa atĩĩ: “Nĩngwenda! Ĩthĩwa mũtheu.” (Mathayo 8:3) O na kau waĩ ũndũ wĩ vinya kwa andũ amwe kũĩkĩĩa kana mũndũ ũsu no avoe, ũwʼo nĩ kana ũwau wake wa mangũ nĩwavoie vau kwa vau.

We no wende kũsumbĩkwa nĩ mũsumbĩ wĩ tei na wĩ vinya ta Yesũ? Kĩla Yesũ weekie yĩla woonie mũndũ ũsu waĩ na mangũ nĩ ũĩkĩĩthyo wa kana yĩla ũkethĩwa e Mũsumbĩ wa nthĩ yonthe, wathani ũũ wa Mbivilia ũkeanĩwʼa: “Akeewʼĩa tei ngya na athĩni, na mathayũ ma athĩni akamatangĩĩa.” (Savuli 72:13) Vate nzika, ĩvindanĩ yĩu Yesũ akeanĩsya wendi wake wa kũtetheesya andũ onthe ala mathĩnaa.

Lilikana kana o na Yesũ atanamba kũvosya mũndũ ũsu waĩ mũwau mangũ, maũndũ ala weekaa ũthũkũminĩ wake nĩmatumaa andũ aingĩ matana mũno. Vate nzika, andũ aingĩ nĩmeewie ĩũlũ wa ũndũ ũsu mũseo Yesũ weekie. Ĩndĩ Yesũ ndendaa andũ mamũĩkĩĩe no ũndũ wa maũndũ ala matavĩtwʼe nĩ andũ angĩ. Nĩweesĩ wathani ũla waneenete ĩũlũ wake ũkasya atĩĩ: “Ndakatuma [wasya wake] wĩwʼĩka nzĩanĩ nene,” ũu nĩ kwasya, kwa nzĩa ĩkũtuma andũ mamũkumya. (Isaia 42:1, 2) Nũndũ wa ũu, Yesũ eeie mũndũ ũsu waĩ anavoa mangũ atĩĩ: “Ndũkatate kũtavya mũndũ o na ũmwe, ĩndĩ enda ũkeyonanyʼe kwa mũthembi, na ũyumya mũthĩnzĩo ũla Mose waisye nĩwumawʼe.”—Mathayo 8:4.

Nũndũ wa ũseo ũla Yesũ wamwĩkie, mũndũ ũsu waĩ mũwau mangũ aĩ mũtanu mũno ũkethĩa ndaema kũtavya andũ angĩ ũndũ kweethĩwa. Ĩtina wa kũvowʼa, aumie vala ve Yesũ na anyaĩĩkya ũndũ ũsu kĩla vandũ waendaa. Ũu nĩwatumie andũ menda mũnango kũmwona Yesũ. Ũndũ ũsu wavikie vandũ nginya weethĩa Yesũ ndesa kũthi ndũanĩ e ũtheinĩ, na kwoou kwa ĩvinda yĩana ũna ekalaa e weka kũla kũte andũ. Ĩndĩ o na ũu wĩ o vo, andũ kuma kĩla vandũ nĩmookaa vala ũĩ nĩ kana amamanyĩsye na aimavosya.