Nĩkĩ Waĩle Kũvoya?

Nũtonya kwĩkũlya atĩĩ: ‘Ethĩwa Ngai nĩwĩsĩ kĩla kĩndũ, o na nĩwĩsĩ mesilya makwa na mavata makwa, ve vata mwaũ wa kũvoya?’ Yĩu ti ĩkũlyo ĩthũku. Nĩkĩ? Nũndũ o na Yesũ nĩwaisye kana Ngai ‘nĩwĩsĩ ila twĩ na vata nasyo, mbee wa ithyĩ tũtanamũvoya.’ (Mathayo 6:8) O nake Mũsumbĩ Ndaviti nĩweesĩ ũu nũndũ aisye: “Vati ndeto ũĩmĩnĩ wakwa, ũtamĩsĩ vyũ, ame Yeova.” (Savuli 139:4) Kwoou nĩkĩ twaĩle kũvoya? Nĩ kana tũkwate ũsũngĩo wa ĩkũlyo yĩu, ekai tũsũanĩe ũndũ Mbivilia ĩwetete ĩũlũ wa mboya ila athũkũmi ma Ngai mavoyaa.a

MBOYA NĨTUMAA TŨMŨTHENGEEA NGAI

O na kau Mbivilia yaasya vai kĩndũ Yeovab Ngai ũtesĩ, ũu ti kwasya kana ethĩawa ayenda o kũmanya ĩũlũ wa athũkũmi make. (Savuli 139:6; Alomi 11:33) O na kau we ndolawa nĩ ũndũ o na ũmwe, we ndailyĩ ta kombiũta, ĩla yĩkaa o kwia ũvoo ĩũlũ wa andũ ĩteũmathĩnĩkĩa. Vandũ va ũu, Ngai nĩwendaa mũno kũelewa kĩla tũũsũanĩa nũndũ endaa twĩthĩwe na ũnyanya mũseo nake. (Savuli 139:23, 24; Yakovo 4:8) Kyu nĩkyo kĩtumi Yesũ watwĩkĩie vinya tũvoyae o na kũtw’ĩka Ĩthe wake nĩwĩsĩ vyũ mavata maitũ. (Mathayo 6:6-8) O ũndũ twaendeea kũtavya Mũmbi witũ maũndũ ala me ngoonĩ sitũ, now’o tũendeeaa kwĩthĩwa na ũnyanya mũseo vamwe nake.

Mavinda amwe ĩla tũũvoya nĩtũtonya kũemwa nĩ kũweta kĩla tũkwenda. Mavinda ta asu, Ngai no asisye ngoo sitũ akamanya maũndũ asu tũkũemwa nĩ kũmũtavya, na nũndũ nũtwĩsĩ vyũ, aitwĩanĩĩsya nesa vata ũla twĩ naw’o. (Alomi 8:26, 27; Aeveso 3:20) Ĩla Ngai watũtetheesya, o na ethĩwa nĩ kwa nzĩa yĩvithanĩtye, nĩtwĩw’aa ũnyanya witũ vamwe nake walũlũmĩĩla.

WE NGAI ASŨNGĨAA MBOYA SYONTHE?

O na kau Mbivilia nĩtũĩkĩĩthĩtye vyũ kana Ngai Mwene Vinya W’onthe nũsũngĩaa mboya sya ala mamũthũkũmaa me aĩkĩĩku, nĩsyokete ĩkatũtavya kĩla kĩtumaa alea kwĩthukĩĩsya mboya imwe. Kwa ngelekany’o, ĩvinda yĩla Aisilaeli aingĩ maĩ ang’endu mũno, Ngai nĩwatũmie mwathani wake Isaia amatavye atĩĩ: “Yĩla mwĩvoya mboya mbingĩ, ndikethukĩĩsya: moko menyu nĩmausũĩte nthakame.” (Isaia 1:15) Vate nzika, Ngai ndesa kwĩthukĩĩsya ala mavũthasya mĩao yake, kana ala mavoyaa me na kĩeleelo kĩthũku.—Nthimo 28:9; Yakovo 4:3.

Ĩndĩ Mbivilia yaĩtye ũũ: “Ethĩwa tũkavoya ũndũ kwĩanana na kwenda kwake, nũtwĩw’aa.” (1 Yoana 5:14) Ĩndĩ ũu nĩ kwasya mavinda onthe Ngai anengae athaithi make o kyonthe kĩla meetya? Ti lasima. Kwasũanĩa ĩũlũ wa mũtũmwa Vaulo. Amwĩsũvie Ngai katatũ amũvetee “mwĩw’a mwĩĩnĩ.” (2 Akolintho 12:7, 8) No kwĩthĩwa Vaulo atindĩaa kũthĩnw’a nĩ metho. Ũndũ ũsu no nginya wĩthĩwe watumaa akw’a ngoo mũno. Nĩkĩ? Kĩtumi nũndũ nĩwanengetwe vinya wa kũvosya, o na ĩvinda yĩmwe nĩwathayũũkisye mũndũ. Ĩndĩ ĩla we mwene wakwatiwe nĩ thĩna ũsu, yaĩ no nginya omĩĩsye. (Meko ma Atũmwa 19:11, 12; 20:9, 10) O na kau Vaulo ndaasũngĩwa mboya syake ũndũ we mwene wendaa, nĩweetĩkĩlile vyũ ũtethyo ũla Ngai wamũnengie.—2 Akolintho 12:9, 10.

Nĩ w’o kana andũ amwe mawetetwe Mbivilianĩ nĩmasũngĩiwe mboya syoo na kyama. (2 Asumbĩ 20:1-7) Ĩndĩ no andũ avũthũ ivindanĩ yĩu masũngĩawa na kyama. Athũkũmi amwe ma tene ma Ngai nĩmathĩnĩkaa mũno mesa kwona Ngai ta ũtaamethukĩĩsya. Mũsumbĩ Ndaviti akũlilye ũũ mboyanĩ: “Nĩ kũvika ĩndĩĩ, ame Yeova? ũkoolwa ninyie kũvika tene na tene?” (Savuli 13:1) Ĩndĩ ĩla Ndaviti walilikanile ũndũ mavinda ala Yeova wamũtethetye maingĩvĩte, nĩweewie mũĩkĩĩo wake walũlũmĩĩla. Ndaviti aendeeie kũvoya akyasya: “Nĩnaĩkĩĩe ũseo waku wĩ wendo.” (Savuli 13:5) O ta Ndaviti, nĩvatonyeka ũmũnthĩ ũkethĩa athaithi amwe ma Ngai no maendeeie kũvoya nginya ĩla makona Ngai asũngĩa mboya syoo.—Alomi 12:12.

ŨNDŨ NGAI ŨSŨNGĨAA MBOYA

Ngai nũtwĩanĩasya maũndũ ala twĩ na vata mũno namo.

Ti mavinda onthe asyai ala mendete syana syoo mainengae kyonthe kĩla syeetya, ĩvinda yĩla syeetya. Mayĩka ũu methĩawa na kĩtumi kĩseo. O ta ũu, Ngai nũtonya kũlea kũsũngĩa mboya sitũ kwosana na ũndũ tũkwenda, kana ĩvindanĩ yĩla tũkwendaa. Ĩndĩ no twĩthĩwe na mũĩkĩĩo kana, o tondũ mũsyai wendete syana syake wĩkaa, Mũmbi witũ ndalea kũtwĩanĩĩsya maũndũ ala twĩ na vata mũno namo ĩvindanĩ yĩla yaĩle, na kwa nzĩa ĩla yaĩle.—Luka 11:11-13.

Ngai no asũngĩe mboya sitũ kwa nzĩa yĩvithanĩtye.

Ĩndĩ nao nata ethĩwa twĩvoya tũvetewe thĩna twĩthĩĩtwe naw’o kwa ĩvinda ĩasa? Yo nĩtwaĩle kwasya kana Ngai nũemete kũtũsũngĩa nĩkwĩthĩwa atĩ tũinona aiveta thĩna ũsu mĩtũkĩ mũno? Tũyaĩle kũsũanĩa ũu. Vandũ va ũu, nũseo tũkasisya nesa twone ethĩwa Ngai nĩwĩthĩwa atũtethetye kwa nzĩa syĩvithanĩtye. Kwa ngelekany’o, no kwĩthĩwa mũnyanyae witũ ũtwendete aneekie ũndũ ũtonya nĩ kana atũtetheesye ĩvindanĩ yĩla thĩna ũnatũkwete mũno. (Nthimo 17:17) Nĩ ũndũ ũtonyeka ũkethĩa Yeova nĩwe ũnatumie mũnyanyae ũsu witũ oka kũtwĩtaana. O na eka ũu, Ngai nũtonya kũtũmĩa Mbivilia asũngĩe mboya sitũ. Mbivilia no ĩtũtetheesye tũmanye ũndũ tũtonya kũmĩĩsya thĩna ũla twĩ naw’o.—2 Timotheo 3:16, 17.

Mavinda maingĩ Ngai no alee kũtũvetea thĩna ũla twĩ naw’o, na vandũ va ũu aitũnenga vinya wa kũmĩĩsya. (2 Akolintho 4:7) Kwa ngelekany’o, mũthenya ũmwe Yesũ aĩ na thĩna woonaa ta ũtonya kũtuma ĩsyĩtwa ya Ĩthe wake yĩvũthw’a, na kwondũ wa ũu nĩwamwĩsũvie Yeova amũvetee thĩna ũsu. Ĩndĩ vandũ va kũmũvetea ũ thĩna, amũtũmĩie mũlaĩka amwĩkĩe vinya. (Luka 22:42, 43) O ta ũu, Ngai nũtonya kũtũmĩa mũndũ twĩ ndũũ mũno atwĩkĩe vinya ĩvindanĩ yĩla tũkwĩw’a tũkw’ĩte ngoo vyũ. (Nthimo 12:25) Nũndũ nzĩa ĩsu nĩtonya kwĩthĩwa yĩvithanĩtye, twaĩle kwĩthĩawa twĩ metho mũno twone ũndũ Ngai wĩthĩwa asũngĩaa mboya sitũ.

Ngai asũngĩaa mboya imwe ĩvinda yĩla yaĩle yavika.

Mbivilia yaĩtye kana Ngai Mwene Vinya W’onthe nĩwĩkaa ala auu nesa “ĩvinda yeanĩa.” (1 Vetelo 5:6) Kwoou ĩla twamũvoya Ngai kuma ngoonĩ na tũyona ateũtũsũngĩa mĩtũkĩ ũndũ tũkwenda, tũyaĩle kwona ta ũteũtũũnga. Ĩndĩ nũndũ Mũmbi witũ nũtwendete na nĩwĩsĩ maũndũ maingĩ mũno kwĩ ithyĩ, nũthianaa mboya sitũ na aitũsũngĩa kwosana na ũndũ ũtwĩsĩ.

Kwasũanĩa ngelekany’o ĩno: Twasye wĩ na kamwana kekwenda ũkathooee kasululu. We wĩona ta ũkathooea mĩtũkĩ ũteũsũanĩa? Woona kateanĩĩe kũtwaa kĩsululu, no ũlee ũkathooea, ĩndĩ ũyĩsa ũkathooea ĩvinda yĩla yaĩle yavika. Ũu now’o Ngai wĩkaa. Twaendeea kũvoya, no ese kũtũnenga ‘kĩla tũvoyete na ngoo yitũ’ ĩvinda yĩla yaĩle yavika.—Savuli 37:4.

NDŨKETHĨWE NA NZIKA KANA YEOVA NĨWĨTHUKĨĨASYA MBOYA

Mbivilia nĩthangaasya Aklĩsto maikatate kũvũthĩĩsya vata wa mboya. Ĩndĩ andũ amwe meew’a ũu nĩmatonya kwasya, ‘Isu no ngewa.’ Nĩ w’o, nĩtũtonya kwĩw’a ne ũndũ wĩ vinya kweteela Ngai atũsũngĩe ethĩwa twĩthĩĩtwe na thĩna mũna kwa ĩvinda ĩasa. Ĩndĩ o na vailyĩ ũu, nũseo tũkalilikanaa kĩla Yesũ wamanyĩisye ĩũlũ wa kũvoya tũteũleela.

Ĩvinda yĩmwe Yesũ nĩwanenganie ngelekany’o ya mũndũ mũka ũmwe waĩ ndiwa na ngya, ũla watindaa aendete kwa mũsili mũna ũtaĩ mũseo amũtwaĩe ĩkoani. (Luka 18:1-3) O na kau ya mbee mũsili ũsu nĩwaleaa kũtetheesya mũndũ mũka ũsu, esie kwĩsilya ũũ: “Nĩngũmũĩvanĩsya, ndakanosye akĩndokeanga mĩthenya yonthe.” (Luka 18:4, 5) Kwosana na kĩthyomo kya tene kĩla kyatũmĩiwe kũandĩka mũsoa ũsu, mũsili ũsu esie kwĩthukĩĩsya ĩla ndiwa nĩ kana ĩeke “[kũmũkũna] ĩtheo wa itho,” kana kwa ndeto ingĩ, ndĩkese “kwananga ĩsyĩtwa [yake].”c Ethĩwa mũsili ũsu ũte mũseo nĩwatetheeisye mũndũ mũka ũsu ngya aimena kwanangĩwa ĩsyĩtwa, nĩ mbee veana ata Ngai witũ ũla wĩthĩawa atwendete anenge “ala mamũĩĩa mũthenya na ũtukũ” kĩla kĩmaĩle! O tondũ Yesũ waisye, Ngai “akamaĩvanĩsya mĩtũkĩ.”—Luka 18:6-8.

O na kau mavinda amwe nĩtũtonya kwĩw’a tũinoa nũndũ wa kũvoya ũndũ mũna ĩngĩ na ĩngĩ, tũyaĩle kũkw’a ngoo. Ĩla twaendeea kũvoya tũteũleela, twĩthĩawa tũimũĩkĩĩthya Ngai kana nĩtũkwenda vyũ kwona aitũtethya. O na ĩngĩ, kũlũma mboyanĩ nĩkũtumaa twona ũndũ Ngai ũsũngĩaa mboya sitũ, na nũndũ wa ũu ũnyanya witũ nake nũlũlũmĩĩlaa. Vate nzika, no twĩthĩwe na mũĩkĩĩo kana Yeova akasũngĩaa mboya sitũ, ethĩwa tũkamũvoyaa na mũĩkĩĩo.—Luka 11:9.