Yesũ Nĩwatheisye Ĩkalũ

Mwakanĩ wa 30, twĩ ta Mwei wa 4, Yesũ nĩwaendie Yelusaleme. Andũ aingĩ nĩmookĩte ndũanĩ ĩsu kwondũ wa mboka ya Vasaka. Na andũ asu nĩmaumisye nthembo sya nyamũ ĩkalũnĩ. Andũ amwe katĩ wa asu maumĩte mũsyĩ kwoo na nyamũ sya kumya nthembo, ĩndĩ angĩ mathooie nyamũ isu mavika Yelusaleme.

Ĩvindanĩ yĩu Yesũ nĩwaendie ĩkalũnĩ na eethĩa andũ maithooesya nyamũ vo. Andũ asu maendeee kũmanthĩa mbesa vau nyũmbanĩ ya Yeova ya ũthaithi. Yesũ oona mayĩka ũu eekie ata? Nĩwaseũvisye kĩvoko kya makanda na aumaalya malondu na ngʼombe ĩkalũnĩ. Nĩwangʼuthũlangile mesa sya andũ ala mavunzasya mbesa na etanga nthĩ mbesa syoo. Na Yesũ amina kwĩka ũu, eea andũ asu atĩĩ: ‘Vetangai syĩndũ ii vaa! Ekai kũtwʼĩkĩthya nyũmba ya Asa wakwa vandũ va kũmanthĩa mbesa.’

Andũ ĩkalũnĩ nĩmasengʼie nĩ kĩla Yesũ weekie. Ũu watumie amanyĩwʼa make malilikana wathani ĩũlũ wa Masia, ũla waĩtye: ‘Ngeethĩwa na kĩthito kingĩ kwondũ wa nyũmba ya Yeova.’

Ĩtina, mwakanĩ wa 33, Yesũ nĩwatheisye ĩkalũ ĩvinda ya kelĩ. Ndaĩ etĩkĩla mũndũ o na wĩva avũthye nyũmba ya Asa wake.