ĨSOMO YA 34
Tũtonya Kwĩka Ata Tũmwonyʼe Yeova Kana Nĩtũmwendete?
Kuma yĩla wambĩĩie kwĩmanyĩsya Mbivilia kũvika yu, we nĩwĩwʼaa wĩ vakuvĩ mũnango na Ngai? No wende kũendeea kũlũlũmĩĩlya ũnyanya waku vamwe nake? Ethĩwa vailye ũu, lilikana kana o ũndũ Yeova waendeea kwona wendo waku kwake ũyongeleka, nowʼo ũkũendeea kũkwenda na kũũsũvĩa. Ũtonya kũmwonyʼa ata kana nũmwendete?
1. Tũtonya kũmwonyʼa Yeova ata kana nĩtũmwendete?
Twonanasya kana nĩtũmwendete Yeova kwa kũmwĩwʼa. (Soma 1 Yoana 5:3.) We ndathingʼĩĩasya andũ mamwĩwʼe. Vandũ va ũu, nũnengete kĩla ũmwe witũ mwanya wa kũnyuva ethĩwa nũkũmwĩwʼa kana ndemwĩwʼa. Nĩkĩ? Yeova endaa ‘tũmwĩwʼe kuma ngoonĩ.’ (Alomi 6:17) Kwa ndeto ingĩ, endaa ũmwĩwʼe nũndũ nũmwendete, ĩndĩ ti nũndũ no nginya wĩke ũu. Kĩlungu kya katatũ na kya kana ĩvukunĩ yĩĩ, iseũvĩtwʼe iũtetheesye kwona ũndũ ũtonya kwonanyʼa nũmwendete Yeova, kwa kwĩka kĩla kĩmwendeeasya na ũyĩvathana na kĩla kĩtamwendeeasya.
2. Nĩkĩ ũtonya kwĩthĩwa ũte ũndũ wĩ laisi kũmwonyʼa Yeova kana nĩtũmwendete?
Mbivilia yaĩtye: “Mathĩna nĩ maingĩ ala mũndũ mũlũngalu wĩ namo.” (Savuli 34:19) Ithyonthe nĩtũngʼangʼanaa na mawonzu maitũ. O na no tũkwatwe nĩ mathĩna ma mbesa, tũkalea kwonwʼa ũsili wa katĩ, kana tũkakwatwa nĩ mathĩna angĩ. Yĩla twakwatwa nĩ maũndũ asu, no vethĩwe vate laisi kwitũ kwĩka kĩla Yeova wendaa twĩke. Na kĩtumi nũndũ kwĩka ũndũ ũla ũtaĩlĩte nĩkwʼo kũtonya kwoneka kwĩ laisi. Ĩndĩ weethĩwa wĩ mũĩkĩĩku na weeka kĩla Yeova ũkwenda wĩke, wonanasya kana nũmwendete mũno kwĩ kĩndũ kĩngĩ o na kĩva. O na wonanasya kana nũlũmanĩtye nake. Na weeka ũu, o nake akalũmanyʼa naku. Ndakaũtia nongi.—Soma 2 Samueli 22:26.
ĨMANYĨSYE MŨNANGO
Ĩmanyĩsye wone nĩkĩ Yeova ũtanaa yĩla wamwĩwʼa, na ũimanya kĩla kĩtonya kũũtetheesya ũendeee kwĩthĩwa wĩ mũĩkĩĩku kwake.
3. Ve ũndũ wa vata ũũkonetye
Kwosana na ĩvuku ya Yovu, ve ũndũ mũna Satani wamwilĩĩile Yovu, o vamwe na andũ onthe ala mekwenda kũmũthũkũma Yeova. Somai Yovu 1:1, 6–2:10, na ĩndĩ mũineenea makũlyo aa:
Kwosana na kĩla Satani wawetie, nĩkĩ Yovu wamwĩwʼaa Yeova?—Sisya Yovu 1:9-11.
Satani aisye ata ĩũlũ wa andũ onthe, o vamwe naku?—Sisya Yovu 2:4.
Somai Yovu 27:5b, na ĩndĩ mũineenea ĩkũlyo yĩĩ:
Yovu oonanisye ata kana kwa wʼo nĩwamwendete Yeova?
Yovu oonanisye kana nĩwamwendete Yeova kwa kwĩkala e mũĩkĩĩku kwake
Twonanasya kana nĩtũmwendete Yeova kwa kwĩkala twĩ aĩkĩĩku kwake
4. Tanĩthya ngoo ya Yeova
Somai Nthimo 27:11, na ĩndĩ mũineenea makũlyo aa:
We Yeova ewʼaa ata yĩla weethĩwa wĩ mũĩ na wamwĩwʼa? Nĩkĩ wasũngĩa ũu?
5. Nũtonya kũlũmanyʼa na Yeova
Kũmwenda Yeova nĩkũtumaa twenda kũtavya angĩ ĩũlũ wake. Ũĩkĩĩku witũ kwake nũtumaa twenda kwĩka ũu, o na yĩla vate laisi. Ĩloelei VITIO, na ĩndĩ mũineenea makũlyo aa maatĩĩe:
We nĩwĩwʼaa wĩ ũndũ wĩ vinya kũtavya angĩ ĩũlũ wa Yeova?
Kwosana na ũndũ twoona vitionĩ, nĩ kyaũ kyamũtetheeisye Grayson kũsinda wia ũla waĩ nawʼo?
Twenda maũndũ ala Yeova wendete na twamena ala ũmenete, ũkeethĩawa wĩ ũndũ wĩ laisi kũlũmanyʼa nake. Somai Savuli 97:10, na ĩndĩ mũineenea makũlyo aa:
Kwosana na kĩla wĩmanyĩĩtye, Yeova endete maũndũ ta meva? Amenete maũndũ ta meva?
Ũtonya kwĩka ata nĩ kana wĩmanyĩsye kwendaa maũndũ ala maseo na ũimenaa ala mathũku?
6. Nĩtũtethekaa twamwĩwʼa Yeova
Mavinda onthe, kũmwĩwʼa Yeova nĩkwʼo kwĩthĩawa kwĩ kũseo vyũ. Somai Isaia 48:17, 18, na ĩndĩ mũineenea makũlyo aa:
We nũĩkĩĩaa vyũ kana mavinda onthe Yeova nĩwĩthĩawa esĩ kĩla kĩseo kwitũ? Nĩkĩ wasũngĩa ũu?
Kũvikĩĩa vau ũtethekete ata nũndũ wa kwĩmanyĩsya Mbivilia, na kwĩmanyĩsya ĩũlũ wa Yeova, Ngai ũla wa wʼo?
ANDŨ AMWE MAASYA: “Ngai ndalũnganaa na meko maitũ.”
We ũtonya kũtũmĩa ĩandĩko yĩva kwonyʼa mũndũ kana meko maitũ nĩmatonya kũtuma Yeova ewʼa mũyo kana akathata?
KĨLA TWEEMANYĨSYA
Nũtonya kũmwonyʼa Yeova kana nũmwendete kwa kũmwĩwʼa, na kwa kũendeea kwĩthĩwa wĩ mũĩkĩĩku kwake o na yĩla wĩ mathĩnanĩ.
Makũlyo ma Kũsyokeleela
Ngelekanyʼo ya Yovu yaũmanyĩsya kyaũ?
Ũtonya kwonanyʼa ata kana nũmwendete Yeova?
Nĩ kyaũ kĩtonya kũũtetheesya wĩkale wĩ mũĩkĩĩku kwa Yeova?
MAŨNDŨ ANGĨ MA KWĨMANYĨSYA
Ĩloele vitio wone ũndũ ũtonya kũendeea kũlũmanyʼa na Yeova, vamwe na kĩkundi.
Ĩmanyĩsye wone maũndũ maingangĩ monanĩtye kĩla Satani wawetie ĩũlũ wa andũ.
“Yovu Ndaaeka Kwĩthĩwa e Mũĩkĩĩku” (Biblia—Ina Ujumbe Gani? kĩlungu kya 6)
Ĩloele vitio wone ũndũ o nasyo syana itonya kwonanyʼa kana nimwendete Yeova.
Mũndũ wa mũika atonya kwĩka ata nĩ kana ekale e mũĩkĩĩku kwa Ngai, o na yĩla wathingʼĩĩwʼa nĩ andũ angĩ ma mũika eke kĩla kĩtaĩle?
Ndũketĩkĩle Kũthingʼĩĩwʼa Wĩke Kĩla Andũ Angĩ ma Mũika Mekwĩka! (3:59)