Atĩĩa Ngelekanyʼo ya Athani—Yona
1. Nĩ ndaĩa syĩkũ nzeo Yona waĩ nasyo?
1 Ũlilikanaa kyaũ ĩla wasũanĩa ĩũlũ wa mwathani Yona? Amwe nĩmatonya kũmwona ta mũndũ waĩ wʼĩa kana waĩ na ngoo mbetu. Kĩvathũkanyʼo na ũu, Yona aĩ na wĩnyivyo, ũkũmbaũ, na ngoo ya kwĩyumya. Tũtonya ata ‘kwosa syĩthĩwe ngelekanyʼo’ ndaĩa nzeo sya Yona?—Yak. 5:10.
2. Tũtonya kũatĩĩa ngelekanyʼo ya Yona ya wĩnyivyo ata?
2 Wĩnyivyo: Mbeenĩ, Yona nĩwasembie athi kũndũ kũla ũtatũmĩtwe. Ũsu ti ũndũ wa ũsengyʼo nũndũ Aasuli maĩ andũ angʼendu mũno, na nĩkyo kĩtumi Nineva yeetiwe “ndũa ya nthakame.” (Nau. 3:1-3) Yeova nĩwamũkanisye, na Yona etĩkĩla na wĩnyivyo kũthi vala wamũtũmĩte. (Nth. 24:32; Yona 3:1-3) O na kau ĩla watũmiwe ya mbee nĩwasembie athi kũndũ kũngĩ, ĩvinda yĩĩ nĩweetĩkĩlile kũtũmwa nĩ Yeova. (Mt. 21:28-31) Ĩla twakanwʼa, kana twĩ kĩsionĩ kyũmũ, no tũtwʼe kũtavanyʼa ũvoo mũseo ta Yona?
3. Nĩ ĩndĩĩ ũkũmbaũ na veva wa kwĩyumya syendekaa ũtavanyʼanĩ?
3 Ũkũmbaũ na Veva wa Kwĩyumya: Ĩla Yona wamanyie kana ũtwi wake mũthũku nũũlikya mũisyonĩ mathayũ ma ala waĩ namo ngalawanĩ, nĩweeyumisye ekwʼe ũkanganĩ nĩ kana andũ asu maikakwʼe. (Yona 1:3, 4, 12) Ĩla wavikie Nineva, nĩwatembeie ndũanĩ ĩsu. No ethĩwe eekie ũu aimantha vala ũkumĩsya ũsilĩlo wa Yeova. Kwĩka ũu kwoonanisye kana Yona aĩ na ũkũmbaũ ĩndĩ ti wʼĩa. (Yona 3:3, 4) Nata ithyĩ ũmũnthĩ? Nĩtwaĩlĩte kũvoya Yeova atũnenge ũkũmbaũ nĩ kana tũtavanyʼe o na ĩla andũ meũlea ũvoo witũ. (Meko 4:29, 31) Twaĩlĩte kwĩthĩwa na veva wa kwĩyumya nĩ kana twĩthĩwe tũtonya kũtũmĩa ĩvinda na malĩ sitũ kwondũ wa ũtavanyʼa.—Meko 20:24.
4. Nĩkĩ twaĩlĩte kũvindĩĩsya ngelekanyʼo sya athani ma Yeova?
4 Kĩla ĩvinda wasoma ĩũlũ wa mwathani mũna wa Yeova, ĩkũlye: ‘Keka ninyie nĩthĩwa neekie ata? Ndonya kũatĩĩa ndaĩa syake nzeo ata?’ (Aevl. 6:11, 12) Maũvoo ma ĩvinda yũkĩte nthĩnĩ wa Ũthũkũmi Witũ wa Ũsumbĩ makaneenea maũndũ ma vata ala tũtonya kwĩmanyĩsya kuma kwa athani angĩ ma Yeova.