Kyongo Kya Ĩthangũ Ya Mbee

Kĩkw’ũ Tikyo Mũthya Witũ!

Vethania yaĩ ndũa nini na yaĩ ũasa wa maili elĩ (kĩlomita 3) kuma Yelusaleme. (Yoana 11:18) Syumwa mbũthũ Yesũ atanamba kũawa, ve mũisyo weekĩkie ndũanĩ ĩsu ya Vethania. Mũndũ ũmwe weetawa Lasalo waĩ ndũũ mũno na Yesũ, nĩwawaie mũno na akw’a.

Ĩla Yesũ wakwatie ũvoo wa kĩkw’ũ kya Lasalo, eeie amanyĩw’a make kana Lasalo nũkomete na kwoou eenda kũthi akamũamũkye. (Yoana 11:11) Ĩndĩ amanyĩw’a asu mayaakwatya kĩla wamatavasya, na kwoou Yesũ amea sanzũ atĩĩ: “Lasalo nĩ mũkw’ũ.”—Yoana 11:14.

Yesũ avikie Vethania mĩthenya ĩna ĩtina wa Lasalo kũthikwa, na athi kũmũkiakisya Matha, mwĩĩtu-a-inyia wa Lasalo. Ĩndĩ ĩla Matha wamwonie Yesũ, amwĩie: “Kethĩwa ũnaĩ kũũ, mwana-a-ia ndakw’a.” (Yoana 11:17, 21) Nake Yesũ amũsũngĩa amwĩa: “Ninyie ũthayũũkyo, na ninyie thayũ: ũla ũmbĩtĩkĩlaa, o na ethĩwa nũnũũkw’a, akeethĩwa na thayũ.”—Yoana 11:25.

Nĩ kana Yesũ aĩkĩĩthye andũ ala maĩ vau kana ndeekaa o kũvũa mũnuka, nĩwathengeeie vala Lasalo wathikĩtwe na aneena na wasya mũnene akyasya: “Lasalo, umaala.” (Yoana 11:43) Na ĩndĩ Lasalo aumaala, ũndũ ũla waseng’isye mũno andũ asu masyaĩĩsye.

Mbeenĩ, Yesũ aĩ anathayũũkya andũ elĩ. Kwa ngelekany’o, nĩwathayũũkĩtye kamwĩlĩtu ka Yailu. Atanamba kũkathayũũkya, eeie andũ ala maĩ vau kana kekĩte kũkoma.—Luka 8:52.

Nĩwoona kana ĩla Yesũ waneenaa ĩũlũ wa kĩkw’ũ kya Lasalo na kya kamwĩlĩtu ka Yailu aelekanilye kĩkw’ũ na too? Ĩndĩ nĩkĩ kĩkw’ũ kĩtonya kũelekanw’a na too? Mũndũ ũkomete ndethĩawa ayĩyĩw’a, na kwoou kũkoma no kũelekanw’e na mũndũ ũtekwĩw’a woo kana kũthĩna. (Mũtavan’ya 9:5; sisya ĩsandũkũ, “Kũkw’a no Ũndũ Ũmwe na Kũkoma Too Mũito.”) Amanyĩw’a ma mbee ma Yesũ nĩmaeleetwe nesa maũndũ onthe ĩũlũ wa kĩkw’ũ. Ĩvuku yĩmwe yaĩtye: “Aatĩĩi ma Yesũ nĩmeesĩ kana kĩkw’ũ no ũndũ ũmwe na too, na mbũa yaĩ ta vandũ va kũthũmũa . . . kwondũ wa ala makwie me mũĩkĩĩonĩ.”a—Encyclopedia of Religion and Ethics.

Kũmanya kana akw’ũ mekĩte o kũkoma mbũanĩ na maiũthĩna, nĩkũtũkiakiasya mũno. Na kũmanya ũw’o ũsu ĩũlũ wa akw’ũ, kũtumaa twĩkala tũte na wia mwingĩ.

“ETHĨWA MŨNDŨ AKAKW’A, AKEETHĨWA THAYŨ ĨNGĨ?”

O na kau nĩtũtanĩaa kũkoma ũtukũ, yo ve mũndũ wenda kũkoma tene na tene? Na nĩvethĩwa ve wĩkwatyo wa kwĩsa kwona ala makomete mbũanĩ, o tondũ Lasalo na kamwĩlĩtu ka Yailu mathayũũkiw’e?

Mũthũkũmi wa Ngai wa tene weetawa Yovu nĩweekũlilye ĩkũlyo ta yĩu ĩla weewie ta wangĩĩe kũkw’a. Ekũlilye: “Ethĩwa mũndũ akakw’a, akeethĩwa thayũ ĩngĩ?”—Yovu 14:14.

Yovu nĩwesũngĩie ĩkũlyo yake. Aisye ũũ akĩneena na Ngai Mwene Vinya W’onthe: “Naku wĩthĩwa wĩtana, nakwa ngakwĩtĩka: Ũkeethĩwa na mea ma wĩa wa moko maku.” (Yovu 14:15) Yovu ndaĩ na nzika o na vanini kana Yeova e na mea ma kũthayũũkya athaithi make aĩkĩĩku. We Yovu ekwatasya kĩndũ kĩtesa kwĩanĩa? Ũu ti w’o o na vanini.

Ĩla Yesũ wathayũũkisye andũ, nĩwaĩkĩĩthisye nesa vyũ kana Ngai nũmũnengete vinya wa kũmina kĩkw’ũ. Nĩkyo kĩtumi Mbivilia yaĩtye kana Yesũ nĩwe wĩ na “mbungũo sya kĩkw’ũ.” (Ũvuan’yo 1:18) Kwoou o tondũ Yesũ wamũthayũũkisye Lasalo, now’o ũkathayũũkya ala makwie.

Mbivilia nĩwetete mavinda maingĩ ĩũlũ wa wĩkwatyo wa ũthayũũkyo. Kwa ngelekany’o, mũlaĩka ũmwe amwathie Ndanieli ũũ: “Nũkathũmũa, na kũũngama kĩandanĩ kyaku, mũminũkĩlyo wa mĩthenya.” (Ndanieli 12:13) Namo Asatukai, ala mataĩkĩĩaa kana kwĩ ũthayũũkyo, meeiwe ũũ nĩ Yesũ: “Nĩmũkũvĩtya, nĩkwĩthĩwa mũtyĩsĩ maandĩko, o na vinya wa Ngai.” (Mathayo 22:23, 29) Nake mũtũmwa Vaulo aisye: “Nĩ na wĩkwatyo kwa Ngai, . . . kana kũkeethĩwa ũthayũũkyo wa ala alũngalu, na ala mate alũngalu nao.”—Meko ma Atũmwa 24:15.

AKW’Ũ MAKATHAYŨŨKW’A ĨNDĨĨ?

Nĩ ĩndĩĩ ala alũngalu vamwe na ala mate alũngalu makathayũũkw’a? Ũla mũlaĩka eeie Ndanieli kana akathayũũkw’a ‘mũminũkĩlyonĩ wa mĩthenya.’ O ta ũu, Matha nake nĩweesĩ nesa kana mwana-a-inyia Lasalo “akathayũũka ũthayũũkyonĩ wa mũthenya wa mũminũkĩlyo.”—Yoana 11:24.

Mbivilia ĩwetanĩasya “mũthenya wa mũminũkĩlyo” na kũsumbĩka kwa Klĩsto. Vaulo aandĩkie ũũ: “Mũvaka [Klĩsto] asumbĩke e we, kũvika yĩla [Ngai] ũkamaia amaitha onthe ungu wa nyaĩĩ syake. Mũmaitha wa mũminũkĩlyo ũla ũkanangwa nĩ kĩkw’ũ.” (1 Akolintho 15:25, 26) Kyu nĩ kĩtumi kĩseo mũno kyaĩle kũtuma twenda kũvoya Ũsumbĩ wa Ngai wũke, na kwenda kwake kwĩkwe kũũ nthĩ.b

Kwenda kwa Ngai nĩ andũ ala makwie mathayũũkw’e. Yovu ndaĩ na nzika na ũndũ ũsu. Ĩla mũthenya wa ũthayũũkyo wĩvika, kĩkw’ũ kĩkavetwa vyũ. Na kuma mũthenya ũsu, vai mũndũ ũkekũlya: ‘Kĩkw’ũ nĩkyo mũthya witũ?’

[Maelesyo]

[Ũvoo ĩũlũ wa visa ĩthangũnĩ ya 5]

Kũkw’a no Ũndũ Ũmwe na Kũkoma Too Mũito

“Ĩkĩa metho makwa kyeni, ndikakome too wa kĩkw’ũ.”—Savuli 13:3.

“Ĩtina amea, Lasalo ũla mũnyanyae waitũ nũkomete; ĩndĩ nĩngũthi ngamũamũkye. Na ĩndĩ amanyĩw’a make mamwĩa, Mwĩaĩi, ethĩwa nũkomete, akavoa. Ĩndĩ Yesũ aneenaa ũndũ wa kĩkw’ũ kyake.” —Yoana 11:11-13.

“Nĩkwĩthĩwa Ndaviti, athũkũmĩte ũtw’ĩo wa Ngai ũsyaonĩ wa ĩvinda yake, nĩwakomie.”—Meko ma Atũmwa 13:36.

“Klĩsto nĩwathayũũkiw’e kuma kwa akw’ũ, ũsyao wa mbee wa ala makomete.” —1 Akolintho 15:20.

“Tũikwenda mũlee kũmanya ũvoo wa ala makomaa; nĩ kana mũtikethĩwe na kĩmako, ta ala angĩ mate na wĩkwatyo.” —1 Athesalonika 4:13.

[Ũvoo ĩũlũ wa visa ĩthangũnĩ ya 6]

Akw’ũ Makathayũũkw’a

“Akw’ũ maku makeethĩwa thayũ; simba syakwa ikookĩla. Amũkai mwine.”—Isaia 26:19.

“Aingĩ ma ala makomaa kĩtoonĩ kya nthĩ nĩmakaamũka.”—Ndanieli 12:2.

“Saa nĩwũkĩte, yĩla onthe ala me mbũanĩ makew’a wasya wake, namo makauma.” —Yoana 5:28, 29.