MOSŨNGĨO MA MAKŨLYO MA MBIVILIA

We Ngai nĩwĩthukĩĩasya mboya syonthe?

Ngai nĩwĩthukĩĩasya mboya sya andũ ma mbaĩ syonthe. (Savuli 145:18, 19) Ndeto yake Mbivilia ĩtũthangaasya tũmũtavye ũndũ o na wĩva ũla ũũtũthĩnyʼa. (Avilivi 4:6, 7) Ĩndĩ ve mboya itamwendeeasya Ngai. Kwa ngelekanyʼo, kũtũngĩlĩĩla mboya o ĩmwe ĩngĩ na ĩngĩ kũimwendeeasya.—Soma Mathayo 6:7.

O na ĩngĩ, Yeova ndendeeawʼa nĩ mboya sya andũ ala matũlaa mĩao yake na ngũlũ. (Nthimo 28:9) Kwa ngelekanyʼo, ĩvindanĩ ya andũ ala mawetetwe Mbivilianĩ, Ngai ndaaĩthukĩĩsya mboya sya Aisilaeli ala meekaa naĩ ya kũaana. Kwoou vai nzika kana ve maũndũ twaĩle kwĩanĩsya nĩ kenda Ngai ethukĩĩsye mboya sitũ.—Soma Isaia 1:15.

Twaĩle kwĩka ata nĩ kana Ngai ethukĩĩsye mboya sitũ?

Tũitonya kũmũvoya Ngai ethĩwa tũi na mũĩkĩĩo. (Yakovo 1:5, 6) No nginya tũĩkĩĩe kana we e vo na nũtũthĩnĩkĩaa. Tũtonya kũlũlũmĩĩlya mũĩkĩĩo witũ kwa kwĩmanyĩsya Mbivilia, nĩkwĩthĩwa maũndũ ala me Ndetonĩ ya Ngai nĩ ma wʼo na nĩmaĩkĩĩthĩtwʼe, na nĩmo matonya kũtuma mũndũ ethĩwa na mũĩkĩĩo wa wʼo.—Soma Aevelania 11:1, 6.

Twaĩle kũvoya kuma ngoonĩ na twĩ na wĩnyivyo. O na Mwana wa Ngai, Yesũ, avoyaa enyivĩtye. (Luka 22:41, 42) Kwoou vandũ va kũmwĩaĩa Ngai, twaĩle kũtata kũmanya kwenda kwake kwa kũsoma Mbivilia. Tweeka ũu, tũkeethĩwa tũtonya kũvoya kwosana na kwenda kwake.—Soma 1 Yoana 5:14.