MOSŨNGĨO MA MAKŨLYO MA MBIVILIA

Nũũ ũla ũsumbĩkĩte nthĩ?

Andũ aingĩ maĩkĩĩaa kana Ngai nĩwe ũsumbĩkĩte nthĩ ĩno. Ĩndĩ takethĩwa ũu nĩ w’o, nthĩ ĩno no yĩthĩwe yusũĩte mathĩna? (Kũtũngĩlĩlwa Kwa Mĩao 32:4, 5) Mbivilia ĩmanyĩasya kana nthĩ ĩno ĩsumbĩkĩtwe nĩ kyũmbe kĩthũku.—Soma 1 Yoana 5:19.

Kweekĩkie ata nĩ kana kyũmbe kĩu kĩthũku kĩsumbĩke andũ? Kuma ĩla andũ ma mbee moombiwe, mũlaĩka ũmwe nĩwaleile kũmwĩw’a Ngai na athing’ĩĩsya andũ asu o namo maikamwĩw’e. (Mwambĩlĩlyo 3:1-6) Andũ asu elĩ nĩmatwie kũmwĩw’a mũlaĩka ũsu ũla nĩ Satani, na eethĩwa e mũsumbĩ woo. O na kau Ngai Mwene Vinya W’onthe nĩwe waĩle kũsumbĩka, we endaa andũ manyuve kũsumbĩkwa nĩwe nũndũ nĩmamwendete. (Kũtũngĩlĩlwa Kwa Mĩao 6:6; 30:16, 19) Ĩndĩ ũndũ wa kũmakya nĩ kana andũ aingĩ nĩmaĩtw’e nĩ Satani, na makanyuva kũsumbĩkwa nĩwe o tondũ ala andũ elĩ ma mbee meekie.—Soma Ũvuan’yo 12:9.

Nũũ ũla ũkaminĩa andũ mathĩna?

We Ngai eeka Satani aendee kũsumbĩka andũ naĩ wĩana ũu? Aiee! Ngai akatũmĩa Yesũ kwananga ũthũku ũla Satani ũetete.—Soma 1 Yoana 3:8.

Yesũ akatũmĩa vinya ũla ũkethĩwa anengetwe nĩ Ngai kwananga Satani. (Alomi 16:20) Ĩtina wa ũu, Ngai akasumbĩka andũ onthe na aitũngĩĩa ũtanu na mũuo o tondũ wendaa kuma tene.—Soma Ũvuan’yo 21:3-5.