Yesũ Nĩwatwʼĩkie Masia

Nĩvavĩtĩte ĩvinda Yoana aitavanyʼa ayasya: ‘Mũndũ mũnene kwĩ nyie nĩwũkĩte.’ Yĩla Yesũ waĩ na myaka ta 30, nĩwaumie Kalilii athi Ũsĩnĩ wa Yolotani. Vau nĩvo Yoana wavatisĩaa andũ. Nĩkĩ Yesũ waendie ũsĩnĩ ũsu? Endaa Yoana amũvatise ĩndĩ Yoana amwĩa: ‘Ndyaĩle ũkũvatisa. Nue waĩle kũmbatisa.’ Nake Yesũ amwĩa Yoana: ‘Yeova eenda we ũmbatise.’ Kwoou, Yoana na Yesũ nĩmalikile Ũsĩnĩ wa Yolotani, na Yoana amũinda Yesũ kĩwʼũnĩ nthĩnĩ vyũ.

Ĩtina wa Yesũ kuma kĩwʼũnĩ, nĩwavoyie. Vau kwa vau, ĩtu nĩyavingũkie na veva mũtheu wa Ngai watheea ta ĩvũĩ ĩũlũ wake. Na ĩndĩ Yeova aneena kuma ĩtunĩ ayasya: “Nue Mwana wakwa mwendwa; nĩnendeeawʼa nue.”

Yĩla veva wa Yeova watheeie ĩũlũ wa Yesũ, nĩwatwʼĩkie Klĩsto, kana Masia. Kuma ĩvindanĩ yĩu aĩ atonya kwambĩĩsya wĩa ũla Yeova wamũtũmĩte oke kũtethya ĩũlũ wa nthĩ.

Ĩvinda ĩkuvĩ vyũ ĩtina wa Yesũ kũvatiswa, nĩwaendie weũnĩ na ekala kũu mĩthenya 40. Yesũ asyoka kuma weũnĩ, nĩwaendie kũmwona Yoana. Yĩla Yesũ wamũthengeeie, Yoana aisye: ‘Kaa nĩko Kalondu ka Ngai kala kakaveta naĩ ya nthĩ.’ Yoana aisye ũu ayenda andũ mamanye kana Yesũ nĩwe waĩ Masia. We nĩwĩsĩ nĩ kyaũ kyeekĩkie yĩla Yesũ waĩ weũnĩ? Ekai twone.