Ũsumbĩ wa Ngai Nĩ wa Vata kwa Yesũ

O tondũ kĩlungu kĩla kĩ ĩtina wa kĩĩ kĩwetete, ũndũ ũla Yesũ woonaa wĩ wa vata vyũ thayũnĩ wake waĩ kwĩkala “akĩtavan’ya na kũnyaĩĩkya ũvoo mũseo wa ũsumbĩ.” (Luka 8:1) Aĩ na kĩthito kingĩ mũno nthĩnĩ wa wĩa wake wa ũtavany’a. Athyũũkie mũno nthĩ ya Isilaeli aimanyĩsya andũ ĩũlũ wa Ũsumbĩ wa Ngai. Ũthũkũmi ũsu wa Yesũ ũandĩkĩtwe ala mavukunĩ ana ma Ũvoo Mũseo, na mavukunĩ asu Ũsumbĩ ũneenewe mbee wa mavinda 100. Mavinda ala maingĩ katĩ wa asu 100, Yesũ nĩwe ũwetete Ũsumbĩ ũsu. Ĩndĩ no nginya mavinda ala Yesũ waaweta ĩũlũ wa Ũsumbĩ wa Ngai ĩla waĩ kũũ nthĩ makethĩwa me maingĩ vyũ o na kũthonoka asu!—Yoana 21:25.

Nĩkĩ we Yesũ wendete Ũsumbĩ ũsu mũno ĩla waĩ kũũ nthĩ? Ũndũ ũmwe nĩ kana nĩweesĩ Ngai nĩwamũnyuvĩte esumbĩka Ũsumbĩnĩ ũsu. (Isaia 9:6; Luka 22:28-30) Ĩndĩ kĩeleelo kya Yesũ kĩyaĩ kũkwata ũkũmũ kana nguma. (Mathayo 11:29; Maliko 10:17, 18) We ndaĩ na vata mũno na Ũsumbĩ ũsu nĩkwĩthĩwa atĩ nĩweesĩ ũkamũuna. Kuma ĩvinda yĩu kũvika o na ũmũnthĩ Yesũ no wendete Ũsumbĩ wa Ngai.a Nĩkĩ? Nũndũ nĩwĩsĩ Ĩthe akatũmĩa Ũsumbĩ ũsu, naw’o ndũkaema kũtethya aatĩĩi make aĩkĩĩku.

ĨTHE WA YESŨ AKATŨMĨA ŨSUMBĨ ATA?

Yesũ nĩwendete Ĩthe wake mũno. (Nthimo 8:30; Yoana 14:31) Amwendete nũndũ e nguma nzeo ki ta tei, wendo, na ũsili wa katĩ. (Kũtũngĩlĩlwa Kwa Mĩao 32:4; Isaia 49:15; 1 Yoana 4:8) Nũndũ wa ũu, Yesũ nũmenete vyũ kwĩw’a Ĩthe aineenewa ũvũngũ. Kwa ngelekany’o, ndew’aa mũyo ĩla andũ mekwasya kana Ngai ndalũnganaa na andũ ĩla meũthĩna, na kana nĩwe ũtumaa tũthĩna. Kĩu nĩkyo kĩtumi Yesũ wendete mũno kũtavany’a “ũvoo mũseo wa ũsumbĩ.” Nĩweesĩ Ĩthe wake akatũmĩa Ũsumbĩ ũsu kũthesya ĩsyĩtwa yake. (Mathayo 4:23; 6:9, 10) Akeeka ũu ata?

Yeova akatũmĩa Ũsumbĩ ũsu eke moalyũku manene nĩ kana atethye andũ. “Akavyaĩa methoi onthe” ala andũ alũngalu metĩkasya. Na eka ũu, akaveta kyonthe kĩla kĩtumaa andũ maĩa. Aĩtye kana “kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo.” (Ũvuan’yo 21:3, 4) Ngai akatũmĩa Ũsumbĩ ũsu kũvetanga mathĩna vyũ.b

Kwoou nũkwona nĩkĩ Yesũ waĩ na mea ma kũtavya andũ ĩũlũ wa Ũsumbĩ ũsu? Nĩweesĩ nesa Ĩthe wake akatũmĩa Ũsumbĩ ũsu nĩ kenda aĩkĩĩthye andũ kana e tei na ũtonyi mwingĩ. (Yakovo 5:11) O na ĩngĩ nĩweesĩ kana andũ ala alũngalu makatethw’a mũno nĩ Ũsumbĩ ũsu.

ŨSUMBĨ ŨKAMATETHYA ATA ALA ALŨNGALU?

Tene tene, tene mũno Yesũ atanoka kũũ nthĩ ekalaa na Ĩthe ĩtunĩ. Ngai amũtũmĩie Yesũ ta mũtetheesya ĩla woombaa syĩndũ ila ingĩ syonthe. Syĩndũ imwe syoombiwe nĩ ta matu manake mũno, na ndata mbingĩ ite ĩsavu na nthĩ ĩno mbanake, o na vamwe na nyamũ. (Akolosai 1:15, 16) Ĩndĩ o na kau nĩweekie maũndũ asu onthe, ‘endeeiw’e’ mũno nĩ andũ.—Nthimo 8:31, The Holy Bible in Current Kikamba Language.

Ĩla Yesũ watavanasya nĩwoonanisye nesa kana nĩwendete andũ mũno. Kuma o mũthenya ũla wambĩĩe kũtavany’a, awetie kana ookie kũtavya ngya “ũvoo mũseo.” (Luka 4:18) Ĩndĩ ndeekaa o kũvũa mũnuka. Mavinda maingĩ nĩwoosaa ĩtambya akeka kĩndũ kĩkwonany’a kana nĩwendete andũ. Kwa ngelekany’o, ve ĩvinda yĩmwe andũ aingĩ mũno mookie kũmwĩthukĩĩsya, na ĩla wamonie ‘nĩwamew’ĩie tei, na avosya awau moo.’ (Mathayo 14:14) Ve o ĩvinda yĩngĩ Yesũ wakomanie na mũndũ waĩ mũwau mũno. Ĩla mũndũ ũsu woonanisye nde na nzika kana Yesũ enda no amũvosye, Yesũ nĩwamũvoisye nũndũ nĩwamwendie. Amwĩie ũũ e na ĩnee: “Nĩngwenda; ĩthĩwa mũtheu.” (Luka 5:12, 13) Na ĩndĩ ĩvinda yĩngĩ ĩla Yesũ wamwonie mũnyanyae Meli aiĩa nũndũ wa kũkw’ĩĩwa nĩ mwana-a-inyia, Lasalo, ‘nĩweewie woo vevanĩ,’ na “aũũya,” na “aĩa.” (Yoana 11:32-36) Ĩtina wa ũu, nĩweekie ũndũ wa ũsengy’a. Amũthayũũkisye Lasalo, o na kau aĩ mũkw’ũ mĩthenya ĩna!—Yoana 11:38-44.

Vate nzika, Yesũ nĩweesĩ nesa kana ũtethyo ũla wanengae andũ waĩ o wa kavinda. No weesĩ kana andũ ala wavoisye mesaa o kũwaa ĩngĩ, na ala wathayũũkisye mesaa o kũkw’a ĩngĩ. Ĩndĩ ũndũ ũngĩ weesĩ nĩ kana Ũsumbĩ wa Ngai now’o ũkaminĩa andũ mathĩna ta asu vyũ. Nĩkyo kĩtumi Yesũ ũteanĩawa no kwĩka syama, ĩndĩ nĩweekĩaa kĩthito mũno atavany’e “ũvoo mũseo wa ũsumbĩ.” (Mathayo 9:35) Syama ila weekie itumaa tũelewa o vanini maũndũ ala Ũsumbĩ wa Ngai ũkilyĩ kwĩka nthĩ yonthe. Kwasũanĩa maũndũ ala Mbivilia ĩwetete makekĩka.

• Mowau maikethĩwa kw’o.

  “Nĩvo metho ma ililinda mesalukw’a, na matũ ma ala au matũ melindũka. Nĩvo mũndũ ũthuaa wĩtũlĩla ta ndaatai nũme, na ũĩmĩ wa ũla ũtaneenaa wĩina.” Na “ũla ũtwĩe kw’o ndakasya, Nyie nĩ mũwau.”—Isaia 33:24; 35:5, 6.

• Kĩkw’ũ kĩikethĩwa kw’o ĩngĩ.

  ‘Ala alũngalu makatiĩwa nthĩ, na makatũa vo kũvika tene na tene.’—Savuli 37:29.

  “Nũmeletye kĩkw’ũ tene na tene; na Mwĩaĩi Yeova akavyaĩa methoi mothyũnĩ onthe.” —Isaia 25:8.

• Ala makwie makathayũũkw’a.

  “Onthe ala me mbũanĩ makew’a wasya wake, namo makauma.”—Yoana 5:28, 29.

  “Kũkeethĩwa ũthayũũkyo.”—Meko ma Atũmwa 24:15.

• Kĩla mũndũ akeethwa na kwake, na vai ũmwe ũkaa wĩa.

  “Makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo. Matikaka na ũngĩ aitũa; matikavanda na ũngĩ aiya . . . Anyuve makwa makatanĩaa wĩa wa moko moo ĩvinda ĩasa.”—Isaia 65:21, 22.

• Kaũ ndũkethĩwa kw’o.

  “Nake nũtumaa makaũ mathela kũvika kĩtulu kya nthĩ.”—Savuli 46:9.

  “Mbaĩ ndĩkokĩlĩlya mbaĩ ũvyũ, o na itikemanyĩsya kaũ ĩngĩ.”—Isaia 2:4.

• Kũikethĩwa na mayũa.

  “Nthĩ [ĩkaingĩvya] ũsyao wayo: Ngai, o Ngai waitũ, akatũathima.”—Savuli 67:6.

  “Kũkeethĩwa lĩu mwingĩ mũno wa mbaa ngetha nthĩ iĩmanĩ ĩũlũ.”—Savuli 72:16.

• Ũkya ndũkethĩwa kw’o.

  “Athĩni maikola o na ĩndĩĩ.”—Savuli 9:18, BCK.

  “Akavonokasya mũthĩni yĩla wĩkayaa, na ngya, ĩla ĩte mũtethya. Akeew’ĩa tei ngya na athĩni, na mathayũ ma athĩni akamatangĩĩa.” —Savuli 72:12, 13.

Wasũanĩa maũndũ asu onthe Ũsumbĩ wa Ngai ũkeanĩsya, we nũkwona nĩkĩ Yesũ wendete Ũsumbĩ mũno? E kũũ nthĩ aĩ na mea ma kũtavya mũndũ ũla ũkwenda kwĩw’a ĩũlũ wa Ũsumbĩ wa Ngai. Eekaa ũu nũndũ nĩweesĩ Ũsumbĩ ũsu ũkaminĩa andũ mathĩna onthe vala mavika.

We no wende kwĩsa kwona Ũsumbĩ wa Ngai ũianĩsya mawatho asu mawetetwe Mbivilianĩ? Ethĩwa nũkwenda, ũtonya kwĩka ata nĩ kana wĩmanyĩsye mũnango ĩũlũ wa Ũsumbĩ ũsu? Na ũtonya kwĩka ata nĩ kana wĩtanĩa maũndũ ala Ũsumbĩ ũsu wĩĩka? Kĩlungu kĩla kĩatĩĩe nĩkĩsũngĩĩte makũlyo asu.