Nũũ Ũtongoeasya Andũ ma Ngai Ũmũnthĩ?

1, 2. Atũmwa matonya kwĩthĩwa meekũlilye ata ĩla Yesũ wambatie ĩtunĩ?

KWALILIKANA ũla mũthenya atũmwa ma Yesũ maũngeme Kĩĩmanĩ kya Mĩthata. Kwakũna visa wone mangʼelele matunĩ masyaĩĩsye vwana na mũnyanyae woo, Yesũ, ayambata na kũthelekelya mathweonĩ. (Meko 1:9, 10) Yesũ ekalĩte namo kwa ĩvinda ya myaka ta ĩlĩ, na myakanĩ ĩsu nĩwamamanyĩĩtye, akamekĩa vinya, na akamatongoesya. Ĩndĩ yu mayaĩ nake ĩngĩ. Mesaa kwĩka ata?

² Yesũ atanathi nĩwanengie aatĩĩi make wĩa. Ameie ũũ: “Mũkeethĩwa mwĩ ngũsĩ syakwa Yelusaleme, na Yutia yonthe, na Samalia, na kũvika itulu sya nthĩ.” (Meko 1:8) Mo mesaa kwĩanĩsya wĩa ũsu ata? Yesũ atanambata ĩtunĩ nĩwamaĩkĩĩthisye kana ĩtina wa mĩthenya mĩvũthũ nĩmeũkwata veva mũtheu. (Meko 1:5) Ĩndĩ nĩ kana wĩa wa kũtavanyʼa nthĩ yonthe ũtethwʼe nesa, nĩmaaĩle kũvangwa na maitongoewʼa. Atũmwa asu nĩmeesĩ kana ĩvindanĩ ya tene Yeova atũmĩaa andũ kũtongoesya na kũvanga athaithi make. Kwoou nĩvatonyeka makethĩwa mekũlasya ũũ: ‘We Yeova nũkũtũnyuvĩa mũndũ ũngĩ wa kũtũtongoesya?’

3. (a) Nĩ ũtwi wĩva wa vata weekiwe nĩ ala atũmwa aĩkĩĩku ĩtina wa Yesũ kũsyoka ĩtunĩ? (b) Twĩneenea kyaũ ĩsomonĩ yĩĩ?

³ O na syumwa ilĩ itathelete kuma Yesũ ambata ĩtunĩ, amanyĩwʼa make nĩmasyaisye Maandĩko, mavoya Ngai amatongoesye, na ĩndĩ manyuva Mathia nĩ kana ose vandũ va Yutasi Isikalioti na aitwʼĩka mũtũmwa wa 12. (Meko 1:15-26) Nĩkĩ ũndũ ũsu waĩ wa vata mũno kwa amanyĩwʼa asu na kwa Yeova? Amanyĩwʼa nĩmamanyie kana atũmwa maaĩle kwĩthĩwa me 12.a Yesũ ndanyuvĩte atũmwa nĩ kana akwate andũ ma kũtavanyʼa nake, ĩndĩ amanyuvie nĩ kana makwatĩĩe kĩanda kya vata mũno andũnĩ ma Ngai. Kĩanda kyu nĩ kĩva, na Yeova amũtũmĩie Yesũ ata amombanyʼe nĩ kana makĩanĩsye? Nĩ mũvango wĩva ũilyĩ ta ũsu wĩthĩawa andũnĩ ma Ngai ũmũnthĩ? Na tũtonya ata ‘kũmalilikana ala me na ũtongoi’ ĩũlũ witũ, na mũno mũno ĩla “ngombo yĩ na kĩthito na mbũĩ”?—Aevl. 13:7; Mt. 24:45.

YESŨ NĨWATONGOESYE NZAMA ĨLA YAĨ ĨVINDA YA ATŨMWA

4. Atũmwa na ala atumĩa angĩ maĩ Yelusaleme makwatĩĩe kĩanda kĩva?

⁴ Mũthenya wa Vendekosito ya mwaka wa 33 atũmwa nĩmambĩĩe kũtongoesya kĩkundi kya Kĩklĩsto. Mũthenya ũsu “Vetelo, aũngeme na ala ĩkũmi na ũmwe,” nĩwatavisye ĩkomano ĩnene ya Ayuti na andũ ma mbaĩ ingĩ ala malikĩte ũthaithinĩ wa Kĩyuti ũvoo ũtonya kũmatangĩĩa. (Meko 2:14, 15) Aingĩ moo nĩmatwʼĩkie Aklĩsto. Ĩtina wa vau, asu maĩ manatwʼĩka Aklĩsto nĩmaendeeie ‘kũlũlũmĩla momanyĩsyonĩ ma atũmwa.’ (Meko 2:42) Namo atũmwa nĩmo mavangĩthasya ũndũ mbesa ila syaĩ vo syaaĩle kũtũmĩwa. (Meko 4:34, 35) O na nĩmathĩnĩkĩaa mavata ma andũ ma Ngai, nũndũ maisye: “Ithyĩ tũkekalaa tũlũlũmĩle mboyanĩ na ũthũkũminĩ wa ĩla ndeto.” (Meko 6:4) Na nĩmasyokie manyuva Aklĩsto me na ũmanyi mwingĩ nĩ kana maendeesye wĩa wa kũtavanyʼa isionĩ ila itatavanĩtwʼe. (Meko 8:14, 15) Ĩtina wa ĩvinda atumĩa angĩ etĩkĩwʼa mauta nĩmakwatanie na atũmwa asu nĩ kana matongoesye ikundi. Asu onthe me vamwe nĩmo matwʼĩkie nzama ĩla ĩtongoesye, na nzama ĩsu nĩyo yanengae ikundi myolooto ya kũatĩĩa.—Meko 15:2.

5, 6. (a) Veva mũtheu watetheeisye nzama ĩla ĩtongoesye ata? (Sisya visa ĩthangũnĩ ya 23.) (b) Alaĩka matetheeisye nzama ĩla ĩtongoesye ata? (c) Ndeto ya Ngai yatetheeisye nzama ĩla ĩtongoesye ata?

⁵ Aklĩsto ma ĩvinda ya atũmwa nĩmeesĩ kana nzama ĩla ĩtongoesye yatongoewʼe nĩ Yeova Ngai atũmĩĩte Mũtongoi woo, Yesũ. Ĩndĩ mo meesĩ ũu ata? Mbee vyũ, nzama ĩsu nĩyanengetwe ũtonyi nĩ veva mũtheu. (Yoa. 16:13) Veva mũtheu wetĩkĩwʼe Aklĩsto onthe etĩkĩwʼa mauta, ĩndĩ mũno mũno nĩwatetheeisye atũmwa na atumĩa angĩ ma Yelusaleme kwĩanĩsya kĩanda kyoo kya kũsyaĩĩsya kĩkundi. Kwa ngelekanyʼo, mwakanĩ wa 49 Klĩsto aminĩte kũsyawa, veva mũtheu nĩwatetheeisye nzama ĩla ĩtongoesye kwĩka ũtwi mũseo ĩũlũ wa thĩna ũla waumĩlile wa nzaĩko. Ĩla ikundi syaatĩĩie ũtao wa nzama ĩsu, nĩsyaendeeie ‘kũlũlũmĩlwʼa mũĩkĩĩonĩ, na ũtalo wasyo waingĩvaa mĩthenya yonthe.’ (Meko 16:4, 5) O na ĩngĩ, valũa ũla ũandĩkĩtwe ũtwi woo nĩwonanĩtye kana ala maĩ nzamanĩ ĩsu maĩ na ũsyao wa veva wa Ngai, ta wendo na mũĩkĩĩo.—Meko 15:11, 25-29; Aka. 5:22, 23.

⁶ Kelĩ, alaĩka nĩmatetheeasya nzama ĩla ĩtongoesye. Kwa ngelekanyʼo, sũanĩa Kolinelio, ũla nĩwe waĩ mũndũ wa mbee ũte mwaĩke kũtwʼĩka Mũklĩsto. Ĩndĩ atanamba kũtwʼĩka nũvatiswa, mũlaĩka nĩwamumĩlĩle na amwĩa atũmane mũtũmwa Vetelo oke kwake. Vetelo avika nĩwatavisye Kolinelio na mũsyĩ wake ũvoo mũseo, na ĩndĩ metĩkĩwʼa veva mũtheu o na kau aũme asu mayaĩ aĩke. Kĩu nĩkyathuthisye atũmwa vamwe na ana-a-asa ala angĩ metĩkĩlane na kwenda kwa Ngai na maithokya Andũ-ma-mbaĩ-ingĩ mate aĩke malike kĩkundinĩ kya Kĩklĩsto. (Meko 11:13-18) O na ĩngĩ, alaĩka nĩmatetheeisye mũno wĩa wa kũtavanyʼa ũla waũngamĩwe nĩ nzama ĩla ĩtongoesye na nĩmaũkalaatangie. (Meko 5:19, 20) Na ĩndĩ ũndũ wa katatũ nĩ kana Ndeto ya Ngai nĩyatetheeisye mũno nzama ĩla ĩtongoesye. Ala maĩ nzamanĩ ĩsu nĩmaekie Maandĩko mamatongoesye ĩla mekwĩka motwi ma vata ĩũlũ wa mũĩkĩĩo wa Aklĩsto kana ĩla meũnenga ikundi motao.—Meko 1:20-22; 15:15-20.

7. Nĩkĩ tũtonya kwasya kana Yesũ nĩwe watongoesye Aklĩsto ma mbee?

⁷ O na kau nzama ĩla ĩtongoesye yaĩ na ũkũmũ kĩkundinĩ kyu kya tene kya Kĩklĩsto, ala maĩ nzamanĩ ĩsu nĩmeesĩ kana Yesũ nĩwe Mũtongoi woo. Mũtũmwa Vaulo aandĩkie ũũ: ‘Nake [Klĩsto] anenganie andũ amwe methĩwe atũmwa.’ Na ĩndĩ ongela ndeto ii: “Nthĩnĩ wa wendo, twĩane maũndũnĩ onthe tũmũvikĩe we, nake nĩwe mũtwe, Klĩsto.” (Aev. 4:11, 15) Vandũ va amanyĩwʼa kwĩyĩtanĩsya na mũtũmwa ũmwe wĩ nguma, Ngai nĩwamatongoesye “mambĩlĩlya kwĩtwa Aklĩsto.” (Meko 11:26) Nĩ wʼo kana Vaulo nĩweesĩ vata wa ‘kũkwata mũno momanyĩsyo,’ kana kwa ndeto ingĩ, vata wa kũatĩĩa nesa motao ma Maandĩko ala manenganawe nĩ atũmwa na aũme angĩ ala matongoesye. Ĩndĩ esĩ oou, ongelile kwasya: “Nĩenda mũmanye, kana mũtwe wa kĩla mũndũ mũũme [o na vamwe na ala maĩ nzamanĩ ĩla ĩtongoesye] nĩ Klĩsto; . . . na mũtwe wa Klĩsto nĩ Ngai.” (1 Ako. 11:2, 3) Kwoou Klĩsto Yesũ, ũla waĩ ananengwa ũkũmũ mũnene ĩtunĩ, nĩwe watongoesye kĩkundi kya Kĩklĩsto kya ĩvindanĩ ya atũmwa e ungu wa Yeova Ngai, ũla nĩwe Mũtwe wake.

“ŨŨ TI WĨA WA MŨNDŨ”

8, 9. Mwana-a-asa Russell eanĩisye kĩanda kĩva kya vata kwambĩĩa mwaka wa 1870?

⁸ Kwambĩĩa mwaka wa 1870, Charles Taze Russell na anyanyae amwe make nĩmeekĩie kĩthito matũngĩĩe ũthaithi wa wʼo. Nĩ kana matonye kũnyaĩĩkya ũwʼo wa Mbivilia na ithyomo syĩ kĩvathũkanyʼo, kwĩ mwaka wa 1884, Zion’s Watch Tower Tract Society nĩyambĩĩwʼe na yaandĩkĩthwʼa silikalĩnĩ. Mwana-a-asa Russell nĩwe watwʼĩkie mũũngamĩi wayo.b Aĩ na kĩthito kingĩ mũno kya kwĩmanyĩsya Mbivilia, na ndaĩ na wia aivuanyʼa momanyĩsyo ma ũvũngũ, ta ũmanyĩsyo ĩũlũ wa Ũtatũ na ũmanyĩsyo wa kana thayũ ndũkusaa. O na ĩngĩ nĩwamanyie kana Klĩsto akasyoka e Mũsumbĩ ũtenekee, na kana “mavinda ma Andũ-ma-mbaĩ-ingĩ” mesaa kũthela mwaka wa 1914. (Luka 21:24) Na ĩndĩ Mwana-a-asa Russell nĩweeyumisye vyũ atũmĩe ĩvinda yake, vinya, na mbesa syake nĩ kana atavye andũ angĩ ũwʼo ũsu wamanyĩte. Vai nzika kana ĩvindanĩ yĩu ya mwanya, Mwana-a-asa Russell nĩwe watũmĩawa nĩ Yeova na Yesũ Klĩsto, ũla nĩwe mũtwe wa kĩkundi.

⁹ Mwana-a-asa Russell ndaaĩyĩtĩsya ndaĩa andũnĩ. Kwa ngelekanyʼo, mwakanĩ wa 1896 aandĩkie ũũ ĩũlũ wake na ala angĩ makwatĩĩe ianda: “Tũikwenda kũnengwa ndaĩa ya mwanya, kana kwoneka twĩ ma vata mũno nũndũ wa kĩla twĩkaa kana mavuku ala tũandĩkaa; na tũyĩsa kwenda kwĩtwa masyĩtwa ta Levalendi kana Lavai. O na ĩngĩ tũikwenda kĩkundi o na kĩmwe kĩtanĩwʼe naitũ.” O na ve o ĩvinda yĩngĩ waisye: “Ũũ ti wĩa wa mũndũ.”

10. (a) Yesũ anyuvie “ngombo yĩ na kĩthito na mbũĩ” ĩndĩĩ? (b) Elesya ũndũ kĩvathũkanyʼo kya Nzama Ĩla Ĩtongoesye na Watch Tower Society kyesie kũmanyĩka nesa.

¹⁰ Twĩ mwaka wa 1919, myaka ĩtatũ kuma Mwana-a-asa Russell akwʼa, Yesũ nĩwanyuvie ĩla “ngombo yĩ na kĩthito na mbũĩ.” Eekie ũu nĩkĩ? Endaa ngombo ĩsu ĩnengae andũ ma nyũmba yake “lĩu ĩvinda yawʼo.” (Mt. 24:45) O na myakanĩ ĩsu ya tene, kĩkundi kĩnini kya ana-a-asa etĩkĩwʼa mauta ala mathũkũmaa ovisinĩ mũnene ũla waĩ Brooklyn, New York, nĩmaseũvasya na kũnyaĩĩkĩsya aatĩĩi ma Yesũ lĩu wa kĩ-veva. Ndeto “nzama ĩla ĩtongoesye” syambĩĩe kũtũmĩwa mavukunĩ maitũ myakanĩ ya 1940. Na ĩvinda yĩu voonekaa aũngamĩi ma Watch Tower Bible and Tract Society ta mo nzama ĩsu. Ĩndĩ mwakanĩ wa 1971, nĩvamanyĩkie nesa kana Nzama Ĩla Ĩtongoesye yĩ kĩvathũkanyʼo na Watch Tower Society. Wĩa wa Watch Tower Society nĩ kũsianyʼa na maũndũ ala makonanĩtye na mĩao ya silikalĩ, nawʼo wĩa wa Nzama Ĩla Ĩtongoesye nĩ kũkwatĩĩa maũndũ ma kĩ-veva. Kwoou kuma ĩvinda yĩu ndyaĩ lasima etĩkĩwʼa mauta ala me Nzamanĩ Ĩla Ĩtongoesye methĩwe ne mo aũngamĩi ma sosaiti ĩsu. Myakanĩ ya mĩtũkĩ, ana-a-asa me na ũmanyi ala me kĩkundinĩ kya “malondu angĩ” nĩmo methĩĩtwe maiũngamĩa sosaiti ĩsu, kana o mĩvĩa ĩngĩ ĩla ĩtũmĩawa nĩ andũ ma Ngai. Ũndũ ũsu nũnengete Nzama Ĩla Ĩtongoesye mwanya mũseo wa kũseũvya lĩu wa kĩ-veva ĩteũkwatanĩsya na maũndũ angĩ. (Yoa. 10:16; Meko 6:4) Ĩkaseti ya Mũsyaĩĩsya ya 01/07/2013 yaeleisye kana “ngombo yĩ na kĩthito na mbũĩ” nĩ kĩkundi kĩnini kya ana-a-asa etĩkĩwʼa mauta, ala nĩmo Nzama Ĩla Ĩtongoesye.

11. Nzama Ĩla Ĩtongoesye ĩthũkũmaa ata?

¹¹ Ana-a-asa ala me Nzamanĩ Ĩla Ĩtongoesye mekaa motwi ma vata me vamwe. Mekaa ũu ata? Onthe nĩmakomanaa kĩla kyumwa, na ũndũ ũsu nũmanengae mwanya wa kũea ngewa nesa me vamwe na me ngwatanĩo. (Nth. 20:18) Kĩla mwaka nĩmaumanĩasya ũla ũkwĩthĩwa e mwene kĩvĩla maũmbanonĩ asu, nũndũ vai mwana-a-asa o na ũmwe wa Nzama Ĩla Ĩtongoesye ũtalawa ta we wa vata kwĩ ala angĩ. (1 Vet. 5:1) Ũu nowʼo vekawa ila kamitiinĩ thanthatũ sya Nzama Ĩla Ĩtongoesye. O na ĩngĩ, vai ũmwe nzamanĩ ĩsu wĩyonaa ta we mũtongoi wa ana-a-asa ala angĩ. Vandũ va ũu, kĩla ũmwe woo etalaa ta ũmwe wa “nyũmba” ya Vwana, ĩla yaĩlĩte kũtongoewʼa na kũĩthwʼa kĩ-veva nĩ ĩla ngombo yĩ na kĩthito.

“NŨŨ ĨNDĨ NGOMBO YĨ NA KĨTHITO NA MBŨĨ?”

12. Nũndũ Ngai ndaveveeaa ala me Nzamanĩ Ĩla Ĩtongoesye na ti atĩ mayĩsaa kũvĩtya, nĩ makũlyo meva tũkwĩkũlya?

¹² Ngai ndaveveeaa ala me Nzamanĩ Ĩla Ĩtongoesye, na ti atĩ mayĩsaa kũvĩtya. Kwoou nzama ĩsu nĩtonya kũvĩtya ĩla ĩkũelesya Mbivilia kana o na ĩla ĩkumya motao ũseũvyonĩ wa Yeova. Nũndũ wa ũu, ĩvuku Fahirisi ya Vichapo yĩ na kyongo kyaĩtye, “Uelewaji wa Mafundisho Uliorekebishwa,” kĩla kyonanĩtye moalyũku ala mekĩtwe kuma mwaka wa 1870 ĩũlũ wa ũndũ tũeleawa Maandĩko. Vate nzika, Yesũ ndaaweta kana ngombo ĩsu yake yĩ na kĩthito ĩkatũseũvĩasya lĩu ũte na mavĩtyo o na amwe. Kwoou twĩsĩ kĩu, tũtonya kũsũngĩa ata ĩkũlyo yĩĩ ya Yesũ: “Nũũ ĩndĩ ngombo yĩ na kĩthito na mbũĩ?” (Mt. 24:45) Twĩsĩ ata kana Nzama Ĩla Ĩtongoesye nĩyo ngombo ĩsu? Ekai tũsũanĩe o ala maũndũ atatũ matetheeisye nzama ĩla yaĩ ĩvinda ya atũmwa.

13. Veva mũtheu ũtetheesye Nzama Ĩla Ĩtongoesye ata?

¹³ Nĩtetheeawʼa nĩ veva mũtheu. Veva mũtheu nũtetheesye Nzama Ĩla Ĩtongoesye kũelewa ũwʼo wa Maandĩko ũla navu ĩtina andũ matawĩsĩ. Kwa ngelekanyʼo, sũanĩa moalyũku ĩũlũ wa mũĩkĩĩo witũ ala me ĩvukunĩ yĩla twaweta kalungunĩ ka 12. Kwa wʼo, vai mũndũ o na ũmwe waĩlĩte kwosa nguma nũndũ wa kũmanya na kũelesya maũndũ asu “maliku ma Ngai”! (Soma 1 Akolintho 2:10.) Nzama Ĩla Ĩtongoesye yĩthĩawa na woni o ta wa mũtũmwa Vaulo. Aandĩkie ũũ: “Maũndũ asu namo nĩtũũmaneena, na ti na ndeto imanyĩawʼa nĩ ũĩ wa andũ, ĩndĩ nĩ ila Veva ũmanyĩasya.” (1 Ako. 2:13) Navu ĩtina kwa ĩvinda ya myaka maana maingĩ athaithi ma wʼo meethĩĩtwe matesĩ nesa kwenda kwa Ngai, na angĩ aingĩ meethĩĩtwe maikaĩa ũla mũĩkĩĩo. Ĩndĩ kuma mwaka wa 1919 ũmanyi witũ wa Maandĩko wĩthĩĩtwe wĩ mwingĩ mũno. Kwoou vo ve kĩndũ kĩngĩ eka veva mũtheu tũtonya kwasya nĩkyo kĩtũtetheesye tũkethĩwa na ũmanyi ũsu wingĩvĩte ũu?

14. Kwosana na ĩandĩko ya Ũvuanʼyo 14:6, 7, alaĩka matetheeasya andũ ma Ngai ata ũmũnthĩ?

¹⁴ Nĩtetheeawʼa nĩ alaĩka. Ũmũnthĩ Nzama Ĩla Ĩtongoesye yĩ na kĩanda kĩnene kya kũsyaĩĩsya wĩa wa kũtavanyʼa nthĩ yonthe, ũla yu ũendeee kũtethwʼa nĩ atavanyʼa mbee wa milioni nyanya. Nĩ kyaũ kĩtumĩte wĩa ũsu ũtethwʼa nesa? Mbee vyũ, alaĩka nĩmatetheeasya mũno. (Soma Ũvuanʼyo 14:6, 7.) Kwa ngelekanyʼo, ve mavinda maingĩ atavanyʼa mathokeete andũ o keĩlĩ meĩ manavoya makwate ũtethyo!c Na kwongela kĩu, atavanyʼa maendeee kũkwata mosyao maseo na maingĩ wĩanĩ wa kũtavanyʼa na kũtwʼĩkĩthya andũ amanyĩwʼa, o na kau nthĩ imwe nivĩngaa wĩa witũ mũno. Ũndũ ũsu ũtonyekete no ũndũ nĩtũtetheeawʼa nĩ alaĩka.

15. Ve kĩvathũkanyʼo kĩva katĩ wa Nzama Ĩla Ĩtongoesye na atongoi ma ndĩni ila syĩyĩtaa sya Kĩklĩsto? Nengane ngelekanyʼo.

¹⁵ Nĩyĩkwatasya Ndeto ya Ngai. (Soma Yoana 17:17.) Kwasũanĩa ũndũ ũũ weekĩkie mwaka wa 1973. Ĩkaseti ya Mũsyaĩĩsya (Kĩswaili) ya Ĩtukũ 1, Mwei wa 12, yakũlilye ĩkũlyo yĩĩ: “Mo andũ ala mataekete mbakĩ kana sikala nĩmaĩlĩte kũvatiswa?” Ĩkaseti yĩu yasũngĩie ũũ: “Ũĩkĩĩthyo ũla wĩ Maandĩkonĩ wĩonanyʼa kana mayaĩlĩte kũvatiswa.” Nĩyasyokie yaweta maandĩko ala maneeneete ũndũ ũsu, na yaelesya nĩkĩ mũndũ ũnyusaa sikala waĩle kũtengwa alea kwĩlila. (1 Ako. 5:7; 2 Ako. 7:1) Ĩndĩ yawetie atĩĩ: “Ũu ti kwasya kana andũ meĩkĩĩwa mĩao ĩte vo kana nĩmekwĩkalĩlwa. Ĩtambya yĩĩ ĩlũmu yumĩte kwa Ngai ũla wĩyĩeleetye kwĩsĩla Ndeto yake mbandĩke.” Vo ve ndĩni ĩngĩ yĩthĩawa yĩyũmbanĩtye kũatĩĩa Ndeto ya Ngai vyũ o na ĩla motwi amwe matonya kwĩthĩwa me maito kwa aatĩĩi amwe mayo? Ĩvuku yĩmwe ya mĩtũkĩ yĩneenete ĩũlũ wa ndĩni sya Amelika yaĩtye ũũ: “Mavinda maingĩ atongoi ma ndĩni sya Kĩklĩsto nĩmavĩndũaa momanyĩsyo moo nĩ kana mosane na mũĩkĩĩo na woni ũla ũkwetwe mbau mũno nĩ aatĩĩi moo kana o andũ aingĩ kĩsionĩ.” Kĩvathũkanyʼo na atongoi asu, ana-a-asa ma Nzama Ĩla Ĩtongoesye metĩkĩlasya Ndeto ya Ngai ĩmatongoesye ĩla mekwĩka motwi vandũ va kũtongoewʼa nĩ woni ũla ũkwetwe mbau mũno nĩ andũ. Kwoou-ĩ, we ũtonya kwasya nũũ ũla ũtongoesye andũ ma Ngai ũmũnthĩ?

‘MALILIKANEI ALA ME NA ŨTONGOI ĨŨLŨ WENYU’

16. Tũtonya kũlilikana Nzama Ĩla Ĩtongoesye kwa nzĩa yĩva ĩmwe?

¹⁶ Soma Aevelania 13:7. Ndeto “malilikanei” ĩla ĩtũmĩĩtwe ĩandĩkonĩ yĩu no ĩalyũlwe “mawetei.” Kwoou nzĩa ĩmwe ya ‘kũlilikana ala me na ũtongoi’ nĩ kũweta Nzama Ĩla Ĩtongoesye mboyanĩ sitũ. (Aev. 6:18) Kwavindĩĩsya kĩanda kĩla me nakyo kya kũtũĩthya kĩ-veva, kũsyaĩĩsya wĩa wa kũtavanyʼa nthĩ yonthe, na kũĩkĩĩthya mĩvothi nĩyatũmĩwa nesa. Vate nzika, nĩtwaĩle kũmavoyea mũno na kĩthetheesyo!

17, 18. (a) Tũtonya kũkwata mbau ata Nzama Ĩla Ĩtongoesye? (b) Kĩthito kitũ kya kũtavanyʼa kyonanasya ata kana nĩtũkwete Yesũ mbau vamwe na ĩla ngombo yĩ na kĩthito?

¹⁷ Tũililikanaa Nzama Ĩla Ĩtongoesye na kanywʼa tũ, ĩndĩ nĩtũmĩlilikanaa kwa kũatĩĩa kĩla yatũtavya. Nzama Ĩla Ĩtongoesye ĩtũnengae motao kwĩsĩla mavuku maitũ, maũmbano ma kĩkundi, na maũmbano manene. Na kwongela kĩu, nĩyo ĩnyuvaa asyaĩĩsya ma mũthyũlũlũko, namo asyaĩĩsya asu mainyuva atumĩa ma kĩkundi. Kwoou asyaĩĩsya ma mũthyũlũlũko na atumĩa ma kĩkundi malilikanaa Nzama Ĩla Ĩtongoesye kwa kũatĩĩa nesa mĩtalatala ĩla yamanenga. Na ĩla ithyonthe tweewʼa na tweenyivĩsya aũme ala Yesũ ũendeee kũtũmĩa matũtongoesye, twĩthĩawa tũimũnenga ndaĩa ta we Mũtongoi witũ.—Aevl. 13:17.

¹⁸ Nzĩa ĩngĩ tũtonya kwonanyʼa nĩtũlilikanaa Nzama Ĩla Ĩtongoesye nĩ kwĩyumya vyũ wĩanĩ wa kũtavanyʼa. Vaulo athuthisye Aklĩsto methĩwe na mũĩkĩĩo ta wa ala matongoetye katĩ woo. Ngombo yĩ na kĩthito nĩyonanĩtye mũĩkĩĩo mũlũmu vyũ kwa kwĩkĩa kĩthito kingĩ ũtavanyʼanĩ na kũendeesya ũvoo mũseo wa Ũsumbĩ. Ethĩwa wĩ ũmwe wa ala malondu angĩ, we nũkwataa mbau etĩkĩwʼa mauta wĩanĩ ũsu wa vata? Weeka ũu ũkatana mũno ĩla Mũtongoi witũ, Yesũ, ũkasya: “O ũndũ mwamwĩkie ũmwe wa ana-a-asa aa makwa, o na ala anini, mwambĩkie nyie.”—Mt. 25:34-40.

19. Nĩkĩ ũtwʼĩte kũmwĩwʼa Mũtongoi witũ, Yesũ?

¹⁹ Ĩla Yesũ wasyokie ĩtunĩ, ndaamatia aatĩĩi make mate na ũtethyo. (Mt. 28:20) Yesũ nĩweeyoneie ũndũ veva mũtheu, alaĩka, na Ndeto ya Ngai syamũnengie ũtonyi wa kũtongoesya andũ ma Ngai ĩla waĩ vaa ĩũlũ wa nthĩ. Kwoou ũmũnthĩ nũnengete ĩla ngombo yĩ na kĩthito ũtethyo ta ũsu. Namo ala ma Nzama Ĩla Ĩtongoesye “mavikĩlaa Katena ka ĩlondu o vala ũendaa.” (Ũvu. 14:4) Kwoou ĩla twamewʼa, twĩthĩawa tũimwĩwʼa Mũtongoi witũ, Yesũ. Na o mĩtũkĩ Yesũ nũkũtũtongoesya tũkwate thayũ ũtathela. (Ũvu. 7:14-17) Vai mũtongoi o na ũmwe ĩũlũ wa nthĩ ũtonya kũtwatha ũndũ ta ũsu!