Yeova Nĩwamũsũvĩie Yeosavati

Mũsumbĩ wa Yuta ũla weetawa Yeosavati, nĩwaanangie ithembeo sya Mbaali o vamwe na mĩvwʼanano ĩla yaĩ nthĩ ĩla wasumbĩkĩte. Endaa andũ mamanye mĩao ya Yeova. Kwoou, nĩwatũmie andũ anene ma ũsumbĩ wake vamwe na Alivai mathi kĩsionĩ kyonthe kya Yuta nĩ kana makamanyĩsye andũ mĩao ya Yeova.

Andũ ma nthĩ ila syathyũlũlũkĩte Yuta nĩmakĩaa kũvithũkĩa andũ asu ma Yeova nũndũ nĩmeesĩ kana Yeova aĩ vamwe namo. O na nĩmaeteae Mũsumbĩ Yeosavati mĩthĩnzĩo. Ĩndĩ Amoavi, Aamimoni, na andũ ala matwĩe Seili nĩmookie kũkita na Yuta. Yeosavati nĩweesĩ kana no nginya amwĩkwatye Yeova nĩ kana amũtetheesye. Kwoou nĩwatũmanie nĩ kana aũme onthe, aka, na syana moke Yelusaleme. Na ĩndĩ avoya mbee wa andũ onthe asya: ‘Yeova, tũitonya kũsinda kaũ ũũ ũtatũtetheesye. Mwa tũtavye ũndũ tũkwĩka.’

Yeova asũngĩie amwĩa: ‘Mũikakĩe. Nĩngũmũtethya. Ũngamai mwĩlũmĩtye, na nĩmwũkwona ũndũ ngũmũtangĩĩa.’ We Yeova amatangĩĩie ata?

Ũnĩ ũsu kwakya, Yeosavati nĩwanyuvie aini na amatavya mathi mbee wa asikalĩ. Maumie Yelusaleme mathi nginya Tekoa vala maendaa kũkitĩa na amaitha moo.

Yĩla aini maendeee kũmũtaĩa Yeova me atanu kwa kwina na wasya mũnene, Yeova nĩwokitĩie andũ make. Eekie ũu ata? Nĩwavũvũanisye Aamimoni na Amoavi mambĩĩa kũkitana mo ene, na kwoou makwʼa onthe vyũ. Ĩndĩ Yeova nĩwasũvĩie andũ ma Yuta, asikalĩ moo, vamwe na athembi. Andũ ma nthĩ ila syamathyũlũlũkĩte nĩmeewie ũvoo ũsu, na kwoou mamanya kana Yeova nĩwasũvĩaa andũ make. Yeova atangĩĩaa andũ make ata? Ekaa ũu kwa nzĩa syĩ kĩvathũkanyʼo. O na ndendaa ũtethyo wa andũ nĩ kana eke ũu.