Tetheka Vyũ kwa Kwĩmanyĩsya we Mwene
1. Kwĩmanyĩsya na kũsũanĩĩa maũndũ kũtonya kũtũtethya ata?
Nĩtũtethekaa mũno tweethĩwa ‘tũikwata maũndũ na kĩthito’ ĩvinda yĩla tũkwĩmanyĩsya Mbivilia na kũsũanĩĩa maũndũ ala tũũsoma. (Aevl. 2:1, Kikamba New Testament) Kũsoma na kũsũanĩĩa maũndũ ala me Mbivilianĩ na mavukunĩ ma Kĩklĩsto kũtũnengae mwanya mũseo wa kũlikya wʼo wa Ndeto ya Ngai ngoonĩ sitũ. Wamina kũlika ngoonĩ sitũ, ũkaalyũla mesilya na meko maitũ. Vate nzika, ũkatũtetheesya kũtanĩa kwĩka kwenda kwa Yeova. (Sav. 1:2; 40:8) Kwoou, nĩtwaĩle kũtata kwĩthĩwa na ũtonyi wa kũsũanĩĩa maũndũ kĩlĩko kĩ vamwe nĩ kana ũtonyi ũsu ũkatũtetheeasya ĩla tũkwĩmanyĩsya. Nĩ laisi mũno kĩlĩko kwelelũkwʼa! Maũndũ manini ma kwelelũkya ta kũkũnĩwa simũ kana kelele mũna, nĩmatonya kũtuma kĩlĩko kyelelũka. Kana tũkethĩwa tũtatonya kũsũanĩĩa ũndũ kwa ĩvinda yĩasa. Nĩtũtonya kwĩkala nthĩ twĩ na kĩeleelo kĩseo kya kwĩyĩĩthya kĩveva, ĩndĩ ĩtina wa ĩvinda ĩkuvĩ kĩlĩko kitũ kĩyambĩĩa kwanganga. Tũtonya “kũkwata na kĩthito maũndũ” ata ĩla tũkwĩmanyĩsya Ndeto ya Ngai?
2. (a) Nĩkĩ nĩ ũndũ wa vata mũno kwĩthĩwa na mũvango wa kwĩmanyĩsya ithyĩ ene? (b) Wĩkĩte ata nĩ kana ũkwate ĩvinda ya kwĩmanyĩsya Ndeto ya Ngai?
2 Nĩ ũndũ waĩle kwĩthĩwa na mũvango wa kwĩmanyĩsya ithyĩ ene na kũnyuva vandũ vaseo va kwĩmanyĩĩsya. Ti laisi kwa aingĩ maitũ kũkwata ĩvinda na kwĩthĩwa na vandũ vaseo va kwĩmanyĩĩsya. Nũndũ wa maũndũ maingĩ ala maendeee kwĩkĩka ũmũnthĩ, nĩtũtonya kwĩwʼa maũndũ asu matũkuĩte o ũndũ kaũvonge kakuawa nĩ ũsĩ wĩ na kĩwʼũ kĩsembete. Ĩndĩ nĩtwaĩle kũtata na vinya tume ũsĩnĩ ũsu wa ngelekanyʼo na kũmantha kathama kauĩtye. Tũtamanthĩte ĩvinda ya kwĩmanyĩsya, yo yĩyĩyĩete. Kwoou, nĩtwaĩle kũvanga maũndũ nĩ kana tũkwate ĩvinda ya kwĩmanyĩsya. (Aev. 5:15, 16) Amwe nĩmemanyĩasya kwa ĩvinda ĩkuvĩ kwakya ĩla kũte maũndũ maingĩ matuma kĩlĩko kyelelũka. Angĩ nĩmonaa wĩoo ne ĩvinda ĩseango ya kwĩmanyĩsya. Ĩndĩ ũndũ ũla wa vata nĩ kwosa kwa ũito vata wa kwĩthĩwa na ũmanyi wa ũla wʼo ĩũlũ wa Ngai na Mwana wake. (Yoa. 17:3) Ekai ĩndĩ tũvange ĩvinda ya kwĩmanyĩsya ithyĩ ene na kũatĩĩa mũvango ũsu.
3. Kũsũanĩĩa nĩ kyaũ, na kũtonya kũtũtethya ata?
3 Kũsũanĩĩa nĩ kwĩsilya kwa ũliku ĩũlũ wa maũndũ ala tweemanyĩsya, na ũsu nĩ ũndũ wa vata mũno. Kwĩka ũu nĩkũtũtetheeasya kwosa mosũanĩo ma Ngai ala maandĩke na kũmekĩa ngoonĩ sitũ. Kũsũanĩĩa nĩkũtũtetheeasya kũmanya ũndũ tũtonya kũtũmĩa ũtao wa Mbivilia nĩ kana twĩthĩwe twĩ “eki ma ndeto, na ti ewi oka.” (Yak. 1:22-25) Vamwe na ũu, kũsũanĩĩa nĩkũtũtetheeasya kũmũthengeea Yeova mũnango, nũndũ nĩkũtũtonyethasya kwĩsilya ĩũlũ wa ndaĩa syake na ũndũ ieleetwʼe nthĩnĩ wa kĩla tũũsoma ĩla tũkwĩmanyĩsya.
4. Nĩ maũndũ meva twaĩle kwĩka nĩ kana kũsũanĩĩa kũtũtethye?
4 Nĩ kana tũtetheke vyũ kumana na kwĩmanyĩsya na kũsũanĩĩa maũndũ, no nginya twĩvathane na maũndũ ala melelũkasya kĩlĩko. Nĩ kana maũndũ meũ makwate mwanya kĩlĩkonĩ kitũ ĩla tũũsũanĩĩa, no nginya twĩsiĩanĩe na maũndũ ala matonya kwelelũkya kĩlĩko kitũ. Kwĩka ũu nĩkũkuaa ĩvinda na vendekaa wose mwanya wa kwĩthĩwa wĩ weka. Ĩndĩ nĩ ũndũ wa kũtanĩthya ta kĩ kwĩyĩĩthya lĩu wa kĩveva na kũnywʼa kĩwʼũ kya ũla wʼo kuma Ndetonĩ ya Ngai!
5. (a) Ĩũlũ wa ĩmanyĩsyo ya mũndũ mwene, nĩ kyaũ kĩtetheesye amwe kũsũanĩĩa maũndũ kwa ĩvinda yĩasanga? (b) Twaĩle kwĩthĩwa na woni mwaũ ĩũlũ wa kwĩmanyĩsya, na tũtonya kũtetheka ata kwa kwĩka ũndũ ũsu wa vata?
5 Tũkeeka ata ethĩwa tũitonya kũsũanĩĩa ũndũ kwa ĩvinda yĩasa na ethĩwa kĩlĩko kitũ nĩkyambĩĩaa kwanganga ĩtina wa kwĩmanyĩsya kwa ĩvinda o ĩnini? Angĩ nĩmonete kana nĩmatonya kwongela ũtonyi wa kũsũanĩĩa maũndũ ĩvinda yĩasa kwa kwambĩĩa kũsoma kwa ĩvinda ĩkuvĩ, na maiendeea kwongeleela ĩvinda yĩu. Kĩeleelo kitũ kyaĩle kwĩthĩwa kĩ kwĩmanyĩsya kwa ĩvinda yĩtoetye ĩndĩ ti kũsoma mĩtũkĩ tũte kũelewa nĩ maũndũ. Nĩtwaĩle kũtata twendeewʼe mũno nĩ ũvoo ũla tũkwĩmanyĩsya. Nĩtũtonya kũkunĩkĩla maũndũ kwa ũliku tũitũmĩa ũvoo mwingĩ ũla wumĩte kũla kwĩ ngombo ndĩkĩĩku na mbũĩ. Ve vata mũnene wa kũkunĩkĩla “maũndũ maliku ma Ngai.” (1 Ako. 2:10) Kwĩka ũu kũtũtonyethasya kwĩthĩwa na ũmanyi mwingangĩ ĩũlũ wa Ngai na kwĩthĩwa na ũtonyi wa kũsũanĩa. (Aevl. 5:14) Ĩngĩ, ethĩwa nĩtũkwĩmanyĩsya Ndeto ya Ngai kwa kĩthito, tũkeethĩwa ‘tũtonya kũmanyĩsya angĩ nao.’—2 Tim. 2:2.