Atĩĩa Ngelekanyʼo ya Athani—Yoeli
1. Tũtonya kwonanyʼa wĩnyivyo ta wa Yoeli ĩla tũũtavanyʼa ata?
1 Mwathani Yoeli aĩ ũũ? Kĩla ũwetete nĩ kana aĩ “mwana wa Vethueli.” (Yoe. 1:1) Nũndũ wa wĩnyivyo wake, Yoeli aneeneie wathani ũla wanengetwe nĩ Yeova, ĩndĩ ndaaenda kwĩkathĩĩa nũndũ wa kwĩthĩwa e mwathani. O ta ũu, ĩla twĩ ũtavanyʼa, vandũ va kwĩmanthĩa nguma kana ndaĩa, tũmũtaĩaa Yeova na Ndeto yake. (1 Ako. 9:16; 2 Ako. 3:5) Ĩngĩ, ũvoo ũla tũtavanasya nũtwĩkĩaa vinya. Nĩ maũndũ meva nthĩnĩ wa wathani wa Yoeli matonya kũtwĩkĩa vinya twĩthĩwe na kĩthito na wĩkwatyo ũmũnthĩ?
2. Kũthengeea kwa mũthenya wa Yeova kwaĩle kũtũsukuma twĩke ata?
2 “Mũthenya wa Yeova Nĩ Mũthengeeu.” (Yoe. 1:15): O na kau ndeto ii syaandĩkiwe myaka mingĩ mĩvĩtu, tũilyĩ ĩvinda yĩla iendeee kwĩanĩa. Kũthũkĩĩa kwa maũndũ ĩũlũ wa nthĩ, andũ kũlea kwendeewʼa nĩ ũvoo mũseo, na kũvũthwʼa ĩla tũũtavanyʼa, nĩ maũndũ mekwonanyʼa tũilyĩ mĩthenyanĩ ya mũminũkĩlyo wa walanyʼo ũũ mũthũku wa maũndũ. (2 Tim. 3:1-5; 2 Vet. 3:3, 4) Kũmanya kana mũminũkĩlyo wĩ vakuvĩ, kũtũnengae kĩtumi kĩseo kya kũvĩtya mbee wĩa wa kũtavanyʼa.—2 Vet. 3:11, 12.
3. Nĩkĩ kũtavanyʼa ne kwa vata, mũno mũno ĩvindanĩ yĩĩ ũla thĩna mũnene ũthengee?
3 “Yeova Akeethĩwa Wĩvitho wa Andũ Make.” (Yoe. 3:16): Kũthingitha kwa ĩtu na nthĩ kũla kũwetetwe mũsoanĩ ũũ kwonanasya ũsilĩlo wa Yeova ĩvinda ya ũla thĩna mũnene. Nĩtũkiakiawʼa kũmanya kana Yeova akavonokya athũkũmi make aĩkĩĩku ĩvindanĩ yĩu. (Ũvu. 7:9, 14) Kwona Yeova aitũtetheesya ĩla twakomana na mawetu wĩanĩ wa ũtavanyʼa, nĩkũtwĩkĩaa vinya. Ũu nũlũlũmĩĩlasya mũĩkĩĩo na wũmĩĩsyo witũ ũla ũkatũtetheesya ĩvindanĩ ya ũla thĩna mũnene ũkĩte.
4. Nĩkĩ tũtonya kwĩthĩwa na ũtanu na ũlũmu o ũndũ mũminũkĩlyo ũthengeee?
4 O na kau andũ amwe monaa wathani wa Yoeli wĩ wa kũkĩsya, wathani ũsu nũnengae andũ ma Ngai wĩkwatyo wa kũtangĩĩwa. (Yoe. 2:32) Ekai tweteele ĩvinda yĩla yũkĩte twĩ na mũĩkĩĩo mũlũmu na kĩthito nthĩnĩ wa kũtavanyʼa ũvoo mũseo, tũendee kwĩka ũndũ ĩandĩko ya Yoeli 2:23 yaĩtye: ‘Tanai na ĩwʼĩai Yeova Ngai wenyu mũyo.’