KYONGO KYA ĨTHANGŨ YA MBEE: NĨVATONYEKA KEKALA WĨ NA ŨTANU
Yo Nĩvatonyeka Ũkekala wĩ na Ũtanu?
“Twĩkalaa thayũ myaka mĩongo mũonza, kana ũla wĩ na vinya ayĩkala myaka mĩongo nyanya. Ĩndĩ ũu wĩ o vo, myaka ĩsu yĩthĩawa yĩ ya thĩna na kĩĩo.”—Savuli 90:10, The Holy Bible in Current Kikamba Language.
NDETO isu nĩ sya wʼo ki! Kĩla mũndũ nĩwĩthĩawa na “thĩna na kĩĩo.” No wĩthĩwe waaĩkũlya, ‘Yo nĩvatonyeka mũndũ akekala e na ũtanu ũmũnthĩ?’
Kwasũanĩa ngelekanyʼo ya Maria. Ĩla Maria ũtaĩ mũkũũ, aĩ mũthangaau mũno. Ĩndĩ yu nĩwakũie weethĩa ndatonya kumaala nyũmba, nũndũ e na myaka 84. Kĩlĩko kyake kĩthũkũmaa nesa ĩndĩ mwĩĩ wake ndwĩ vinya. Maria atonya kwĩka ata nĩ kana ekale e na ũtanu?
We ũtonya kwĩka ata nĩ kana wĩthĩwe na ũtanu? Nũtonya kwĩthĩwa waaĩkũlya ũndũ we ũtonya kwĩka nĩ kana wĩthĩwe na ũtanu. No kwĩthĩwa ũtindĩaa kũtethya wĩa wĩ mĩnoo. O na ĩngĩ, no kwĩthĩwa wathũkũma vate mũndũ wonaa kĩthito kyaku. O na ethĩwa ũendeee nesa ũmũnthĩ nĩvatonyeka ũkethĩwa ũthĩnĩkĩaa kĩla kĩtonya kũũkwata ĩvinda yũkĩte. Mavinda angĩ no kwĩthĩwa wĩwʼaa ũkwʼĩte ngoo. Noĩthwa mũsyĩ waku wĩthĩawa na ithokoo. Nũtonya kwĩthĩwa ũnakwʼĩĩwe nĩ mũndũ waku. Mũndũũme ũmwe wĩtawa André nĩwamwendete ĩthe wake mũno, ĩndĩ ĩthe wake nĩwawaie na akwʼa. Ũndũ ũsu nĩwatumie André akũnĩka mũno na ũtumaa ewʼa atesa kũeka kũthĩnĩka.
O na twakwatwa nĩ thĩna mwaũ, ve ũndũ ũmwe twaĩlĩte kũmanya. Ũndũ ũsu nĩ ũũ: Yo nĩvatonyeka mũndũ akekala e na ũtanu? Nĩtũtonya kũkwata ũsũngĩo twasũanĩa ũndũ Yesũ wekalaa ĩla waĩ kũũ nthĩ myaka 2,000 mĩvĩtu. O na vala Yesũ nĩwakwatiwe nĩ mathĩna maingĩ, ĩvinda yonthe eethĩawa e na ũtanu. O naitũ no twĩkale twĩ na ũtanu tweeyĩelekanyʼa nake.