Yesũ Nĩwakinyĩle Ĩũlũ wa Kĩwʼũ

O na kau Yesũ aĩ na ũtonyi wa kũvosya awau na kũthayũũkya akwʼũ, aĩ o atonya kũvindĩthya kĩseve na kũũngamya mbua. Ĩtina wa Yesũ kũvoya e kĩĩmanĩ, nĩwasiisye Ũkanganĩ wa Kalilii na oona wĩ na kĩuutani. Atũmwa make maĩ ũkanganĩ ũsu maendeee kũngʼangʼana nĩ kana ĩsiwa yĩikavalũkwʼe nĩ kĩseve. Yesũ amina kwona ũu nĩwaumie kĩĩmanĩ na ambĩĩa kwĩsĩla ĩũlũ wa kĩwʼũ aendete vala ve atũmwa make. Yĩla atũmwa moonie mũndũ esĩle kĩwʼũnĩ nĩmatelemile mũno. Ĩndĩ Yesũ aneena namo amea: ‘No inyie, mũikakĩe.’

Yĩla Vetelo weewie Yesũ aneena amwĩie: ‘Mwĩaĩi, ethĩwa kwa wʼo nue, eka nũke vala ũĩ nĩsĩle kĩwʼũnĩ.’ Nake Yesũ amwĩa: ‘Ũka.’ Vetelo nĩwaumie ĩsiwanĩ na akinyĩla kĩwʼũnĩ aendete vala ve Yesũ o kĩuutani kĩendeee. Ĩndĩ e vakuvĩ kũvika vala ve Yesũ, Vetelo nĩwasiisye kĩuutani na akwatwa nĩ wia. Nĩwamanyie kana nĩwambĩĩa kũlika kĩwʼũnĩ, na ĩndĩ aneena na wasya mũnene asya: ‘Mwĩaĩi, ndangĩĩa.’ Yesũ nĩwamũkwatie Vetelo kwʼoko na amwĩa: ‘Nĩkĩ wakwatwa nĩ nzika? Mũĩkĩĩo waku ũĩva?’

Ĩtina wa ũu, Yesũ na Vetelo nĩmalĩsile ĩsiwanĩ, na ndatĩkanĩ o ĩsu kĩuutani kyathela. We wĩona atũmwa ta meewie ata moona ũu? Yĩla atũmwa moonie maũndũ asu mamwĩie Yesũ atĩĩ: “Kwa wʼo we wĩ Mwana wa Ngai.”

Yĩu tiyo yaĩ ĩvinda yoka Yesũ kũvindĩthya kĩuutani. Ve ĩvinda yĩngĩ Yesũ na atũmwa make maĩ ĩsiwanĩ maendete ngalĩko ĩngĩ ya ũkanga. Maendete Yesũ nĩwaendie ngalĩko ya ĩtina ya ĩsiwa na akoma, na akomete kweethĩwa na kĩuutani kyaĩ na vinya mũno. Itulumo sya ũkanga nĩsyakimie ĩsiwa yĩu na kĩwʼũ kingĩ kyalika ĩsiwanĩ. Yĩla atũmwa moonie ũu, nĩmamũamũkisye Yesũ na makaya makyasya: ‘Mũmanyĩsya, nĩtũũkwʼa. Tũtangĩĩe.’ Yesũ nĩwaamũkie na mĩtũkĩ na eea ũkanga atĩĩ: “Kilya!” Ndatĩkanĩ ĩsu, kĩseve vamwe na kĩuutani nĩkyathelile. Yesũ amina kwĩka ũu akũlilye atũmwa make atĩĩ: ‘Mũĩkĩĩo wenyu ũĩva?’ Na ĩndĩ atũmwa mambĩĩa kũneenanyʼa mo ene makyasya: “O na kĩseve na ũkanga nikũmwĩwʼa.” Maũndũ asu matumie atũmwa mamanya kana mamũĩkĩĩa Yesũ vyũ, maikakĩa kĩndũ o na kĩva.