KYONGO KYA ĨTHANGŨ YA MBEE | WE NĨWĨW’AA WĨ MŨNYANYAE WA NGAI?
We Nĩwĩsĩ Ĩsyĩtwa ya Ngai na Nũyĩtũmĩaa?
We no ũlilikane mũndũ ũmwe mwĩ ndũũ mũno ĩndĩ ũtesĩ ĩsyĩtwa yake? Mwa ve vinya! Mũndũ mũka ũmwe kuma Bulgaria wĩtawa Irina aisye atĩĩ: “Ndũtonya kũthengeea Ngai ethĩwa ndwĩsĩ ĩsyĩtwa yake.” Ĩndĩ ũseo nĩ kana Ngai nĩwendaa ũmũthengeee o tondũ vawetetwe kĩlungunĩ kĩvĩtu. Kwoou, Ngai nĩwĩmanyĩthĩtye kwaku aitũmĩa Mbivilia. Akwĩĩte atĩĩ: “Ninyie Yeova, nĩyo syĩtwa yakwa.”—Isaia 42:8.
Ngai nĩwĩmanyĩthĩtye kwaku aitũmĩa Mbivilia. Akwĩĩte atĩĩ: “Ninyie Yeova, nĩyo syĩtwa yakwa.”—Isaia 42:8
Wĩthĩwe nĩwĩsĩ ĩsyĩtwa ya Ngai na nũyĩtũmĩaa kana wĩthĩwe ndũyĩsĩ, we Yeova nĩwonaa ũsu ta ũndũ? Kwasũanĩa ũndũ ũũ: Ĩsyĩtwa ya Ngai yawetetwe mavinda ta 7,000 Maandĩkonĩ ala ma mbee vyũ ma Kĩevelania, na yaandĩkĩtwe na namba inya ila syĩtawa Tetragrammaton. Vai ĩsyĩtwa o na yĩmwe Mbivilianĩ yĩandĩkĩtwe mavinda maingĩ ta yĩu. Kwa w’o ũndũ ũsu ũtũĩkĩĩthasya vyũ kana Yeova nĩwendaa tũmanye ĩsyĩtwa yake na tũiyĩtũmĩa.a
Andũ matanamba kũtuma ndũũ mambaa kũmanyana masyĩtwa. We nĩwĩsĩ ĩsyĩtwa ya Ngai?
Ĩndĩ andũ amwe monaa kũtũmĩa ĩsyĩtwa ya Ngai ne kĩvũthya nũndũ nĩ mũtheu na nĩwe mwene vinya w’onthe. Vate nzika nĩ ũthũku kũtũmĩa ĩsyĩtwa ya Ngai ũndũ vataĩle, o tondũ ũtesa kũtũmĩa ĩsyĩtwa ya mũnyanyau naĩ. (Savuli 69:30, 31; 96:2, 8) Lilikana kana Yesũ amanyĩisye aatĩĩi make kũvoyaa atĩĩ: “Asa waitũ ũla wĩ ĩtunĩ, syĩtwa yaku yĩtaĩwe.” O naitũ nĩtũtonya kũtaĩa ĩsyĩtwa ya Ngai kwa kũmanyĩsya andũ angĩ ĩũlũ wayo. Kwĩka ũu nĩkũtumaa tũmũthengeea.—Mathayo 6:9.
Mbivilia yonanasya kana Ngai nĩwendeeaw’a kwa nzĩa ya mwanya nĩ ala “malilikanaa syĩtwa yake.” (Malaki 3:16) Athanie ũũ ĩũlũ wa ũla ũlilikanaa ĩsyĩtwa yake: “Ngamũtũlya, nĩkwĩthĩwa nũmanyĩte syĩtwa yakwa. Akeengaĩla, nakwa ngamũsũngĩa; ũnyamaonĩ ngeethĩwa nake.” (Savuli 91:14, 15) Ethĩwa nĩtũkwenda ũnyanya witũ na Yeova wĩthĩwe wĩ mũseo, no nginya tũmanye na tũitũmĩa ĩsyĩtwa yake.
a Ũndũ wa kũmakya nĩ kana aalyũli aingĩ ma Mbivilia nĩmavetete ĩsyĩtwa yĩu ya Ngai, o na kau nĩyĩwetetwe mavindal maingĩ Maandĩkonĩ ma Kĩevelania ala makothaa kwĩtwa Ũtianĩo Mũkũũ. Vandũ vayo mekĩĩte masyĩtwa ma ũnene ta “Mwĩaĩi” na “Ngai.” Nĩ kana ũkwate ũvoo mwingangĩ ĩũlũ wa ũndũ ũsu, sisyaĩthangũ ya 195-197 ĩvukunĩ Mbivilia Yo Ĩmanyĩasya Ata? yĩla yumĩthĩtw’e nĩ Ngũsĩ sya Yeova.