Ala Aũme Ana Makuĩtwe Nĩ Mbalasi Matũmanyĩasya Kyaũ?

Maũndũ ala maeleetwʼe ĩvukunĩ ya Ũvuanʼyo ĩũlũ wa mbalasi inya na aũme ala makuĩtwe nĩsyo nĩ maũsengyʼa mũno, na maeleetwʼe nesa ũkethĩa nĩ ta tũmene mayĩkĩka. Mbalasi isu syĩoneka isembete mũno na mavũngũ masyo me na wasya ta wa kĩtundumo! Mbalasi ya mbee nĩ nzaũ, na ũla ũkuĩtwe nĩyo nde na ĩvinda yĩasa kuma atwʼĩkĩthwʼa mũsumbĩ. Aatĩĩwe nĩ mbalasi ya langi mũtune, na ũla ũkuĩtwe nĩyo avetangaa mũuo ĩũlũ wa nthĩ. Nayo mbalasi ya katatũ nĩ nziũ, na ũla ũkuĩtwe nĩyo e na kĩthimi kwʼokonĩ kwake, na wasya ũla ũkwĩwʼĩka wĩonanyʼa kana kwĩ yũa. Mbalasi ya kana nĩ ya langi wa mũkũyũ kana langi mũtuku, na yĩonanyʼa kana kwĩ mowau na mĩisyo ĩngĩ, na ũla ũkuĩtwe nĩyo ĩsyĩtwa yake nĩ kĩkwʼũ. Mbũa yĩatĩanĩe na mbalasi ĩsu, na andũ aingĩ ala makwʼa melika vo!​—⁠Ũvuanʼyo 6:​1-8.

“Ĩla nasomie kwa ĩvinda ya mbee ĩũlũ wa aũme asu ana makuĩtwe nĩ mbalasi, nĩnatelemile. Nasũanĩie kana Mũthenya wa Sila nĩwũkĩte na nũndũ ndyeeyũmbanĩtye, ndiema kwanangwa.”​—Crystal.

“Nĩnendeeiwʼe nĩ woni ũla ũeleetye ĩũlũ wa aũme ana ala makuĩtwe nĩ mbalasi syĩ malangi me kĩvathũkanyʼo. Nĩnesie kũelewa maũndũ ala me woninĩ ũsu, na namanya kana nĩ ma wʼo.”​—Ed.

Nĩwĩthĩwa wĩwʼaa ũndũ Crystal weewie ĩla wasomie ĩũlũ wa aũme ana ala makuĩtwe nĩ mbalasi mawetetwe ĩvukunĩ ya Ũvuanʼyo? Kana wĩwʼaa ũndũ Ed weewʼaa? Wĩthĩwe wĩwʼaa ta Crystal, kana wĩwʼaa ta Ed, ĩthĩwa wĩsĩ kana woni ũsu wa aũme makuĩtwe nĩ mbalasi nĩ ũmwe wa mawoni ala mesĩkĩe nesa ĩvukunĩ ya Ũvuanʼyo, na nĩyo ĩvuku ya mũthya ya Mbivilia. Na we nĩwĩsĩ kana kũelewa woni ũsu no kũũtethye? Kũtonya kũũtethya ata? Ngai nĩwathanĩte kana no ũkwate ũtanu wa wʼo wasoma, weemanyĩsya, na weeka kwosana na maũndũ ala me ĩvukunĩ yĩu ya wathani.​—⁠Ũvuanʼyo 1:​1-3.

O na kau andũ amwe nĩmatelemaa masoma woni ũsu wa aũme ana makuĩtwe nĩ mbalasi, woni ũsu ndwaandĩkwa ũtũtelemasye. Ũwʼo nĩ kana andũ milioni mbingĩ nĩmamanyĩte kana woni ũsu nũlũlũmĩĩlasya mũĩkĩĩo woo, na nũmanengae wĩkwatyo mũseo wa ĩvinda yũkĩte. O naku no ũtetheke o tamo! Twĩũkũlya ũendeee kũsoma ũvoo ũũ.