Yesũ Nĩwamanyĩisye Amanyĩwʼa Make Ũndũ Maĩle Kũvoya

Maũndũ onthe ala Avalisi meekaa mendaa kwendeesya andũ. Yĩla meeka mũndũ ũndũ mũseo, meekaa ũu nĩ kana andũ ala angĩ mamone. Mavoyaa me kũla kwĩthĩawa andũ aingĩ nĩ kana kĩla mũndũ amone. Avalisi nĩmeemanyĩasya mboya ndaasa na maithi kũisyokeleela masinakokenĩ na konanĩ sya ndũa vala andũ maĩ matonya kũmewʼa. Ũu watumie andũ masengʼa yĩla Yesũ wameie atĩĩ: ‘Mũikavoyae ta Avalisi. Masũanĩaa kana Ngai nũkwĩwʼa mboya syoo nũndũ wa kũtũmĩa ndeto mbingĩ, ĩndĩ Ngai ndamewʼaa. Mũndũ aĩle kũvoya nĩ kana ewʼĩke nĩ Yeova, ĩndĩ ti ewʼĩke nĩ andũ. Mũndũ ndaĩle kũtinda atũngĩlĩĩle ndeto o ila. Yeova endaa tũmũtavye maũndũ ala me ngoonĩ sitũ.’

Ĩtina wa Yesũ kũtavya andũ maũndũ asu, nĩwamamanyĩisye ũndũ maĩle kũvoya. Ameie, ‘Voyaai atĩĩ: “Asa waitũ ũla wĩ ĩtunĩ, ĩsyĩtwa yaku yĩtaĩwe. Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.”’ O na ĩngĩ Yesũ nĩwatavisye andũ kana nĩmaĩle kũvoya kwondũ wa lĩu wa kĩla mũthenya, nĩ kana Ngai amaekee mavĩtyo moo, na kwondũ wa mavata angĩ ala me namo.

Ĩtina wa ũu, Yesũ nĩwatavisye andũ asu ũndũ ũngĩ amea atĩĩ: ‘Mũikaeke kũvoya. Endeeai kũmũvoya Asa wenyu, Yeova, amũnenge syĩndũ nzeo. Kĩla mũsyai nĩwendete kũnenga mwana wake kĩndũ kĩseo. Ve mwana wĩtya mũsyai wake mũkate, na mũsyai akamũnenga ĩvia? Na akamwĩtya ĩkũyũ, no amũnenge nzoka?’

Yesũ nĩwatetheeisye ethukĩĩsya make maelewe kĩla wamamanyĩasya ngelekanyʼonĩ ĩsu. Ameie: ‘Ethĩwa nĩmwĩsĩ kũnenga syana syenyu syĩndũ nzeo, Asa wenyu, Yeova, no aemwe nĩ kũmũnenga veva mũtheu? Kĩla mwaĩle kwĩka no kũmũvoya.’ We nũatĩĩaa ũtao ũsu wa Yesũ? Nĩ maũndũ meva ũmũvoyaa Yeova akũnenge?