Nĩkĩ Waĩle Kwenda Ũsumbĩ wa Ngai?

Andũ aingĩ mũno ĩũlũ wa nthĩ nĩmaĩkĩĩaa kana vai kĩndũ kĩngĩ kĩtonya kũmatethya eka Ũsumbĩ wa Ngai. Maatĩĩaa ngelekany’o ya Yesũ, ũla wamanyĩisye aatĩĩi make kũvoyaa atĩĩ: “Ũsumbĩ waku wũke. Kwenda kwaku kwĩke kũũ nthĩ.”—Mathayo 6:10.

Ĩndĩ ũndũ wa kũsengy’a nĩ kana o na kau andũ aingĩ nĩmendete mũno Ũsumbĩ wa Ngai, ndĩni mbingĩ iitavanasya ĩũlũ wa Ũsumbĩ ũsu. Mũsomi ũmwe weetawa H. G. Wells nĩwaneeneie ũndũ ũsu. Aisye kana nĩ ũsengy’o mũno kwona Ũsumbĩ wa Ngai ‘ũteũwetwa o na vanini nĩ makanisa maingĩ ma Kĩklĩsto ĩla meũmanyĩsya andũ,’ nake ũ Yesũ mwene “atavanasya mũno vyũ . . . ĩũlũ wa kĩla wakĩtaa Ũsumbĩ wa Ĩtu.”

Kĩvathũkany’o na makanisa asu, Ngũsĩ sya Yeova nitavanasya mũno ĩũlũ wa Ũsumbĩ wa Ngai. Kwa ngelekany’o, ĩkaseti yĩĩ ũũsoma nĩyo tũtũmĩaa mũno, na yĩtumbĩthaw’a kwa ithyomo 220. Kĩla mwei ĩkaseti yĩĩ yĩtumbĩthaw’a kovi vakuvĩ milioni 46. Vai ĩkaseti yĩngĩ o na yĩva ĩũlũ wa nthĩ yĩtumbĩthaw’a mũno wĩana ũu. Na nĩwĩsĩ ĩkaseti yĩĩ yĩneeneaa ũvoo wĩva? Kwasisya kyongo kyayo. Yĩtawa, Mũsyaĩĩsya Yĩtavanasya Ũsumbĩ wa Yeova.a

Nĩkĩ Ngũsĩ sya Yeova itavanasya mũno ĩũlũ wa Ũsumbĩ wa Ngai? Kĩtumi kya mbee nũndũ tũĩkĩĩaa kana Ũsumbĩ wa Ngai nĩw’o ũvoo ũla ũneenewe mũno nthĩnĩ wa ĩvuku yĩla ya vata vyũ ĩũlũ wa nthĩ, nayo nĩ Mbivilia. Ũndũ ũngĩ nĩ kana tũĩkĩĩaa Ũsumbĩ wa Ngai wĩ w’oka nĩw’o ũkavetea andũ mathĩna.

Nũndũ Ngũsĩ sya Yeova syendaa kũatĩĩa ngelekany’o ya Yesũ, itavanasya mũno ĩũlũ wa Ũsumbĩ wa Ngai. Ĩla Yesũ waĩ kũũ nthĩ, Ũsumbĩ ũsu nĩw’o waĩ wa vata vyũ kwake, na nĩwatavanasya ĩũlũ waw’o mũno. (Luka 4:43) Nĩkĩ Yesũ wendete Ũsumbĩ ũsu mũno wĩana ũu? Naw’o ũtonya kũũtethya ata? Twĩkwĩkĩa vinya ũsome ilungu ila iatĩĩe nĩ kana wone ũndũ Mbivilia ĩsũngĩĩte makũlyo asu.