MOSŨNGĨO MA MAKŨLYO MA MBIVILIA

Nĩkĩ Yesũ wĩtawa Mwana wa Ngai?

Ngai nĩwe Mũmbi wa syĩndũ syonthe na kwoou ndaĩ na vata wa kwĩthĩwa na kĩveti nĩ kana ethĩwe na syana. Andũ moombiwe me na ũtonyi wa kwĩthĩwa na ndaĩa ta sya Ngai. Nĩkyo kĩtumi mũndũ wa mbee, Atamu, weetiwe “[mwana] wa Ngai.” O ta ũu, Yesũ etawa “Mwana wa Ngai” nũndũ oombiwe e na ndaĩa ta sya Ĩthe wake.—Soma Luka 3:38; Yoana 1:14, 49.

Yesũ oombiwe ĩndĩĩ?

Ngai oombie Yesũ atambĩte kũmba Atamu. Amina kũmba Yesũ, Ngai nĩwamũtũmĩie kũmba alaĩka vamwe na syĩndũ ila ingĩ syonthe. Nĩkyo kĩtumi Mbivilia ĩmwĩtaa Yesũ “mũsyawa ũla wĩ mbee wa syũmbe syonthe” sya Ngai.—Soma Akolosai 1:15, 16.

Yesũ atanamba kũsyawa, ekalaa ĩtunĩ e mũlaĩka. Ĩvinda nĩyavikie na Ngai athamya thayũ wa Yesũ kuma ĩtunĩ na awĩkĩa ĩvunĩ ya Meli nĩ kana asyawe kũũ nthĩ e mũndũ.—Soma Luka 1:30-32; Yoana 6:38; 8:23.

Nĩkĩ Ngai wendaa Yesũ asyawe kũũ nthĩ? Yesũ eanĩisye kyaũ ĩla wookie kũũ nthĩ? Nũtonya kũkwata mosũngĩo ma makũlyo asu Mbivilianĩ. Mosũngĩo asu makongeleela ũmanyi waku na maituma ũmũtũngĩa Ngai na Yesũ mũvea kwondũ wa maũndũ ala makwĩkĩte.