Yesũ Aineena na Mũndũ Mũka Vandũ Kĩthimanĩ

Ĩvinda ĩkuvĩ ĩtina wa Vasaka, Yesũ na amanyĩwʼa make nĩmesĩlile Samalia maendete Kalilii. Yĩla mavikie vakuvĩ na ndũa ya Saikale, Yesũ nĩwathũmũie vandũ veetawa kĩthimanĩ kya Yakovo. Yesũ e vau, amanyĩwʼa make nĩmaendie ndũanĩ makathooe lĩu.

Ĩvindanĩ yĩu ve mũndũ mũka wookie kũtava kĩwʼũ. Na ĩndĩ Yesũ amwĩa: “Nenge kĩwʼũ nĩnywʼe.” Nake mũndũ mũka ũsu amũkũlya: ‘Wĩneena nakwa nĩkĩ? Nyie nĩ Mũsamalia. Ayuti maineenanasya na Asamalia.’ Nĩvo ĩndĩ Yesũ wamwĩie: ‘Keka nũmanya ninyie ũũ, ũmbĩtya kĩwʼũ nakwa ngũnenga kĩwʼũ kĩ thayũ.’ Nake mũndũ mũka ũsu amũkũlya: ‘Ũu nĩ kwasya ata? O na ndwĩ na ndoo ya kũtava kĩwʼũ.’ Yesũ amwĩa: ‘Ũla ũnyusaa kĩwʼũ kĩla nĩmũnengae ndakewʼa waũni ĩngĩ.’ Nake mũndũ mũka ũsu amwĩa: “Mwĩaĩi, nenga kĩwʼũ kĩu.”

Na ĩndĩ Yesũ amwĩa mũndũ mũka ũsu: ‘Thi ũke na mũũme waku.’ Nake mũndũ mũka ũsu amwĩa Yesũ: ‘Nyie ndi na mũũme.’ Nake Yesũ amwĩa: ‘Waneena ũwʼo. Wĩthĩĩtwe wĩ mũtwae nĩ aũme atano, na oyu mũndũũme ũla wĩ nake ti mũũme waku.’ Na mũndũ mũka ũsu amwĩa: ‘Nĩona wĩ mwathani. Ithyĩ tũĩkĩĩaa kana no tũthaithĩe Ngai kĩĩmanĩ kĩĩ, ĩndĩ Ayuti maasya kana no Yelusaleme voka vaĩle kũthaithĩwa. Nyie nĩĩkĩĩaa kana yĩla Masia ũkoka akatũmanyĩsya ũndũ twaĩle kũthaitha.’ Na ĩndĩ Yesũ aweta ũndũ ũtaĩ aatavya mũndũ ũngĩ, asya: ‘Nyie ninyie Masia.’

Na ĩndĩ mũndũ mũka ũsu eekalaata athi ndũanĩ na atavya Asamalia amea: ‘Nĩnamwona Masia. Esĩ kĩla kĩndũ ĩũlũ wakwa. Ũkai mũkamwone!’ Andũ asu nĩmamũatĩĩie na meethukĩĩsya kĩla Yesũ wamanyĩasya.

Asamalia nĩmamũthokisye Yesũ ekale ndũanĩ yoo. Vandũ va mĩthenya ĩlĩ Yesũ nĩwamanyĩisye ndũanĩ ĩsu, na andũ aingĩ mamũĩkĩĩa. Andũ asu mamwĩie ũla mũndũ mũka Mũsamalia atĩĩ: ‘Ĩtina wa kũmwĩthukĩĩsya mũndũ ũũ, nĩtũmanyie nesa ki kana we nĩ mwovosya wa nthĩ.’