Nĩnakwatie Kĩndũ Kĩseo kwĩ Nguma

Mwaka ũla waatĩĩe, nĩnambĩĩie kũthaũka sinema, mavinda maingĩ nĩ mũthaũki mũnene. Andũ ala matangaasaa nĩmendaa kũmanya ngewa yakwa, o na andũ nĩmendaa nĩthĩwe vo ĩla mekwonany’a kĩndũ kyoo ĩvinda ya mbee, namo akũni ma visa nĩmendaa visa syakwa. O na ĩngĩ andũ nĩmambĩtaa ĩla mekwambĩĩsya maviasala moo manene vandũ, o na nĩmanthokasya tũkaye ĩmwe motelinĩ ma kĩlasi. Kĩla mũndũ endaa kwĩtanĩw’a nakwa.

Ĩtina wa ĩvinda nĩnamanyie kana maũndũ asu onthe mayaĩ makwendeesya o tondũ nasũanĩaa. Mũno mũno nathũkũmaa wĩa wa kũthaũka sinema sya kaũ, na kwĩka ũu kwaĩ mũisyo mũnene. Andũ ala mathaũkaa sinema sya kaũ nthĩ ya Hong Kong maĩ kĩvathũkany’o na ala ma Hollywood nũndũ mayeethĩawa na andũ angĩ ũtee ma kũthaũka ilungu ila mũthaũki mũnene wa sinema ũtaĩle kũthaũka nĩ kana ndakaũmĩe. Kwoou ninyie neethaũkĩaa ilungu isu. Kwa ngelekany’o, nĩnatwaaa kamota nginya ngakesĩlya ĩũlũ wa ngalĩ. Sinema mbingĩ ila nathaũkaa nĩ mũthaũki mũnene syaĩ sya kaũ, na syoonanasya maũndũ ma ũlaalai. O na ingĩ nĩsyoonanasya maũndũ ma ũsatani.

Mwakanĩ wa 1995, nĩnatwaiwe nĩ mumĩthya wa sinema. Naĩ na syĩndũ mbingĩ itonya kũndanĩthya, kwa ngelekany’o, naĩ nguma, naĩ mũthwii, naĩ na mũũme wambendete, ĩndĩ o na ũu wĩ o vo, ndyaĩ na ũtanu. Na kwoou navanga kũeka kũthaũka sinema.

KŨLILIKANA MAŨNDŨ ALA NAĨKĨĨAA NĨ MŨNINI

Nĩnambĩĩie kũlilikana na kwendeew’a nĩ mũĩkĩĩo ũla naĩ naw’o ĩla naĩ mũnini. Ĩvinda yĩu nĩtwaendaa nĩ na mwĩĩtu-a-inyia wakwa kĩla Wathanthatũ kũthokea mũsyĩ ũmwe wa Ngũsĩ sya Yeova. Mwene mũsyĩ ũsu, Joe McGrath, nĩwatũmanyĩasya Mbivilia vamwe na eĩtu make atatũ. Mũsyĩ woo waĩ na wendo na ũtanu, na ĩthe woo nĩwanengete mũka na syana syake ndaĩa. O na nĩnatanĩaa mũno kũendany’a namo maũmbanonĩ moo ma ũthaithi. Mavinda angĩ nĩtwaendaa maũmbanonĩ manene ma Ngũsĩ. Nĩtwatanĩaa maũndũ asu mũno na neew’aa nĩ mwĩanĩe nĩ vamwe na Ngũsĩ.

Kĩvathũkany’o na ũu, maũndũ mate ma kwendeesya nĩ meekĩkaa mũsyĩ kwitũ. Mwĩkalĩle mũthũku wa ĩthe wakwa nĩwaũmĩasya inyia wakwa mũno, na ũkatuma emakĩa mũno. Ĩla naĩ na myaka ĩkũmi, inyia wakwa nĩwaekie kwĩthĩwa na ngwatanĩo na Ngũsĩ ya Yeova. Nĩnaendeeie kwĩthĩwa vamwe na Ngũsĩ sya Yeova o na kau ndyeeyumĩtye na ngoo yonthe, na nesa kũvatiswa nĩ na myaka 17. Ĩndĩ ĩtina wa ĩvinda ĩkuvĩ nĩnambĩĩe kwĩthĩwa na mwĩkalĩle mũthũku, na nũndũ wa ũu, neethĩwa nde Ngũsĩ ya Yeova.

NĨNATWIE KŨSYOKA

Kavinda kanini ĩtina wa natwawa, atumĩa ma kĩkundi kya Ngũsĩ sya Yeova nĩmanthokeie. Nĩmambeleisye ũndũ ndonya kũmũsyokea Yeova na mavanga misonalĩ wĩtawa Cindy andetheesye. Kũvikĩĩa ĩvindanĩ yĩu, nĩnaekete kũĩkĩĩa maũndũ ala naĩkĩĩaa nĩ mũnini na kwoou namũkũlya andĩkĩĩthye kana Mbivilia nĩ Ndeto ya Ngai. Nĩwambonisye ngelekany’o sya mawathani ma Mbivilia ala meanĩĩte. O ũndũ ĩvinda yavĩtĩte, now’o twaendeeie kwĩthĩwa twĩ ndũũ na anthokya twĩmanyĩsye momanyĩsyo ma mũsingi ma Mbivilia, na neetĩkĩla. Yĩu nĩyo yaĩ ĩvinda ya mbee kũmanya kana Yeova nĩ Ngai wĩ wendo, na nĩwendaa nĩthĩwe nĩ mũtanu.

Ĩla nambĩĩie kũthi maũmbanonĩ ĩngĩ, nĩnatanĩaa mũno kwĩthĩwa vamwe na Ngũsĩ kũte ũndũ natanĩaa kĩtindo kya andũ ma sinema. Ĩndĩ o na ũu wĩ o vo, nũndũ wa maũndũ ala noonie nĩ mũnini, neew’aa ndesa kũĩkĩĩa mũndũ o na wĩva, na ndyeeyendete. Mwĩĩtu-a-asa ũmwe nĩwambonisye kuma Mbivilianĩ ũndũ ndonya kwambĩĩa kũĩkĩĩa andũ na kwĩyenda, o na nĩneemanyĩisye ũndũ ndonya kũkwata anyanyawa ma w’o.

KĨNDŨ KĨSEO KWĨ NGUMA

Mwakanĩ wa 1997, nĩ na mũemewa nĩtwathamĩĩie Hollywood, California, U.S.A. Nĩ kũu, nĩnatũmĩie ĩvinda yakwa kũtetheesya andũ makwate ũĩ ũla wĩ Ndetonĩ ya Ngai. Kũmanyĩsya andũ Mbivilia nĩkũtumĩte nĩthĩwa nĩ mwĩanĩe mũno kwĩ ĩvinda yĩla naĩ na nguma nũndũ wa kũthaũka sinema. Kwa ngelekany’o mwaka wa 2002, nĩnakomanie na Cheri, mũnyanyawa wa tene kuma Hong Kong. Nĩtwavw’anene nĩ na Cheri maũndũnĩ maingĩ. Kwa ngelekany’o, nĩwe wasindie mathaũ ma mũndũ mũka ũla mwanake vyũ Hong Kong mwaka ũla waĩ ĩtina wa ũla nasindie mathaũ asu. Ũndũ wa ũsengy’a nĩ kana nĩwe wambĩkĩie ngovia ya ũsindi. O na ĩngĩ, aĩ mũthaũki wa sinema na esa kũtw’ĩka mumĩthya wa sinema, o na athũkũmaa na anene me nguma wĩanĩ ũsu. O nake aĩ athamĩĩie Hollywood.

Namakie mũno ĩla namanyie kana mũndũũme ũla weevaasya Cheri nĩwakwie nũndũ wa ũwau wa ngoo. Cheri ndaakwata ũkiakisyo kuma ndĩninĩ yake ya Buddha. O ũndũ ũmwe nakwa, nĩwakwatĩte syĩndũ mbingĩ ila andũ mamanthaa, ta nguma, ĩndĩ ndaĩ na ũtanu na ndaĩ atonya kũĩkĩĩa mũndũ. Nĩnambĩĩe kũmũtavya maũndũ ala neemanyĩĩtye kuma Mbivilianĩ, ĩndĩ yaĩ vinya kũmetĩkĩla nũndũ wa mũĩkĩĩo wake wa Buddha.

Mũthenya ũmwe mwaka wa 2003, Cheri nĩwangũnĩie simũ e Vancouver, Canada, vala waumasya vitio. Ambĩie kana mũthenya ũmwe atwaĩte ngalĩ aendeee na kwĩloela wũmbi, nĩwambĩĩie kũvoya na wasya akyasya, “Ndavye, Ngai wa w’o nũũ? Na etawa ata?” Saanĩ o ũsu atwaĩte ngalĩ oonie Nyũmba ya Ũsumbĩ ĩandĩkĩtwe ĩsyĩtwa Yeova. Cheri eewie Ngai asũngĩa mboya yake na nĩwendaa akomane na Ngũsĩ sya Yeova mĩtũkĩ ũndũ vatonyeka. Nĩneekie mĩvango, na ĩtina wa mĩthenya o mĩnini nĩwaendie kĩkundinĩ kya Ngũsĩ sya Yeova kya kĩthyomo kya Chinese, kĩla kĩ Vancouver.

Ĩtina Cheri ambĩie atĩĩ: “Mwa andũ aa ko matambendete mũno, no nĩmatavye kyonthe kĩla kĩ ngoonĩ.” Nĩnatanĩthiw’e mũno nĩ ndeto isu sya Cheri nũndũ ĩla waĩ mũthaũki wa sinema ndaĩ na anyanyae. Nĩwaendeeie kũthi maũmbanonĩ ma Ngũsĩ sya Yeova. Ĩndĩ mwakanĩ wa 2005, nĩwoosie wĩa wa kumya sinema ilĩ nene nthĩ ya China, na ũu watuma asyoka Hong Kong. Ũndũ wa kũtanĩthya mũno nĩ kana mwakanĩ wa 2006, Cheri nĩweeyumisye kũmũthũkũma Yeova na avatiswa ũmbanonĩ mũnene wa Ngũsĩ, Hong Kong. O na kau nĩwendaa kũtũmĩa ĩvinda yingĩ mũno kũmũthũkũma Yeova, wĩa wake nĩwamũsiĩaa na ũu ndwamũtanĩthasya.

ŨTANU ŨLA NĨKWATĨTE NŨNDŨ WA KŨTETHEESYA ANGĨ

Mwakanĩ wa 2009 maũndũ ma Cheri nĩmavĩndũkie. Nĩwavangie kũtia vyũ wĩa wake wa sinema nĩ kana atũmĩe ĩvinda yingĩ mũno kũmũthũkũma Yeova. Nĩwakwatie anyanya aingĩ kĩkundinĩ kya Kĩklĩsto. Nĩwatw’ĩkie mũtavany’a wa ĩvinda yonthe, na nĩwatanĩaa mũno kũtetheesya andũ mekale kwosana na Ndeto ya Ngai.—Mathayo 24:14.

Ĩtina Cheri nĩwavangie kwĩmanyĩsya kĩthyomo kya Nepalese nĩ kana atetheesye kĩkundi kya Nepalese kya Ngũsĩ sya Yeova kĩla kyaĩ Hong Kong. Andũ aingĩ ala maneenaa kĩthyomo kĩu taoninĩ ya Hong Kong nĩmavũthaw’a nũndũ mayĩsĩ kũneena nesa kĩthyomo kya Kĩsũngũ na kya Chinese. O na syĩthĩo syoo syĩ kĩvathũkany’o. Cheri nĩwandavisye kana nĩwatanĩaa mũno kũtetheesya andũ asu maelewe Mbivilia. Kwa ngelekany’o, aitavany’a nyũmba na nyũmba nĩwakomanie na mũndũ mũka ũmwe ũneenaa kĩthyomo kya Nepalese na weesĩ o maũndũ manini ĩũlũ wa Yesũ, ĩndĩ ndeesĩ ũndũ o na ũmwe ĩũlũ wa Yeova Ngai. Cheri atũmĩie Mbivilia kũmwony’a kana Yesũ avoyaa Ĩthe wake wa ĩtunĩ. Ĩla mũndũ mũka ũsu wamanyie kana no avoye Yeova Ngai ũla wa w’o, nĩweethukĩĩisye nesa ũvoo mũseo. Ĩtina wa ĩvinda ĩkuvĩ, mũũme na mwĩĩtu wake nĩmambĩĩie kwĩmanyĩsya Mbivilia.—Savuli 83:18; Luka 22:41, 42.

Ĩtina wa kwona ũndũ Cheri watanĩaa kwĩthĩwa e mũtavany’a wa ĩvinda yonthe, neekũlilye atĩĩ: ‘Yo nĩ kyaũ kĩnziĩaa ndikeke take?’ Kũvikĩĩa ĩvinda yĩu o nakwa naĩ nĩnasyoka kwĩkalaa Hong Kong. Nĩnatwie kwĩvanga nesa nĩ kana nĩtũmĩe ĩvinda yingĩ kũmanyĩsya andũ ũw’o wa Mbivilia. Nĩnĩsĩte kũmanya kana kwĩthukĩĩsya andũ na kũmatetheesya kũelewa Ndeto ya Ngai nĩkũndeteae ũtanu wa w’o.

Kwa ngelekany’o nĩnĩmanyĩĩtye Mbivilia na mũndũ mũka ũmwe wa kuma Vietnam ũla ũtaĩ na ũtanu, na mavinda maingĩ nĩwaĩaa. Yu ethĩawa e mũtanu mũno, na nũtanĩaa kwĩthĩwa vamwe na kĩkundi kya Ngũsĩ.

Nĩ na Cheri nĩtũkwatĩte kĩndũ kĩseo kwĩ nguma. O na vala kũthaũka sinema nĩkwatũeteie nguma, kũmanyĩsya andũ ĩũlũ wa Yeova nĩkũtumaa mũndũ ew’a e mwĩanĩe nũndũ nĩkũeteae Yeova ndaĩa. Nĩtwonete ũw’o wa ndeto ii sya Yesũ: “Kwĩ mũyo kũnengane kwĩ kwosa.”—Meko ma Atũmwa 20:35.