Makũlyo Kuma kwa Asomi Maitũ

Nĩ kwa nzĩa yĩva mũtũmwa Vaulo ‘wambatiwʼe kũvika ĩtu ya katatũ’ na “alikwʼa Ũseonĩ [kana, Valatisonĩ]”?​—2 Ako. 12:2-4.

Nthĩnĩ wa ĩandĩko ya 2 Akolintho 12:2, 3, Vaulo nũwetete mũndũ mũna ‘wambatiwʼe kũvika ĩtu ya katatũ.’ We ũsu aĩ ũũ? Yĩla Vaulo waandĩkĩaa kĩkundi kya Kolintho valũa, nĩwakindĩlĩĩle kana Ngai amũtũmĩaa ta mũtũmwa. (2 Ako. 11:5, 23) Ĩtina wa vau, nĩwawetie ĩũlũ wa “mawoni na movuanʼyo ma Mwĩaĩi.” Na mĩsoanĩ ĩla ĩthyũlũlũkĩte ndeto ĩsu, ndaaweta ana-a-asa angĩ. Nũndũ wa ũu, tũyĩthĩwa tũivĩtya tũkasya yĩla wawetaa mũndũ wooniwʼe mawoni na movuanyʼo, eewetaa ewe mwene.​—2 Ako. 12:1, 5.

Kwoou veonekana Vaulo nĩwe ‘wambatiwʼe kũvika ĩtu ya katatũ’ na “alikwʼa Ũseonĩ.” (2 Ako. 12:2-4) Atũmĩie ndeto “movuanʼyo” kwonanyʼa kana maũndũ ala wooniwʼe maĩ meanĩe ĩvinda yũkĩte.

Ĩndĩ we Vaulo oonie kyaũ kĩu wakĩtie ‘ĩtu ya katatũ’?

Ndeto “ĩtu” nĩtũmĩawa Mbivilianĩ kwonanyʼa o ĩtu yĩla twĩthĩawa twene. (Mwa. 11:4; 27:28; Mt. 6:26) Ĩndĩ ndeto ĩsu no ĩtũmĩwe kwa nzĩa ingĩ. Kwa ngelekanyʼo, mavinda amwe nĩtũmĩawa kũweta mosumbĩ ma andũ. (Nda. 4:20-22) Na mavinda angĩ nĩtũmĩawa kũweta ũsumbĩki wa Ngai.​—Ũvu. 21:1.

Vaulo etwʼĩka nĩwoonie ‘ĩtu ya katatũ.’ Yo twĩenda kwĩwa ata? Mbivilia nĩwetaa ũndũ katatũ nĩ kana ĩũkindĩlĩle, yonanyʼe ũito wawʼo, kana ĩũlũlũmĩĩlye. (Isa. 6:3; Esek. 21:27; Ũvu. 4:8) Kwoou veonekana Vaulo awetie ‘ĩtu ya katatũ’ ayenda kwonanyʼa ũsumbĩki wa mwanya na wĩ ĩũlũ mũno, ũla nĩ Ũsumbĩ wa Masia ũtongoewʼe nĩ Yesũ Klĩsto na ala 144,000 makasumbĩka nake. (Sisya Insight on the Scriptures, Ĩvu. 1, ĩth. 1059, 1062.) Ũu wosanĩte na kĩĩ mũtũmwa Vetelo waandĩkie yĩla waisye kana kwĩanana na watho wa Ngai, “tweteele matu meũ.”​—2 Vet. 3:13.

Nayo Vaulo awetaa kyaũ yĩla watũmĩie ndeto “Ũseonĩ”?

O nayo ndeto “ũseo” no ĩtũmĩwe kwa nzĩa syĩ kĩvathũkanyʼo: (1) Wasũanĩa mũũnda ũla mũndũ wa mbee waseũvĩwʼe, ndeto ĩsu no ĩtũmĩwe kwonanyʼa Nthĩ Nzaũ ĩla tweteele. (2) Ndeto ĩsu no yĩthĩwe ĩkonetye mũuo ũla andũ ma Ngai makatanĩa nesa vyũ yĩla Ngai ũkatwʼa maũndũ onthe meũ. (3) O na ĩngĩ, ndeto ĩsu no yĩthĩwe ĩkonetye ũseo ũla wĩ ĩtunĩ, kana, “mũũndanĩ [valatisonĩ] wa Ngai,” kwosana na Ũvuanʼyo 2:7.—Sisya ĩkaseti ya Mũsyaĩĩsya ya 15/07/2015, ĩth. 8. kal. 8.

Nĩvatonyeka ũkethĩa Vaulo aneeneaa maũndũ asu me atatũ yĩla wawetie ndeto ila syĩ ĩandĩkonĩ ya 2 Akolintho 12:4.

Kwa ũkuvĩ:

Nĩvatonyeka ũkethĩa ‘ĩtu ya katatũ’ yĩla yĩwetetwe nthĩnĩ wa 2 Akolintho 12:2 nĩ Ũsumbĩ wa Masia wĩ mokonĩ ma Yesũ Klĩsto na ala 144,000. Ũsumbĩ ũsu nowʼo wĩtĩtwe “matu meũ.”​—2 Vet. 3:13.

Ũsumbĩ ũsu wĩtĩtwe ‘ĩtu ya katatũ’ nũndũ nĩ wa mwanya na wĩ ĩũlũ mũno.

“Ũseonĩ,” kana Valatisonĩ, vala Vaulo ‘wambatiwʼe,’ nĩvatonya kwĩthĩwa vayonanyʼa (1) Nthĩ Nzaũ ĩla tweteele, (2) mũuo mwingĩ ũla tũkatanĩa ĩvinda yĩu, ũla ũkethĩwa wĩ mwingĩ o na kwĩ ũla Ngai ũtũnengete ũmũnthĩ, na (3) ‘mũũnda wa Ngai’ kana valatiso ya Ngai ĩtunĩ, yĩla Ngai ũkatwʼa maũndũ onthe meũ.

Kwoou Valatiso nĩ kyaũ? Valatiso nĩ matu meũ na nthĩ nzaũ ila twathĩtwe. Ũsu nĩ mũvango mweũ ũla ũkavĩndũa maũndũ vyũ, na amwe ma maũndũ asu meũ nĩ Ũsumbĩ wa ĩtunĩ vamwe na andũ ala makethĩwa maimũthũkũma Yeova ĩũlũ wa nthĩ nzaũ.