Mungu Asema Nasi Kupitia Yeremia
1. Nĩ ĩvuku yĩva yaumiwʼe ũmbanonĩ wa kĩvalo wa 2010, na tũkayĩtũmĩa ata?
1 Nĩtwatanie mũno ĩla ĩvuku yeũ yĩ na ĩsyĩtwa yĩu yaumiwe 2010 Ũmbanonĩ wa Kĩvalo wa “Kaa Karibu na Yehova!” Ĩvuku yĩĩ yĩeleetye maũndũ ala tũtonya kwĩmanyĩsya makonetye thayũ witũ wa kĩla mũthenya kuma ĩvukunĩ ya Yelemia na Iĩo. (Alo. 15:4) Ĩvangĩwe kũtumĩwa ũmbanonĩ wa Ĩmanyĩsyo ya Mbivilia ya Kĩkundi, na tũkambĩĩa kũyĩmanyĩsya kyumwanĩ kya Noovemba 5, 2012.
2. Nĩkĩ nĩtũtonya kũunĩka tweemanyĩsya mavuku ma Mbivilia Yelemia na Iĩo?
2 Nĩ ya Vata Ũmũnthĩ: Yelemia, mũandĩki wa ĩvuku yĩĩ ya Mbivilia ĩveveee, aĩ mwathani ĩvindanĩ ya thĩna Yuta. Mbeenĩ, eewʼaa ataĩlĩte wĩanĩ ũũ. (Yel. 1:6) Ĩngĩ nĩwathĩniwʼe nĩ andũ weesene namo, o na no kwĩthĩwa athĩniwʼe nĩ andũ ma mũsyĩ ma ndũa yoo, Anathothi. (Yel. 11:21, 22) Nũndũ wa ũu, mavinda amwe Yelemia nĩwakusaa ngoo. (Yel. 20:14) Ĩla tũendeee na kwĩanĩsya wĩa witũ wa ‘kũtwʼĩkĩthya andũ ma mbaĩ syonthe amanyĩwʼa,’ mavinda maingĩ nĩtũkomanaa na mathĩna ta ala mamũkwatie Yelemia na kwĩwʼa ũndũ weewʼaa. (Mt. 28:19) Kwĩmanyĩsya maũndũ ala waandĩkie kũkatũtetheesya kwĩanĩsya ũthũkũmi witũ twĩ na ũlũmu na kĩthito.
3. Tũkatũmĩa ata maũndũ amwe ala me ĩvukunĩ ya Yeremia?
3 Maũndũ ala Me Vo: Maandĩko ma mũsingi ala maĩle kũsomwa ĩvindanĩ ya kwĩmanyĩsya monanĩtwʼe kwa kweekwʼa. Ĩmanyĩsyo ya kĩla kyumwa yĩithela, ve ĩkũlyo kana makũlyo elĩ maandĩkĩtwe na langi mũkundu ma kũsyokea maũndũ ala manene. Makũlyo aa maĩle kũkũlwa ethukĩĩsya ĩvinda ya kũsyokeleela maũndũ ala manene. Ĩvukunĩ yĩu, ve na mavisa maseo ala kĩkundi kĩkethĩwa kĩtonya kwendeewʼa nĩ kumya maelesyo ĩũlũ wamo.
4. Tũtonya kũunĩka vyũ ata kumana na kwĩmanyĩsya ĩvuku yĩĩ ya Yeremia?
4 Nĩ kana ũunĩke vyũ, ĩyũmbanyʼe tene. Sisya maũndũ ala ũtonya kũtũmĩa thayũnĩ waku na ũtavanyʼanĩ. Umya maelesyo kaingĩ ũndũ vatonyeka. Yelemia nĩweanĩisye wĩa wake kwa ũtanu na e mwĩanĩe nũndũ wa kũathimwa nĩ Yeova. (Yel. 15:16) Ekai kwĩmanyĩsya ĩvuku yĩĩ yeũ, kũtũtetheesye kwĩanĩsya ũthũkũmi witũ ta Yelemia.