Mo Aklĩsto Nĩmaĩle Kũtanĩa Kĩlisimasi?

Andũ milioni mbingĩ ĩũlũ wa nthĩ maĩkĩĩaa kana Kĩlisimasi nĩ sikũkũ ya kũlilikana kũsyawa kwa Yesũ Klĩsto. Ĩndĩ waaĩsa kwĩkũlya kana Aklĩsto ma ĩvinda ya Atũmwa, ala maĩ vakuvĩ na Yesũ, nĩmatanĩaa Kĩlisimasi? Na nĩwĩsĩ kĩla Mbivilia ĩmanyĩasya ĩũlũ wa sikũkũ sya kũsyawa? Kũkwata mosũngĩo ma makũlyo asu no kũtũtetheesye kũmanya kana Aklĩsto nĩmaĩle kũtanĩa Kĩlisimasi.

Ũndũ wa mbee nĩ kana Mbivilia ndĩwetete ĩũlũ wa kũtanĩa mũthenya wa kũsyawa kwa Yesũ kana kwa athaithi angĩ aĩkĩĩku ma Ngai. Maandĩko mawetete o andũ elĩ ala matanĩie mũthenya woo wa kũsyawa. Andũ asu elĩ mayaĩ athaithi ma Yeova, Ngai wa Mbivilia, na ve maũndũ mathũku meekĩkie maitanĩa kũsyawa kwoo. (Mwambĩlĩlyo 40:20; Maliko 6:21) Kwosana na ĩvuku yĩtawa Encyclopædia Britannica, Aklĩsto ma mbee nĩmaleanaa na “kĩthĩo kya kũtanĩa sikũkũ sya kũsyawa kya andũ matamũthaithaa Ngai.”

Mbivilia ndĩwetete matukũ ala Yesũ wasyaiwe. Ĩvuku yĩmwe ya McClintock na Strong Cyclopedia yaĩtye kana “mũthenya ũla Klĩsto wasyaiwe ndwĩsa kũmanyĩka kuma Ũtianĩonĩ Mweũ, kana kuma mavukunĩ angĩ.” Vate nzika, kethĩwa Yesũ nĩwendaa aatĩĩi make matanĩae kũsyawa kwake, ethĩwa aĩkĩĩthisye kana nĩmesĩ matukũ ala wasyaiwe.

Ũndũ wa kelĩ nĩ kana, vai vandũ Mbivilia yonanĩtye Yesũ kana ũmwe wa amanyĩwʼa make aitanĩa Kĩlisimasi. Kwosana na ĩvuku yĩtawa New Catholic Encyclopedia, kũtanĩa Kĩlisimasi kwawetiwe ya mbee vyũ “kalendanĩ ka Alomi kaandĩkĩtwe nĩ mũndũũme weetawa Philocalus [Chronograph of Philocalus] ka mwaka wa 336 [ĩtina wa Klĩsto].” Vate nzika, ũu weethĩiwe Mbivilia yaminie kũandĩkwa na myaka maana maingĩ Yesũ aumie kũũ nthĩ. Kwoou, nĩkyo kĩtumi McClintock na Strong maisye kana “kũtanĩa Kĩlisimasi nĩ ũndũ ũtaambĩĩwʼa nĩ Ngai, na ndumanĩte na Ũtianĩo Mweũ.”a

Nũndũ Yesũ nĩwe Mwalimũ Mũnene, nĩwatavisye aatĩĩi make maũndũ ala wendaa mekae, na maũndũ asu me Mbivilianĩ. Ĩndĩ kũtanĩa Kĩlisimasi ti ũmwe wa maũndũ asu. O tondũ mwalimũ ũtendaa syana sya sukulu iivĩta maũndũ ala syaĩle kwĩka, o nake Yesũ ndendaa aatĩĩi make ‘maivĩtũka mbee wa maũndũ ala maandĩkĩtwe’ Maandĩkonĩ Matheu.—1 Akolintho 4:6.

Ĩndĩ ve ũndũ wa vata vyũ Aklĩsto ma ĩvinda ya atũmwa meekaa, nawʼo nĩ kũlilikana kĩkwʼũ kya Yesũ. Yesũ mwene nĩwe watavisye amanyĩwʼa make ĩvinda yĩla maĩlĩte kũlilikana ũndũ ũsu na amonyʼa ũndũ maĩle kwĩka ũu. Maũndũ asu wameie nĩ mekae, vamwe na matukũ ala wakwie, maandĩkĩtwe Mbivilianĩ.—Luka 22:19; 1 Akolintho 11:25.

O tondũ twoona, Kĩlisimasi nĩ sikũkũ ya kũlilikana mũthenya wa kũsyawa, na Aklĩsto ma ĩvinda ya atũmwa mayaatĩĩaa kĩthĩo kĩu kya andũ matamũthaithaa Ngai. O na ĩngĩ, vai vandũ Mbivilia yonanĩtye Yesũ kana ũmwe wa amanyĩwʼa make aitanĩa Kĩlisimasi. Nũndũ wa itumi isu sya wʼo vyũ, ve Aklĩsto milioni mbingĩ ĩũlũ wa nthĩ matatanĩaa Kĩlisimasi.