Yeova Nĩwamũnengie Samusoni Vinya

Aisilaeli aingĩ nĩmambĩĩie ĩngĩ kũthaitha ngai sya mũvwʼanano, na kwoou Yeova aeka Avilisiti mamasumbĩke. Ĩndĩ vaĩ Aisilaeli amwe mamwendete Yeova. Ũmwe woo aĩ Manoa. Manoa na mũka mayaĩ na syana. Mũthenya ũmwe Yeova nĩwatũmie mũlaĩka kũla kwĩ mũka wa Manoa. Mũlaĩka amwĩie atĩĩ: ‘Ũkasyaa kana kavĩsĩ. Kavĩsĩ kau kakavonokya Isilaeli kuma mokonĩ ma Avilisiti. Kakethĩwa Mũnasali.’ We nĩwĩsĩ Mũnasali aĩ ũũ? Mũnasali eethĩawa mũndũ ũnyuvĩtwe nĩ Yeova kwondũ wa ũthũkũmi wa mwanya. Mũnasali ndaĩ mwĩtĩkĩlye kwenza nzwʼĩĩ.

Ĩtina, Manoa nĩwesie kũkwata mwana na amwĩta Samusoni. Yĩla Samusoni weanie, Yeova nĩwamũnengie vinya mwingĩ mũno. Aĩ atonya kũaa mũnyambũ na moko tũ. Ĩvinda yĩmwe, Samusoni ooaie Avilisiti 30 e o weka. Nũndũ wa ũu Avilisiti mamũmenie mũno na mambĩĩa kũmantha ũndũ matonya kũmũaa. Ũtukũ ũmwe Samusoni wakomeile ndũanĩ ya Ngasa, Avilisiti nĩmaendie mũvĩanĩ wa ndũa ĩsu na mamweteela vau nĩ kana mamũae kwakya kũu. Ĩndĩ kwĩ ũtukũ katĩ, Samusoni nĩwaamũkie, na athi mũvĩanĩ wa ndũa ĩsu na akũa mũomo wayo. Akuie mũomo ũsu na ituo na awambatya nginya mũthya wa kĩĩma kyaĩ vakuvĩ na Eviloni!

Ĩtina, Avilisiti nĩmesie kũthi kwa mwĩĩtu waĩ ndũũ na Samusoni weetawa Ndelila na mamwĩa atĩĩ: ‘Nĩtũũkũnenga vetha mwingĩ watata ũmanye vala Samusoni wumĩtye vinya ũũ wingĩvĩte ũu. Twĩenda kũmũkwata na tũimwova yela.’ Nũndũ wa kwenda mbesa, Ndelila nĩweetĩkĩlile kwĩka ũndũ Avilisiti mamwĩie. Mbeenĩ, Samusoni nĩwaleile kũmũtavya Ndelila vala vinya wake waumĩte. Ĩndĩ Ndelila amwĩsũva mũno nginya eetĩkĩla kũmũtavya vala waumĩtye vinya. Amwĩie atĩĩ: ‘Mũtwe wakwa ndwaaenzwa kuma nasyawa nũndũ nĩ Mũnasali. Ngenzwa nzwʼĩĩ, ndyĩthĩwa na vinya.’ Samusoni avĩtisye mũno kũtavya Ndelila vala vinya wake waĩ, kana ti wʼo?

Yĩla Samusoni watavisye Ndelila vala vinya wake waĩ, Ndelila aendie asembete kũla kwĩ Avilisiti na amea atĩĩ: ‘Nĩnĩsĩ vala umĩtye vinya!’ Ĩtina wa ũu, Ndelila atumie Samusoni akoma, na amantha mũndũ amwenza nzwʼĩĩ. Amina kwĩka ũu amwĩtie Samusoni na wasya mũnene amwĩa: ‘Samusoni, Avilisiti nĩ mooka!’ Samusoni aamũka, na ndaĩ na vinya ta tene. Na Avilisiti mooka mamũkwata, mamũtonyanga metho, na mamwĩkya yela.

Mũthenya ũmwe Avilisiti ngili mbingĩ nĩmoombanie vamwe ĩkalũnĩ ya ngai woo weetawa Ndakoni, na mookĩlya wasya mũnene mayasya: ‘Ngai witũ nũmũnenganĩte Samusoni mokonĩ maitũ! Mũetei Samusoni vaa! Ekai tũmũthekeee.’ Mamũũngamisye katĩ wa ituĩ ilĩ na mambĩĩa kũmũthekeea. Samusoni amwĩtie Yeova amwĩa: ‘Mwa Yeova, nenga vinya o kavindanĩ kaa.’ Ĩvindanĩ yĩu, nzwʼĩĩ sya Samusoni syaĩ syeanie ĩngĩ. Ĩtina wa ũu, Samusoni nĩwasukumie ituĩ isu sya ĩkalũ na vinya wake wʼonthe. Kwondũ wa ũu, ĩsũmba yĩu yonthe yavalũka, na yoaa andũ onthe ala maĩ vau, vamwe na ũ Samusoni.