Nĩkĩ Yesũ Wathĩniwʼe na Akwʼa?

Ũkakũlwʼa kana no wende kwĩkala tene na tene ũsũngĩa ata? Andũ aingĩ no masye kana no mende, ĩndĩ monaa ũndũ ũsu ũtatonyeka. Maasya kana kĩkwʼũ nĩ lasima na kana mũndũ asyawa no nginya akwʼe.

Nao nata ũkakũlwʼa kana no wende kũkwʼa, we ũsũngĩa ata? Andũ aingĩ no masye kana maikwenda kũkwʼa. Ũndũ ũsu wĩtũmanyĩsya kyaũ? Kĩla mũndũ nĩwĩthĩawa na wendi wa kwĩkala thayũ o na akwatwa nĩ mathĩna maingĩvĩte ata. Mbivilia nĩyonanasya kana Ngai oombie andũ me na wendi wa kwĩkala thayũ tene na tene.

Ũwʼo nĩ kana andũ mayĩkalaa tene na tene. Thĩna wambĩĩie va? No twĩkũlye-ĩ, Ngai ekĩte ata nĩ kana andũ meĩkala tene na tene? Mbivilia nĩtũnengete mosũngĩo ma kũtwĩkĩa vinya, na mosũngĩo asu nĩmekũtũtetheesya kũmanya nĩkĩ Yesũ wathĩniwʼe na akwʼa.

THĨNA WAMBĨLĨĨILYE VA?

Ilungu sya mbee itatũ sya ĩvuku ya Mbivilia ya Mwambĩlĩlyo nitũeleetye kana Ngai amombie asyai maitũ ma mbee, Atamu na Eva, me na wĩkwatyo wa kwĩthĩwa na thayũ ũtathela, na amatavya ũndũ matonya kwĩka nĩ kana maũkwate. O na ilungu isu nĩsyonanĩtye ũndũ maleile kũmwĩwʼa Ngai na maasya wĩkwatyo ũsu wa kwĩkala tene na tene. Ngewa ĩsu yĩeleetwʼe kwa nzĩa yĩ laisi vyũ ũkethĩa andũ amwe no masye nĩ wano. O ta mavuku ma Ũvoo Mũseo, ĩvuku ya Mwambĩlĩĩlyo yĩeleetye maũndũ ma wʼo meekĩkie.a

Nĩ kyaũ kyeethĩiwe nũndũ wa Atamu kwĩthĩwa ate mwĩwi? Mbivilia ĩsũngĩĩte atĩĩ: “Nũndũ wa mũndũ ũmwe [Atamu] naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Nũndũ wa kũlea kũmwĩwʼa Ngai, Atamu nĩweekie naĩ. Na nũndũ wa ũu, nĩwaaisye wĩkwatyo wa kwĩthĩwa na thayũ ũtathela, na ĩtina esa kũkwʼa. Nũndũ ithyĩ twĩ ũsyao wake, nĩwatũtiĩe naĩ. Na kĩu nĩkyo kĩtumi tũwaa, tũkakũa, na ĩtina tũkakwʼa. Ũndũ ũsu nĩwosanĩte na ũkunĩkĩli ũla andũ ma saenzi mekĩte ũkwonanyʼa kana syana nĩsyĩthĩawa na mĩtuo ya mũsyawa kuma kwa asyai masyo. Ĩndĩ ve ũndũ Ngai weekie nĩ kana atũtangĩĩe kuma thĩnanĩ ũsu?

MŨVANGO ŨLA NGAI WEEKIE

Ngai nĩweekie mũvango nĩ kana enenga andũ thayũ ũtathela, ũla Atamu waaisye. Eekie mũvango wĩva?

Mbivilia yaĩtye ũũ ĩandĩkonĩ ya Alomi 6:23: “Ĩtuvi ya naĩ nĩ kĩkwʼũ.” Ũu wĩonanyʼa kana kĩkwʼũ kĩetawe nĩ naĩ. Atamu nĩweekie naĩ, na nĩkyo kĩtumi wakwie. O ta ũu, o naitũ nĩtwĩkaa naĩ, na nĩkyo kĩtumi tũkwataa ĩtuvi ya naĩ, nayo nĩ kĩkwʼũ. Ĩndĩ o na kau ti ithyĩ twavĩtisye, tũsyaawa twĩ na naĩ. Nũndũ Ngai e wendo, nĩwatũmie Mwana wake, Yesũ, nĩ kana akwate “ĩtuvi ya naĩ” kwondũ witũ. Ũndũ ũsu watonyekie ata?

Nũndũ nĩ mũndũ ũmwe ũtaĩ na naĩ ũla watũeteie naĩ na kĩkwʼũ kwĩsĩla kũlea kwĩwʼa, nĩvendekaa mũndũ ũngĩ ũte na naĩ ethĩwe e mwĩwi nginya kĩkwʼũ nĩ kana atũthasye kuma ũkombonĩ wa kĩkwʼũ. Mbivilia yĩeleetye ũndũ ũsu kwa kwasya atĩĩ: “Nũndũ wa kũlea kwĩwʼa kwa mũndũ ũmwe aingĩ matwiwe athe, o ta ũu kwondũ wa kwĩwʼa kwa ũmwe, aingĩ makatuwa alũngalu.” (Alomi 5:19) Yesũ nĩwe mũndũ ũsu “ũmwe” ũla ũkatuma andũ matuwa alũngalu. Yesũ aumie ĩtunĩ, asyawa ate na naĩb, na ĩtina esa kũkwʼa kwondũ witũ. Na ũu nũtumaa twĩthĩwa na ngwatanĩo nzeo na Ngai na wĩkwatyo wa kwĩsa kũkwata thayũ ũtathela.

NĨKĨ YESŨ WATHĨNIWʼE NA AKWʼA?

Nĩkĩ yaĩ no nginya Yesũ akwʼe nĩ kana eanĩsye ũndũ ũsu? O na no twĩkũlye-ĩ, We Ngai Mwene Vinya Wʼonthe ndaĩ atonya kumya mwĩao nĩ kana ũsyao wa Atamu ũkekala tene na tene? Kwa wʼo, Ngai aĩ na ũkũmũ wa kwĩka ũu. Ĩndĩ keka nĩweekie ũu ethĩwa avũthĩĩisye mwĩao wake ũla waĩtye kana ĩtuvi ya naĩ nĩ kĩkwʼũ. Ũsu ndwaĩ mwĩao ũtonya kũvĩndũawa o kĩla ĩvinda ĩla maũndũ mathũka. Ĩndĩ mwĩao ũsu nĩ wa vata mũno nthĩnĩ wa ũsili wa katĩ.—Savuli 37:28.

Takethĩwa Ngai nĩwavũthĩĩisye mwĩao ũsu ũndũnĩ ũũ, andũ no methĩwe mambĩĩie kũsũanĩa ta ũtonya kwĩka ũu maũndũnĩ angĩ. Kwa ngelekanyʼo, no methĩwe mambĩĩie kwĩkũlya kana Ngai akanyuva nesa ala maĩle kũkwata thayũ ũtathela. O na ĩngĩ, no mambĩĩe kwĩthĩwa na nzika kana akeanĩsya mawatho make. Ĩndĩ nũndũ Ngai nĩwaatĩĩie ũsili wa katĩ ũndũnĩ ũsu ũkonetye ũtangĩĩo witũ, nĩtwĩthĩawa na mũĩkĩĩo kana mavinda onthe akeekaa ũla waĩle.

Kwĩsĩla kĩkwʼũ kya Yesũ, Ngai nĩwavingũĩe andũ nzĩa ya kũkwata thayũ ũtathela nthĩnĩ wa Nthĩ Nzaũ. Kwasisya ndeto ii sya Yesũ ila syĩ ĩandĩkonĩ ya Yoana 3:16: “Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.” Kwoou, kĩkwʼũ kya Yesũ nĩkyoonanisye kana Ngai nũsilaa katĩ, na ũndũ ũla mũnene vyũ, nĩkyoonanisye kana nĩwendete andũ mũno vyũ.

Ĩndĩ ĩkũlyo nĩ, Nĩkĩ yaĩ no nginya Yesũ athĩnwʼe na aikwʼa kĩkwʼũ kĩ woo o tondũ vaeleetwʼe mavukunĩ ma Ũvoo Mũseo? Nĩ kenda aĩkĩĩthye kana Ndevili nĩwakenganie ĩla waisye kana andũ mayĩsa kwĩthĩwa me aĩkĩĩku ĩla makwatwa nĩ motato. Oonanisye ũu kwĩsĩla wĩnyivyo wake na kwĩthĩwa e mũĩkĩĩku nginya kĩkwʼũ. (Yovu 2:4, 5) Satani nũtonya kwoneka ta waneenaa ũwʼo ĩla wamũtatie Atamu eke naĩ. Ĩndĩ Yesũ, ũla ũtaĩ na naĩ o ta Atamu, nĩweethĩiwe e mwĩwi o na ĩla wakwatiwe nĩ motato momũ. (1 Akolintho 15:45) Kwa kwĩka ũu, Yesũ nĩwoonanisye kana o nake Atamu aĩ atonya kwĩthĩwa e mwĩwi keka nĩwendaa. Kwa kũmĩĩsya, Yesũ nĩwatũtiĩe ngelekanyʼo ya kũatĩĩa. (1 Vetelo 2:21) Nũndũ Yesũ nĩweethĩiwe e mwĩwi vyũ, ĩla waendie ĩtunĩ, Ngai nĩwamũnengie mũthĩnzĩo wa thayũ ũtatonya kũkwʼa.

ŨNDŨ ŨTONYA KŨTETHEKA

Kwa wʼo ki, Yesũ nĩwakwie. Nayu ve nzĩa ya kũkwata thayũ ũtathela. We no wende kwĩkala tene na tene? Yesũ nĩwoonanisye ũndũ twaĩle kwĩka ĩla waisye atĩĩ: “Na thayũ ũtathela nĩwʼo ũũ, nĩ kana makũmanye we Ngai ũla wa wʼo weka, na ũla wamũtũmie, nake nĩ Yesũ Klĩsto.”—Yoana 17:3.

Aumĩthya ma ĩkaseti yĩĩ nĩmeũkũthokya wĩmanyĩsye ĩũlũ wa Yeova, Ngai ũla wa wʼo, na ĩũlũ wa Mwana wake, Yesũ Klĩsto. Ngũsĩ sya Yeova ila syĩ kĩsionĩ kyenyu nĩmeũkũtetheesya kwĩka ũu. O na no ũkwate ũvoo ũngĩ ũtonya kũũtetheesya kwa kũvingũa Kĩsese kya www.jw.org/kam.