ĨSOMO YA 37
Kĩla Mbivilia Ĩmanyĩasya Ĩũlũ wa Wĩa na Mbesa
We ve ĩvinda waaĩmakĩa nũndũ wa wĩa kana mbesa? Ti ũndũ wĩ laisi kwĩanĩsya mavata maitũ, na tũimũthũkũma Yeova na ngoo yonthe. Mbivilia nĩtũnengete ũtao mũseo ũtonya kũtũtetheesya.
1. Mbivilia ĩmanyĩasya ata ĩũlũ wa wĩa?
Ngai nĩwendaa tũtanĩe wĩa witũ. Mbivilia yaĩtye atĩĩ: “Kũti ũndũ ũseo kwa mũndũ kũvĩtũka . . . kũtanĩa ũseo wĩanĩ wake.” (Mũtavanʼya 2:24) Yeova nũthũkũmaa na kĩthito. Yĩla twathũkũma na kĩthito o take, nĩtũmũtanĩthasya na tũyĩwʼa twĩ eanĩe.
Wĩa nĩ wa vata. Ĩndĩ tũyaĩlĩte kũwĩtĩkĩlya wĩthĩwe wĩ wa vata mũno kũte ũthaithi witũ kwa Yeova. (Yoana 6:27) Nũtwathĩte kana twamũvĩtya mbee nũkeanĩasya mavata maitũ.
2. Twaĩlĩte kwĩthĩwa na woni mwaũ kwelekela mbesa?
O na kau Mbivilia ĩtũtavĩtye kana “mbesa nĩ ũsũvĩo,” nĩsyokete ĩkatũtavya kana syĩ syoka iyĩsa kũtuma twĩthĩwa na ũtanu. (Mũtavanʼya 7:12) Kwoou, twĩĩkĩtwe vinya tũikende mbesa ĩndĩ ‘twĩanĩwe nĩ syĩndũ ila twĩ nasyo.’ (Soma Aevelania 13:5.) Yĩla tweanĩwa nĩ kĩla twĩ nakyo, tũkekalaa tũteũthĩnĩka tũyona kana syĩndũ ila twĩ nasyo iitoetye. O na tũikelikasya makoaninĩ mate ma lasima. (Nthimo 22:7) O na ĩngĩ, tũkeevathana na mĩisyo ya kũthaũka kalata, na itei sya ala makengaa andũ kana no matwʼĩke athwii na mĩtũkĩ matũmĩĩte nzĩa sya mũkato.
3. Tũtonya kwonanyʼa ũlau ata tũtũmĩĩte mbesa sitũ?
Yeova nĩ Ngai mũlau, na tũatĩĩaa ngelekanyʼo yake yĩla tweethĩwa twĩ ‘alau, na twĩyũmbanĩtye kũaĩa ala angĩ kĩla twĩ nakyo.’ (1 Timotheo 6:18) No tũtũmĩe mbesa sitũ kũkwata mbau kĩkundi, na kũtetheesya ala me thĩnanĩ na mũno mũno athaithi ala angĩ. Yeova ndendeeawʼa mũno nĩ kĩla twaumya ũndũ kĩana, ĩndĩ endeeawʼa nĩ kĩeleelo kitũ kya kumya. Yĩla twanengane kwa ũlau kuma ngoonĩ, tũkeethĩawa twĩ atanu, na tũimwendeesya Yeova.—Soma Meko ma Atũmwa 20:35.
ĨMANYĨSYE MŨNANGO
Ĩmanyĩsye wone ũndũ ũtonya kũtetheka weethĩwa na woni ũla waĩlĩte kwelekela wĩa, na ũseo wa kwĩkalaa wĩ mwĩanĩe.
4. Mũtaĩe Yeova kwĩsĩla wĩa waku
Ũnyanya witũ na Yeova nĩwʼo waĩlĩte kũtuma twĩthĩwa na woni ũla waĩlĩte kwelekela wĩa. Ĩloelei VITIO, na ĩndĩ mũineenea makũlyo aa maatĩĩe:
Kwosana na ũndũ twoona vitionĩ, nĩ kyaũ kyakwendeesya ĩũlũ wa woni wa Jason kwelekela wĩa na mwĩkalĩle wake yĩla wĩ wĩanĩ?
Eeka ata nĩ kana ethĩwe na woni ũla waĩlĩte kwelekela wĩa?
Somai Akolosai 3:23, 24, na ĩndĩ mũineenea ĩkũlyo yĩĩ:
Nĩkĩ woni witũ kwelekela wĩa nĩ wa vata mũno?
Wĩa nĩ wa vata. Ĩndĩ tũyaĩlĩte kũwĩtĩkĩlya wĩthĩwe newʼo ũndũ ũla wa vata vyũ kwĩ ũthaithi witũ kwa Yeova
5. Nĩtũtethekaa tweethĩwa twĩ eanĩe
Andũ aingĩ nĩmatataa kwĩmanthĩa malĩ mbingĩ ũndũ vatonyeka. Ĩndĩ Mbivilia nĩnenganĩte woni wĩ kĩvathũkanyʼo. Somai 1 Timotheo 6:6-8, na ĩndĩ mũineenea ĩkũlyo yĩĩ:
Mbivilia ĩtwĩkĩĩte vinya twĩke ata?
O na ethĩwa twĩ na syĩndũ nini, no twĩthĩwe na ũtanu. Ĩloelei VITIO, na ĩndĩ mũineenea ĩkũlyo yĩla yĩatĩĩe.
O na kau ũkwati woo nĩ mũnini, nĩ kyaũ kĩtumaa mĩsyĩ ĩno yĩthĩwa na ũtanu?
Nao nata ethĩwa twĩ na syĩndũ mbingĩ, ĩndĩ twĩ o na wendi wa kwongelanga ingĩ mbingangĩ? Yesũ nĩwaneeneie ĩũlũ wa ũndũ ũsu. Somai Luka 12:15-21, na ĩndĩ mũineenea ĩkũlyo yĩĩ:
Ngelekanyʼo ya Yesũ yaũmanyĩsya kyaũ? —Sisya mũsoa wa 15.
Somai na mũisianĩsya Nthimo 10:22 na 1 Timotheo 6:10. Na ĩndĩ mũineenea makũlyo aa:
Wĩona nĩ kyaũ kya vata? Nĩ kwĩthĩwa wĩ mũnyanya wa Yeova, kana nĩ kwĩthĩwa na mbesa mbingĩ? Nĩkĩ wasũngĩa ũu?
Nĩ mathĩna meva maumĩlaa yĩla mũndũ wasembanyʼa na mbesa?
6. Yeova akatwĩanĩasya mavata maitũ
Mathĩna ma wĩa na ma mbesa no matate mũĩkĩĩo witũ kũla kwĩ Yeova. Ĩloelei VITIO nĩ kana mwone ũndũ tũtonya kwĩka twakwatwa nĩ mathĩna ta asu, na ĩndĩ mũineenea makũlyo ala maatĩĩe.
Kwosana na ũndũ twoona vitionĩ, nĩ mathĩna meva makwatie mwana-a-asa ũsu?
Eekie ata nĩ kana omĩanĩsye na mathĩna asu ũndũ vaĩlĩte?
Somai Mathayo 6:25-34, na ĩndĩ mũineenea ĩkũlyo yĩĩ:
Ala mamũvĩtasya Yeova mbee amathĩte kyaũ?
ANDŨ AMWE MAASYA: “No nginya nĩthũkũme nĩ kana nĩanĩsye mavata ma mũsyĩ wakwa. Kwoou nditonya kũendaa maũmbanonĩ kĩla kyumwa.”
Nĩ ĩandĩko yĩva yĩũkũĩkĩĩthya kana kũvĩtya ũthaithi wa Yeova mbee nĩwʼo ũndũ ũla wa vata vyũ?
KĨLA TWEEMANYĨSYA
Wĩa na mbesa nĩ syĩndũ sya vata, ĩndĩ iyaĩlĩte kũtuma tũtamũthũkũma Yeova ũndũ vaĩlĩte.
Makũlyo ma Kũsyokeleela
Nĩ kyaũ kĩtonya ũkũtetheesya wĩthĩwe na woni ũla waĩlĩte kwelekela wĩa?
Kwĩanĩwa kũtonya ũkũtethya ata?
Ũtonya kwonanyʼa ata kana nũĩkĩĩe watho wa Yeova wa kwĩanĩasya mavata ma andũ make?
MAŨNDŨ ANGĨ MA KWĨMANYĨSYA
Soma wone ethĩwa Mbivilia yasyaa kana mbesa nĩ nthũku.
“Syo Mbesa Nĩsyo Kĩtina kya Maũndũ Onthe Mathũku?” (Ũvoo wĩ kĩsesenĩ)
Ĩmanyĩsye wone ũndũ tũtonya kũtũmĩa mbesa sitũ kũmwendeesya Ngai.
“Mbivilia Yaasya Ata Ĩũlũ wa Mũndũ Ũla Ũtetheeasya Ala Angĩ?” (Ũvoo wĩ kĩsesenĩ)
Nĩ ũthũku kũtha kalata?
“Woni wa Mbivilia Ĩũlũ wa Kũthaũka Kalata” (Amkeni!, Mwei wa 3, 2015)
Sisya wone kĩla kyatumie mũndũ ũmwe wathaũkaa kalata na waĩ kĩngʼei avĩndũa mwĩkalĩle wake.
“Nĩnendete Mũno Mbalasi sya Mathaũ” (Mũsyaĩĩsya, Ĩtukũ 1, Mwei wa 11, 2011)