Nĩkĩ Andũ Mavoyaa?

We nũvoyaa kĩla ĩvinda? Andũ aingĩ nĩmavoyaa kĩla ĩvinda. O na amwe matetĩkĩlaa kana kwĩ Ngai nĩmavoyaa. Ĩndĩ nĩkĩ andũ mavoyaa? Kwosana na ũkunĩkĩli ũmwe weekiwe nthĩ ya France, nusu ya andũ ma nthĩ ĩsu nĩmavoyaa kana makasũanĩa mũno ũndũ mũna mavinda kwa mavinda nĩ kana “o mew’e meanĩwa.” O ta andũ aingĩ ma Europe, andũ asu ma France mayonaa mboya ta ĩkonanĩtye na kũmũthaitha Ngai. Vandũ va ũu, mavoyaa nũndũ “mboya ĩtumaa mũndũ ew’a ausya.” Namo athaithi angĩ mavoyaa o ĩla kwaia, na ũyĩthĩa meenda Ngai eanĩsye vata woo mĩtũkĩ ũndũ vatonyeka.—Isaia 26:16.

Nao nata we? We wonaa mboya o ta kĩndũ kya kũũtetheesya ũole mesilya? Ethĩwa nũmũĩkĩĩaa Ngai, we nĩwonaa mboya ĩikũtethya? Kana wonaa mavinda onthe mboya syaku ta itasũngĩawa? O na kau andũ amwe monaa mboya no nzĩa ya ũkũtetheesya wĩw’e wĩ mwĩanĩe, Mbivilia no ĩũtetheesye wone ũndũ mboya ĩtonya kũũtethya wĩthĩwe na ngwatanĩo nzeo na Ngai.