Tũwela Twĩlĩ

Nzĩa ĩmwe ya vata ĩla tũtonya kũtetheesya maũndũ ma Ũsumbĩ nĩ kwa kumya mĩvothi kwondũ wa wĩa wa kũtavanyʼa ĩũlũ wa nthĩ yonthe. Nata ethĩwa tũi na mbesa mbingĩ?

Ĩvinda yĩmwe Yesũ nĩwoonie kĩveti ndiwa kĩla kyaĩ ngya kĩivotha tũwela twĩlĩ (mbesa syaĩ sya thooa mũnini vyũ) ĩsandũkũnĩ ya ĩkalũ. Kũmwenda Yeova kwatumie kĩnengane ‘kuma ũkyanĩ wakyo syonthe ila kyaĩ nasyo, wĩkwatyo wakyo wʼonthe wa thayũ.’ (Mko. 12:41-44) Yesũ nĩwawetie ũndũ ũsu, kwonanyʼa kana mũvothi wa kĩveti kĩu waĩ wa vata mũnene methonĩ ma Ngai. O ta ũu, Aklĩsto ma mbee, nĩmoonaa wĩ ũndũ waĩle kumya mĩvothi. Aklĩsto ala Ngya o na ala athwii mavothaa ũndũ matonya. Mũtũmwa Vaulo awetie ngelekanyʼo ya andũ ma Masetonia ala, o na kau maĩ ‘ngya nĩmeesũvanie mũno na kĩthingʼĩĩsyo manengwe mwanya wa kumya ũtethyo.’​—2 Ako. 8:1-4, KNT.

Kwoou, o na ethĩwa twĩvotha “tũwela twĩlĩ,” twaĩle kũlilikana kana mĩvothi ĩsu mĩnini yakolanwʼa vamwe nĩtonya kwĩthĩwa mũvothi mũnene. Kumya kuma ngoonĩ kũkendeesya Ĩthe waitũ mũlau wa ĩtunĩ, nũndũ “Ngai endete mũndũ ũnenganae na ũtanu.”​—2 Ako. 9:7.