MOSŨNGĨO MA MAKŨLYO MA MBIVILIA
Nĩkĩ nthĩ ĩte na mũuo?
Ũsumbĩ ũla ũkaete mũuo no ũla ũtonya kũvĩndũa woni wa andũ ĩũlũ wa maũndũ ala maĩle, na kwenda andũ ala angĩ
Mbivilia nĩnenganĩte itumi ilĩ. Kĩtumi kya mbee nĩ kana o na kũtwʼĩka andũ nĩmekĩte maũndũ maingĩ manene, mayaaũmbwa matonya kũtongoesya matambya moo. Kĩtumi kya kelĩ nĩ kana mĩvango ya andũ ndyaĩlaa nũndũ “nthĩ yonthe ĩtwĩe nthĩnĩ wa ũla mũthũku,” Satani, nake nĩwe Ndevili. Nĩkyo kĩtumi o na kau andũ nĩmatatĩte kũmantha mũuo, nĩmaemetwe vyũ.—Soma Yelemia 10:23; 1 Yoana 5:19.
O na ĩngĩ andũ nĩmeyendete ene na nĩmendete monene na ũu nũtumĩte mũuo ũtethĩwa. Ũsumbĩ ũla ũkaete mũuo ĩũlũ wa nthĩ no ũla ũkethĩwa ũtonya kũmanyĩsya andũ kwenda maũndũ ala maĩle, na kwenda andũ ala angĩ.—Soma Isaia 32:17; 48:18, 22.
Nũũ ũla ũkaete mũuo ĩũlũ wa nthĩ?
Ngai Mwene Vinya Wʼonthe nĩwathanĩte kana akaũngamya ũsumbĩ ũla ũkasumbĩka andũ onthe. Ũsumbĩ ũsu ũkavetanga mosumbĩ ma andũ. (Ndanieli 2:44) Na Mwana wa Ngai, Yesũ, ũla nĩwe Mũnene wa Mũuo, nĩwe ũkethĩwa e Mũsumbĩ. Akavetanga ũthũku wʼonthe ĩũlũ wa nthĩ na aimanyĩsya andũ ũndũ matonya kwĩthĩwa na mũuo.—Soma Isaia 9:6, 7; 11:4, 9.
O na ũmũnthĩ, Yesũ atongoesye andũ milioni mbingĩ nthĩ yonthe ala matũmĩaa Ndeto ya Ngai, Mbivilia, kũmanyĩsya andũ angĩ ũndũ matonya kwĩthĩwa na mũuo. O mĩtũkĩ, nthĩ yonthe ĩkeethĩwa na mũuo.—Soma Isaia 2:3, 4; 54:13.