Ũndũ Ũtonya Kwĩkala Thayũ Mũseo

ŨMŨNTHĨ andũ mekalaa kĩvathũkanyʼo na ũndũ Ngai wavangĩte. Nthĩ yaĩle kwĩthĩwa yusĩe andũ manengete ndaĩa ũsumbĩki mũnene wa Mũmbi woo, mekwĩtĩkĩla kũtongoewʼa nĩwe, na me na nguma nzeo ta syake. Ngai endaa andũ mekale nesa me ngwatanĩo na mayĩthĩwa na mĩsyĩ, memanyĩsye maũndũ meũ, na maitwʼĩkĩthya nthĩ yonthe vandũ vaseo va kwĩkala.

NGAI NĨWATHANĨTE KŨVĨNDŨA MAŨNDŨ ĨŨLŨ WA NTHĨ MEKALE ŨNDŨ WENDAA

• “Nake nũtumaa makaũ mathela kũvika kĩtulu kya nthĩ.”—Savuli 46:9.

• “Ĩvinda yĩla yĩnyuvĩtwe yavika ya . . . kũmananga ala manangaa nthĩ.” —Ũvuanyʼo 11:18.

• “Ũla ũtwĩe kwʼo ndakasya, Nyie nĩ mũwau.”—Isaia 33:24.

• “Anyuve makwa makatanĩaa wĩa wa moko moo ĩvinda ĩasa.”—Isaia 65:22.

Nĩ kwa nzĩa yĩva maũndũ asu makeanĩa? Ngai nũmũnyuvĩte Mwana wake, Yesũ, ethĩwe Mũsumbĩ wa silikalĩ ĩla ĩkasumbĩka kũũ ĩũlũ wa nthĩ kuma ĩtunĩ. Mbivilia yĩtaa silikalĩ ĩsu Ũsumbĩ wa Ngai. (Ndanieli 2:44) Mbivilia ĩwetete ndeto ii ĩũlũ wa Yesũ: “Ngai akamũnenga kĩvĩla kya ũsumbĩ . . . , na akasumbĩka e Mũsumbĩ.”—Luka 1:32, 33.

Yesũ e ĩũlũ wa nthĩ, nĩweekie syama mbingĩ kwonanyʼa ũndũ e Mũsumbĩ ũkatuma andũ mekala nesa ĩvinda yũkĩte kĩvathũkanyʼo na ũmũnthĩ.

YESŨ NĨWOONANISYE MAŨNDŨ MASEO ALA ŨKEKA ANDŨ ALA EWI

• Nĩwavoisye mowau ma mĩthemba yonthe na kwa kwĩka ũu, oonanyʼa ũndũ ũkamina mawonzu onthe ala makwataa andũ.—Mathayo 9:35.

• Nĩwakilĩthisye ũkanga na kwoou oonanyʼa ũndũ ũkasũvĩa andũ maikakwatwe nĩ mĩisyo.—Maliko 4:36-39.

• Nĩwaĩthisye andũ ngili mbingĩ na kwoou oonanyʼa ũndũ ũkeanĩĩsya andũ mavata moo ma kĩla mũthenya. —Maliko 6:41-44.

• Nĩwavĩndũie kĩwʼũ kyatwʼĩka mbinyu yĩla waĩ mbokanĩ ya mũtwaano, na kwa kwĩka ũu aĩkĩĩthya kana akeeka maũndũ matonya kũtuma andũ matanĩa thayũ.—Yoana 2:7-11.

Waĩle kwĩka ata nĩ kana wĩtanĩa thayũ mũseo ũla Ngai wendaa andũ metanĩa? Ve “nzĩa” waĩle kwĩsĩla, kana kwa ndeto ingĩ, ve ũndũ wa vata mũno waĩle kwĩka. Mbivilia yaĩtye kana “nzĩa [ĩsu] ĩelete thayũnĩ, namo nĩ anini ala mamyonaa.”—Mathayo 7:14.

ŨNDŨ ŨTONYA KŨMANYA NZĨA ĨLA ĨELETE THAYŨNĨ MŨSEO

Nĩ nzĩa yĩva ĩelete thayũnĩ? Ngai aĩtye atĩĩ: “Ninyie Yeova Ngai waku, ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo.” (Isaia 48:17) Waatĩĩa ũtao ũsu ũkekala thayũ mũseo.

Yesũ aisye atĩĩ: “Nyie ninyie nzĩa na ninyie wʼo na ninyie thayũ.” (Yoana 14:6) Kwoou nĩ kana tũmũthengeee Ngai na tũyĩkala thayũ mũseo, nĩtwaĩle kũĩkĩĩa maũndũ ala Yesũ wamanyĩisye na tũiatĩĩa ngelekanyʼo yake.

Ũtonya ata kũmanya nzĩa ĩla ĩelete thayũnĩ? O na kau kwĩ ndĩni mbingĩ, Yesũ aisye atĩĩ: “Ti kĩla mũndũ ũmbĩtaa, ‘Mwĩaĩi, Mwĩaĩi,’ ũkalika Ũsumbĩnĩ wa ĩtu, ĩndĩ no ũla wĩkaa kwenda kwa Asa wakwa ũla wĩ ĩtunĩ.” (Mathayo 7:21) O na ĩngĩ aisye: “Mũkamamanya kwĩsĩla mosyao moo.” (Mathayo 7:16) Mbivilia no yĩũtetheesye ũkamanya ndĩni ya wʼo.—Yoana 17:17.

Waĩle kwĩka ata nĩ kana wambĩĩe kwĩsĩla nzĩanĩ ya thayũ? Nĩwaĩle kwĩmanyĩsya ĩũlũ wa ũla ũtũnengete thayũ. Kwa ngelekanyʼo, waĩle kwĩmanyĩsya maũndũ ta: We nũũ? Etawa ata? E nguma ta syĩva? Aendeee kwĩka ata kwondũ witũ? Endaa twĩke ata?a

Ve maũndũ angĩ Ngai wendaa andũ meke eka o kũthũkũma, kũya, kwĩtanĩthya, na kwĩthĩwa na mũsyĩ. No tũmũmanye Mũmbi witũ na tũitwʼĩka anyanyae. Na no twonanyʼe kana nĩtũmwendete kwa kwĩka kwenda kwake. Nĩkyo kĩtumi Yesũ waisye atĩĩ: “Na thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka.”—Yoana 17:3.

KWOSA ĨTAMBYA YA MBEE

Yĩla twamanya maũndũ ala Ngai wendaa twĩke, nĩ vethĩawa vata wa kwĩka moalyũku thayũnĩ witũ. Ũndũ ũsu ndwĩ laisi. Ĩndĩ ũwʼo nĩ kana, o tondũ kyalo kyambĩĩaa na ĩtambya yĩmwe, no nginya twose ĩtambya ya mbee ya kũendaa nzĩanĩ ya thayũ, na tweeka ũu thayũ witũ ũkeethĩwa wĩ mũseo. Nĩ kana ũtetheewʼa kũkwata mosũngĩo ma makũlyo ma mũsingi ĩũlũ wa Ngai, Ngũsĩ sya Yeova no syende kũũmanyĩsya Mbivilia vate ndĩvi, wĩ vala ũkwenda na saa ila ũkwenda. Neena naitũ kwĩsĩla www.jw.org/kam.