KYONGO KYA ĨTHANGŨ YA MBEE | WE NO WENDE KWĨMANYĨSYA MBIVILIA?

Mũvango wa Kwĩmanyĩsya Mbivilia na Andũ Onthe

Ithyĩ Ngũsĩ sya Yeova nĩtwĩsĩkĩe nũndũ wa wĩa wa kũtavany’a. Ĩndĩ nĩwĩsĩ kana nĩtwĩthĩawa na mũvango wa kwĩmanyĩsya Mbivilia na andũ nthĩ yonthe?

Mwakanĩ wa 2014, Ngũsĩ sya Yeova mbee wa 8,000,000 nthĩnĩ wa nthĩ 240, kĩla mwei nĩsyeemanyĩisye Mbivilia na andũ vakuvĩ 9,500,000.a Vate nzika, ve nthĩ ta 140 ila syĩ andũ anini mbee wa ala twĩmanyĩasya Mbivilia namo!

Nĩ kana mũvango wa kwĩmanyĩsya Mbivilia na andũ ũendeee, Ngũsĩ sya Yeova syumĩthasya Mbivilia, mavuku, makaseti, na syĩndũ ingĩ syakũtetheesya andũ kwĩmanyĩsya Mbivilia, vakuvĩ mbilioni ĩmwe na nyusu, kwa ithyomo vakuvĩ 700 kĩla mwaka! Mũvango ũsu wa mwanya wa kumĩthya mavuku nũtetheeasya andũ aingĩ makemanyĩsya Mbivilia na kĩthyomo kĩla mekwenda.

“O na kau ndyendete kũsoma nĩ sukulu, ĩla neemanyĩasya Mbivilia neew’aa mũyo mũno. Na maũndũ ala neemanyĩasya nĩmambĩkĩaa vinya mũno!”—Katlego, South Africa.

“Ĩla namanyĩaw’a Mbivilia nĩnakwatie mosũngĩo ma makũlyo onthe ala naĩ namo na angĩ maingĩ.”—Bertha, Mexico.

“Namanyĩĩaw’a Mbivilia mũsyĩ kwakwa ĩla nakwata mwanya. Neew’aa nĩmwĩanĩe vyũ!”—Eziquiel, Brazil.

“Mavinda amwe tweemanyĩasya ndatĩka 15 nginya 30, kana o mbingangĩ kwosana na ũndũ nĩ na ĩvinda yĩana.”—Viniana, Australia.

“Ndyaĩvaa kĩndũ nĩ kana nĩmanyĩw’e. Nĩnatanĩaa mũno kwĩmanyĩsya!”—Aimé, Benin.

“Mũndũ ũla wamanyĩasya Mbivilia aĩ mũseo na aĩ na wũmĩĩsyo. Twaĩ ndũũ mũno.”—Karen, Northern Ireland.

“Andũ aingĩ nĩmemanyĩasya Mbivilia na mayĩsaa kũtw’ĩka Ngũsĩ sya Yeova.”—Denton, England.

MOSŨNGĨO MA MAKŨLYO ALA MAKŨLANGAW’A ĨŨLŨ WA MŨVANGO WITŨ WA KŨMANYĨSYA ANDŨ MBIVILIA

Mũvango ũsu wa kwĩmanyĩsya wĩthĩawa ũilyĩ ata?

Tũnyuvaa masomo me kĩvathũkany’o, na tũimantha Mbivilianĩ mĩsoa ĩla ĩeleetye ĩsomo yĩla twanyuva. Kwa ngelekany’o, Mbivilia nĩsũngĩaa makũlyo ta aa: We Ngai nũũ? We Ngai ailyĩ ata? E ĩsyĩtwa? Ekalaa va? Na no tũmũthengeee? Ũndũ ũla wĩ vinya nĩ kũmanya vala tũtonya kũkwata mosũngĩo ma makũlyo asu Mbivilianĩ.

Nĩ kana tũtetheesye andũ kũkwata mosũngĩo, tũtũmĩaa ĩvuku Mbivilia Yo Ĩmanyĩasya Ata? yĩla yĩ na mathangũ 224.b Ĩvuku yĩu yaseũviw’e kwa nzĩa ya mwanya nĩ kana yĩtetheesye andũ kũelewa momanyĩsyo ma mũsingi ma Mbivilia. Ĩvuku yĩu yĩthĩawa na masomo ĩũlũ wa Ngai, Yesũ Klĩsto, mathĩna ala makwataa andũ, ũthayũũkyo, mboya, na maũndũ angĩ maingĩ.

Mũndũ atonya kwĩmanyĩĩsya va, na ĩndĩĩ?

Mũndũ nũtonya kũsakũa saa, na vandũ vala ũkwenda kwĩmanyĩĩsya.

Mũndũ akuaa ndatĩka siana ata kwĩmanyĩsya?

Andũ aingĩ matũmĩaa ĩsaa yĩmwe, kana o mbeange kĩla kyumwa nĩ kana memanyĩsye Mbivilia. Ĩndĩ mũndũ no anyuve ndatĩka ila ũkwenda kwĩmanyĩsya. Tũkeetĩkĩlana na ĩvinda yĩla wanyuva kũtũmĩa. Amwe memanyĩasya kwa ndatĩka 10 kana 15 kĩla kyumwa.

Mũndũ aĩvaa mbesa siana ata nĩ kana amanyĩw’e?

Twĩmanyĩasya na mũndũ vate ndĩvi, na mavuku ala tũtũmĩaa mayĩĩvĩawa. Ũndũ ũsu wosanĩte nesa vyũ na ndeto ii Yesũ watavisye amanyĩw’a make: “Nĩmwosete mana, nenganai mana.”—Mathayo 10:8.

Mũndũ akuaa ĩvinda yĩana ata aimina kwĩmanyĩsya?

No ũendeee kwĩmanyĩsya Mbivilia kwa ĩvinda yĩla ũkwenda. Ĩvuku Mbivilia Yo Ĩmanyĩasya Ata? yĩthĩawa na masomo 19. No ũnyuve ĩsomo yĩla ũkwenda, kana ũkanyuva kwĩmanyĩsya masomo onthe kwĩanana na ũtonyi waku.

No nginya mũndũ atw’ĩke Ngũsĩ ya Yeova eemanyĩsya?

Aiee. Nĩtũnengete ndaĩa ũthasyo wa kĩla mũndũ wa kwĩnyuvĩa kĩla ũkwenda kũĩkĩĩa. Ĩndĩ o na vailyĩ ũu, andũ ala makwata ũmanyi wa mũsingi wa Mbivilia no meke ũtwi ũla waĩle.

Nĩ va ndonya kũkwata ũvoo mwingangĩ?

Kĩsese kitũ kya jw.org/kam nĩkĩthĩawa na ũvoo wa w’o wa maũndũ ala tũĩkĩĩaa, na maũndũ angĩ ĩũlũ wa Ngũsĩ sya Yeova.

Naĩle kwĩka ata nĩ kana nĩmanyĩw’e Mbivilia?

Kũlya ũmanyĩw’e Mbivilia Kĩsesenĩ kya www.jw.org/kam.
Tũmĩa ĩsandũkũ ya valũa yĩla yaĩle ĩthangũnĩ ya kelĩ ĩkasetinĩ yĩĩ.

a Mavinda maingĩ twĩmanyĩasya Mbivilia na mũndũ ũmwe, kana o ikundi nini sya andũ.

b Yumĩthĩtw’e nĩ Ngũsĩ sya Yeova. Mavuku mbee wa milioni 230 nĩmatumbĩthĩtw’e kwa ithyomo mbee wa 260.

KWĨMANYĨSYA MBIVILIA NĨKŨTETHEEASYA MĨSYĨ

“Ĩla kĩveti kyakwa kyambĩĩie kwĩmanyĩsya Mbivilia nĩnoonie kyeeka moalyũku mana. Nĩtwambĩĩie kwĩkalany’a nesanga. Nũndũ nĩnendaa kũmanya kĩla kĩveti kyakwa kĩkwĩmanyĩsya, o nakwa nĩnambĩĩie kwĩmanyĩsya. Maũndũ ala neemanyĩasya nĩmatumie nĩthĩwa nĩ mũndũ mũseo. Kwĩmanyĩsya Mbivilia nĩkwatumie mũsyĩ witũ wĩthĩwa na ngwatanĩo.”—Eziquiel.

“Ĩla nambĩĩie kwĩmanyĩsya Mbivilia nĩnaekie kũtũmĩa ndawa sya kũmila, kũnyw’a ũkĩ mũno, na neemanyĩsya ũndũ ndonya kwĩsiĩĩa ĩla nathata. Nyũmba yakwa yĩthĩawa yĩ ntheu na yĩ mbange nesa. Nĩnendete andũ ma mũsyĩ wakwa mũno na nĩnĩw’aa mũyo ĩla ngwĩka maũndũ ala matumaa methĩwa me atanu. Yu nĩthĩawa nĩ mũtanu mũnango.”—Karen.

“Andũ amwe maneenaa naĩ nũndũ nĩneemanyĩasya Mbivilia. Ĩndĩ mũũme wakwa ndaanũma kyaa, ambĩaa atĩĩ: ‘Nyie ndimakaw’a nĩ ndeto sya andũ. Ũndũ ũla wa vata kwakwa nĩ kwona ũendeee nesa. Endeea kwĩmanyĩsya na ndũkaeke.’ Vai ĩvinda o na yĩmwe mũsyĩ witũ waaĩthĩwa na ũtanu ta ũla twĩ naw’o!”—Viniana.