We Ũkeethĩwa Vainia Mũtetheesya?
1. Nĩkĩ ĩvinda ya Ũlilikano wa Kĩkwʼũ kya Yesũ nĩ ĩvinda ĩseo ya kwongela ũtavanyʼa witũ?
1 Ĩvindanĩ ya Ũlilikano wa Kĩkwʼũ kya Yesũ nĩ ĩvinda ĩseo mũno ya kwongela ũtavanyʼa witũ. Nĩ ĩvinda yĩla tũsũanĩĩaa ĩũlũ wa wendo mũnene wa Yeova ũla woonanisye kwa kumya Mwana wake ta nthembo ya wovosyo. (Yoa. 3:16) Kwĩka ũu kũtumaa tũmũtũngĩa Yeova mũvea mũno nũndũ wa kĩla watwĩkie, na kũyongeleela wendi witũ wa kũtavya angĩ ĩũlũ wa Yeova na mĩvango ĩla wĩ nayo kwelekela andũ. (Isa. 12:4, 5; Luka 6:45) Ĩngĩ yĩĩ nĩ ĩvinda tũtanĩaa kambeini ya kũthokya anyanya na andũ angĩ kĩsionĩ kitũ moke ũmbanonĩ wa Ũlilikano wa Kĩkwʼũ kya Yesũ. Ĩtina wa ũmbano ũsu, nĩtũtataa kũsyokea andũ ala monanisye kwendeewʼa kwa kũka ũmbanonĩ ũũ. Ũkongeleela ũthũkũmi waku kwa kwĩthĩwa wĩ vainia mũtetheesya nthĩnĩ wa Mwei wa 3, wa 4, kana wa 5?
2. Nĩkĩ Mwei wa 3 ne ĩvinda ĩseo mũno ya kwosa ũvainia mũtetheesya?
2 Tũmĩa Mwei wa 3 kwa Nzĩa ya Mwanya: Mwei wa 3 ũkeethĩwa waĩle mũno kwosa ũvainia mũtetheesya. Ala makosa ũvainia makeethĩwa matonya kũnyuva kũtavanyʼa masaa 30 kana 50. Ethĩwa mũsyaĩĩsya wa mũthyũlũlũko akeethĩwa athokete kĩkundinĩ kyenyu mweinĩ ũũ, mavainia atetheesya no mombane ũmbano wʼonthe ũla mavainia ma kĩla ĩvinda na ma mwanya makeka vamwe na mũsyaĩĩsya wa mũthyũlũlũko. Kambeini ya kũthokya andũ Ũlilikanonĩ wa Kĩkwʼũ kya Yesũ, ũla ũkethĩwa Wakelĩ Matukũ 26, Mwei wa 3, 2013, ĩkambĩĩa Ĩtukũ 1, Mwei wa 3. Ĩngĩ, Mwei wa 3 wĩ na mawathanthatũ na mawakyumwa atano. Kwoou nũtonya kũsũanĩĩa kũtũmĩa Mwei wa 3 kwa nzĩa ya mwanya?
3. Tũtonya ata kwĩka mĩvango ya kwongela ũtavanyʼa witũ?
3 Ĩyũmbanyʼe Yu: Yĩĩ nĩyo ĩvinda yaĩlĩte ya kũsisya mĩvango yaku wone ũndũ ũtonya kwĩka nĩ kana ũthũkũme ta vainia mũtetheesya. Kũvanga ta mũsyĩ nĩ ũndũ wa vata, kwoou neeneai ũndũ ũũ Ũthaithinĩ wenyu wa Mũsyĩ mwone ũndũ mũtonya kwĩka na mũiandĩka ũndũ mwavanga. (Nth. 15:22) Ethĩwa vaitonyeka kwaku kwĩthĩwa vainia mũtetheesya ndũkakwʼe ngoo. No wĩke mĩvango ũkatavanyʼa masaa maingangĩ mĩthenya ĩla ũendaa ũtavanyʼa? No wongele mũthenya ũngĩ mũvangonĩ waku wa kĩla kyumwa wa kũthi ũtavanyʼa?
4. Nĩ moathimo maũ tũkakwata twongela ũthũkũmi witũ nthĩnĩ wa Mwei wa 3, wa 4, na wa 5?
4 Twongela ũthũkũmi witũ nthĩnĩ wa Mwei wa 3, wa 4, na wa 5, ũtanu witũ ũkongeleka na tũkeethĩwa twĩ eanĩe mũno nũndũ wa kũmũthũkũma Yeova na kũtetheesya angĩ. (Yoa. 4:34; Meko 20:35) Kĩla kya vata mũnango nĩ kana kwĩyumya kwitũ kũkamũtanĩthya Yeova.—Nth. 27:11.