MOSŨNGĨO MA MAKŨLYO MA MBIVILIA
Mũthenya wa Sila nĩ kyaũ?
Nĩkĩ mũthenya wa sila ũkethĩwa wĩ ĩvinda ya ũtanu?
Ĩvindanĩ ya tene Ngai atũmĩaa asili kũtangĩĩa andũ make kumana na ũsili ũte wa katĩ. (Asili 2:18) Mbivilia yĩeleetye kana Mũthenya wa Sila nĩ ĩvinda ĩseo yĩla Yeova, Mũsili wa nthĩ yonthe, ũkatangĩĩa andũ kuma maũndũnĩ mate ma ũlũngalu.—Soma Savuli 96:12, 13; Isaia 26:9.
Ngai anyuvĩte Yesũ nĩ kana esilĩla ala me thayũ na ala akw’ũ. (Meko ma Atũmwa 10:42; 17:31) Ve andũ makwie matamwĩsĩ Ngai. Ĩvindanĩ ya Mũthenya wa Sila, Yesũ akathayũũkya andũ asu nĩ kana memanyĩsye ĩũlũ wa Ngai na maimwenda.—Soma Meko ma Atũmwa 24:15.
Nĩkĩ Mũthenya wa Sila ũkethĩwa wĩ wa myaka ngili?
Andũ ala makwie makathayũũkw’a ĩvindanĩ ya myaka ngili. (Ũvuan’yo 20:4, 12) Makanengwa ĩvinda nĩ kana mamanyĩw’e kwenda kwa Ngai na kũatĩĩa mĩao yake. Kĩvathũkany’o na ũndũ andũ aingĩ mamanyĩaw’a, Mbivilia yaĩtye kana andũ makasilĩlwa kwĩanana na maũndũ ala makeka ĩtina wa kũthayũũkw’a.—Soma Alomi 6:7.
O na ĩngĩ, Mbivilia nĩyĩeleetye ĩũlũ wa mũthenya wa ũsilĩlo ũla ũkoka mbee wa ũsumbĩki wa myaka ngili ũtambĩĩe. Mũthenya ũsu now’o wĩtawa mũminũkĩlyo, o tondũ vaeleetw’e ilungunĩ sya mbee sya ĩkaseti yĩĩ. Mũthenya ũsu, Ngai akaananga andũ onthe ala matamũkĩaa na ala athũku. (2 Vetelo 3:7) Kwoou, nĩtwaĩle kwonany’a kana nĩtũmwendete Ngai.—Soma 2 Vetelo 3:9, 13.