Elisavethi Nĩwasyaie Kana Kavĩsĩ

Myaka mbee wa 400 ĩtina wa ngũta sya Yelusaleme kwakwa ĩngĩ, vaĩ mũthembi ũmwe weetawa Nzekalia na kĩveti kyake, kyeetawa Elisavethi, ala mekalaa vakuvĩ na ndũa ĩsu. Mekalĩte myaka mingĩ kuma matwaana na mayaĩ maakwata mwana. Mũthenya ũmwe Nzekalia aendeee kũtoeesya ũvani vala vandũ vatheu, mũlaĩka weetawa Kavilieli nĩwamumĩlĩĩle. Nzekalia nĩwakwatiwe nĩ wia, ĩndĩ Kavilieli amwĩa: ‘Eka ũkĩa. Ngũetee ũvoo mũseo kuma kwa Yeova. Kĩveti kyaku Elisavethi kĩkasyaa kana kavĩsĩ, na kakeetwa Yoana. Yeova nũmũnyuvĩte Yoana ethũkũma wĩa wa vata.’ Nake Nzekalia amũkũlya atĩĩ: ‘Ndonya ũkũĩkĩĩa ata? Nyie na kĩveti kyakwa twĩ na myaka mingĩ ũndũ tũtatonya kũkwata mwana.’ Nĩvo ĩndĩ Kavilieli wamũsũngĩie amwĩa: ‘Ngai nĩwe ũndũmĩte ngũtavye ũvoo ũũ mũseo. Ĩndĩ nũndũ wa kwĩthĩwa ndũnandĩkĩĩa, ndũkethĩwa ũtonya kũneena nginya yĩla kana kau kesyawa.’

Nzekalia nĩwekalile vala vandũ vatheu ĩvinda yĩasa mbee wa ũndũ wekalaa. Kwoou yĩla waumaalũkile, andũ ala mamweteele vau nza nĩmendie kũmanya nĩ kyaũ kyaĩ na thĩna. Ĩndĩ Nzekalia ndaĩ atonya kũneena. Ũndũ ũla waĩ atonya kwĩka no kũneena na moko. Ũu watumie andũ mamanya kana Nzekalia aĩ anatavwʼa ũndũ mũna kuma kwa Ngai.

Ĩtina wa ĩvinda, Elisavethi nĩwaitavie na asyaa kana kavĩsĩ o tondũ Kavilieli waĩtye. Anyanyae na andũ ma mũsyĩ nĩmookie kwona kana kau na maĩ atanu mũno. Nĩvo ĩndĩ Elisavethi wameie: ‘Kana kaa keĩtwa Yoana.’ Namo mamwĩa: ‘Vaiĩ mũndũ wa mũsyĩ wenyu wĩtawa Yoana. Waĩle ũketa Nzekalia ta ĩthe wako.’ Ĩndĩ Nzekalia aandĩka ndeto ii: ‘Ĩsyĩtwa yako nĩ Yoana.’ Yĩla waandĩkie ndeto isu oou, nĩwambĩĩie kũneena ĩngĩ. Ũvoo ũsu nĩwanyaĩĩkie Yutia yonthe, na andũ masengʼa mũno na mambĩĩa kwĩkũlya: ‘Kana kaa keana kakeethĩwa kailye ata?’

Ĩtina wa ũu, Nzekalia nĩwausũiwe nĩ veva mũtheu. Na ĩndĩ athana asya: ‘Yeova nataĩwe. Athie Avalaamu kana akatũtũmĩa mũtangĩĩi, ũla nĩwe Masia atwovosye. Yoana akethĩwa mwathani na akaseũvya nzĩa kwondũ wa Masia.’

O na ve ũndũ wa mwanya wamũkwatie Meli, ũla waĩ mũndũ wa mũsyĩ ũmwe na Elisavethi. Eka twĩmanyĩsye ũndũ ũsu ĩsomonĩ yĩla yĩatĩĩe.