Maũndũ Atatũ Maũkũtetheesya Ũmanyĩsye Nesa
1. Nĩkĩ twaĩle kũtata tũmanyĩsye nesa?
1 Atavanyʼa onthe nĩ amanyĩsya. Twĩthwe nĩ ĩndĩ tũũneena na mũndũ ya mbee, tũmũsyokeete tũendeesye wendi wake, kana twĩmanyĩsya mũmanyĩwʼa wa Mbivilia, twĩĩthĩwa tũimũnenga ũmanyi. Tũmanyĩasya ũvoo wa mwanya. Twĩvuanyʼa “maandĩko matheu,” ala matonya kũtuma andũ ‘moĩva kũvika ũtangĩĩo.’ (2 Tim. 3:15) Kĩanda kĩu nĩ kya mwanya mũno. Vaa ve maũndũ atatũ maũtũtetheesya tũmanyĩsye nesa.
2. Tũtonya kũmanyĩsya kwa nzĩa laisi ata?
2 Manyĩsya kwa Nzĩa Laisi: Ĩla twamanya ũndũ nesa, no tũlwe na mĩtũkĩ kana ũndũ ũsu no wĩthĩwe wĩ vinya kũeleeka kwa angĩ. Kwoou, ĩla ũũmanyĩsya mũmanyĩwʼa wa Mbivilia, ndũkamũelesye maũndũ maingĩ mũno mate ma vata. Vandũ va ũu, elesya maũndũ o ala ma vata. Kũneena mũno tikwʼo kwonanasya wĩmanyĩsya nesa. (Nth. 10:19) Nĩ ũndũ mũseo kũsoma maandĩko ala ma mũsingi moka. Wasoma ĩandĩko, elesya kĩlungu kya ĩandĩko yĩu kĩla kyosanĩte na ũndũ ũla mũkwĩmanyĩsya. Ũla Ũtavanyʼa wa Kĩĩmanĩ ũeleetwʼe nthĩnĩ wa Mathayo kĩlungu kya 5 nginya kya 7, wĩ na ũwʼo mũliku, ĩndĩ Yesũ amanyĩisye ũwʼo ũsu kwa nzĩa laisi na atũmĩie ndeto mbũthũ.
3. Vata wa ngelekanyʼo na visa nĩ mwaũ, na nĩ syĩva ila syaĩle?
3 Ngelekanyʼo na Visa: Ngelekanyʼo na visa nitumaa mũndũ esilya, akiitwa ngoonĩ, na alilikana maũndũ. Ndũkone ta waĩle kwĩthwa wĩ mũneenu nĩ kana ũnengane ngelekanyʼo nzeo. Mavinda maingĩ Yesũ anenganae ngelekanyʼo nguvĩ, ite na maũndũ maingĩ. (Mt. 7:3-5; 18:2-4) Ĩngĩ, mavisa mate na maũndũ maingĩ masoletwe ĩthangũnĩ nomatetheesye mũno. Kwĩyũmbanyʼa nesa kũkaũtetheesya kũkwata ngelekanyʼo na visa syaĩle.
4. Tũtonya kũtũmĩa makũlyo nesa ata?
4 Makũlyo: Makũlyo maĩle kũtuma mũmanyĩwʼa waku esilya. Kwoou, wakũlya ĩkũlyo eteela. Wasũngĩa mĩtũkĩ ne uwe, ndwĩmanya kĩla mũmanyĩwʼa waku ũeleetwe. Asũngĩa ũndũ vataĩle, wĩthĩwa wĩ ũseo kũmũtetheesya akwate ũsũngĩo wa wʼo kwa kũmũkũlya makũlyo angĩ vandũ va kũmũtavya ũsũngĩo. (Mt. 17:24-27) Nĩ wʼo, vaiĩ mũmanyĩsya mwĩanĩu. Nĩkyo kĩtumi Mbivilia ĩtwĩkĩaa vinya tũsũvĩe momanyĩsyo maitũ. Kwa kwĩka ũu, tũkakwata moathimo matakathela vamwe na ala mekũtwĩthukĩĩsya.—1 Tim. 4:16.