Yesũ Nĩwanyuvie Atũmwa Ĩkũmi na Elĩ

Ĩtina wa Yesũ kũtavanyʼa vandũ va ta mwaka ũmwe na nusu, ve motwi ma vata mũno waaĩle kwĩka. Nĩwaaĩle kũtwʼa naaũ ũkũnyuva matavanasye ũvoo vamwe nake. O na nĩwaaĩle kũtwʼa naaũ ũkũmanyĩsya makatongoeasya kĩkundi kya Kĩklĩsto. Nĩ kana Yesũ eke motwi asu, nĩwaaĩle kũmũkũlya Yeova amũtongoesye. Kwoou nĩwaendie kĩĩmanĩ e weka na avoya ũtukũ wʼonthe. Kwakya Yesũ nĩweetie amanyĩwʼa make na anyuva 12 katĩ wa asu methĩwe atũmwa. Ve mũtũmwa ũmwe katĩ wa asu wĩsĩ? Atũmwa asu maĩ Vetelo, Endelea, Yakovo, Yoana, Vilivu, Valitholomayo, Thoma, Mathayo, Yakovo mwana wa Alivaio, Thatayo, Simoni, na Yutasi Isikalioti.

Atũmwa asu 12 Yesũ wanyuvie maaĩle kũendanasya nake kĩla vandũ. Ĩtina wa kũmamanyĩsya, nĩwamatũmie makatavanyʼe me oka. Yeova nĩwamanengie ũtonyi wa kumya ndaimoni na kũvosya awau.

Atũmwa asu maĩ anyanyae ma Yesũ, na nĩwamaĩkĩĩĩte. Avalisi moonaa atũmwa ta andũ mate amanyĩsye na andũ ma kĩlasi kya nthĩ. Ĩndĩ Yesũ nĩwamamanyĩisye wĩa wa kũtavanyʼa. Maĩ maendeee kwĩkalanyʼa na Yesũ o na mavinda ala maĩ ma vata mũno thayũnĩ wake, ta ĩvinda yĩla Yesũ waĩ vakuvĩ kũkwʼa na ĩtina wa kũthayũũkwʼa. O ta Yesũ, atũmwa aingĩ katĩ wa asu 12 maumĩte kĩsionĩ kya Kalilii. Na amwe nĩmatwaanĩte.

Atũmwa maĩ andũ me naĩ na nĩmeekaa mavĩtyo. Ve mavinda maneenaa matambĩte kũsũanĩa, o na nĩmeekaa motwi mathũku. Na mavinda angĩ nĩmeethĩawa mate na wũmĩĩsyo. O na nĩmakothaa kũkananĩa nũũ ũla waĩ mũnene katĩ woo. Ĩndĩ o na ũu wĩ o vo, maĩ andũ aseo na nĩmamwendete Yeova mũno. Ĩtina nĩmo mesie kwĩthĩwa andũ ma mbee ma kĩkundi kya Kĩklĩsto, na nĩmatethisye wĩa wa vata mũno ĩtina wa Yesũ kuma ĩũlũ wa nthĩ.