Atĩĩa Ngelekanyʼo ya Athani—Amosi
1. Nĩkĩ ngelekanyʼo ya mwathani Amosi ĩtonya kũtwĩkĩa vinya?
1 We waaĩwʼa ũtaĩlĩte kũtavanyʼa nũndũ wa kwĩthĩwa wĩ wa kĩlasi kya nthĩ, kana nũndũ wa kwĩthĩwa ũte na kĩsomo kingĩ? Ethĩwa waaĩwʼa ũu, ngelekanyʼo ya Amosi no ĩkwĩkĩe vinya. Amosi aĩ mũĩthi wa malondu na kwa mavinda nĩwathũkũmaa wĩa wa mũũndanĩ. O na vailyĩ ũu, Yeova nĩwamũnengie vinya wa kũtavanyʼa ũvoo wa vata. (Amo. 1:1; 7:14, 15) O ta ũu, ũmũnthĩ Yeova nũtũmĩaa andũ ma kĩlasi kya nthĩ. (1 Ako. 1:27-29) Nĩ maũndũ angĩ maũ makonetye ũtavanyʼa witũ tũtonya kwĩmanyĩsya kumana na ngelekanyʼo ya mwathani Amosi?
2. Nĩkĩ tũtonya kwĩkala twĩ alũmu ĩla twakomana na isiĩĩi ũtavanyʼanĩ?
2 Ĩkala wĩ Mũlũmu Ĩla Wakomana na Isiĩĩi: Ĩla mũthembi Amasia, ũla wathaithaa mĩvwʼanano ũsumbĩnĩ wa Isilaeli wa mbaĩ ĩkũmi weewie wathani wa Amosi, kwa ndeto ingĩ no ta wamwĩie ũũ e mũthilĩku: ‘Ĩnũka! Ekana naitũ! Twĩ na ndĩni yitũ!’ (Amo. 7:12, 13) Amasia nĩwaneenie ũvũngũ ĩũlũ wa Amosi nĩ kana Mũsumbĩ Yelovoamu amũsiĩĩe ndakaendeee kwathana. (Amo. 7:7-11) Ĩndĩ Amosi ndaakĩa. Ũmũnthĩ, atongoi ma ndĩni nĩmakũlasya silikalĩ imatwʼĩĩke kũthĩnyʼa andũ ma Yeova. Ĩndĩ, Yeova atũĩkĩĩthĩtye kana vaiĩ mũio wa kaũ ũkaseũvwʼa ũtũkite ũkaĩla.—Isa. 54:17.
3. Nĩ maũndũ maũ elĩ twaĩle kũtavanyʼa ĩũlũ wamo?
3 Tavanyʼa Ũsilĩlo wa Ngai na Moathimo Ala Mokĩte: O na kũtwʼĩka Amosi nĩwathanie ũsilĩlo kwelekela ũsumbĩ wa Isilaeli wa mbaĩ ĩkũmi, aiminĩa kũandĩka ĩvuku ya Mbivilia yĩla yĩ na ĩsyĩtwa yake, nĩwawetie kana Yeova akatũnga andũ make kuma ũkombonĩ na aimaathima. (Amo. 9:13-15) O ta Amosi, nĩtũtavanasya ĩũlũ wa “mũthenya wa ũsilĩlo” wa Yeova ũla ũkĩte, ĩndĩ ũũ no ũndũ ũmwe nthĩnĩ wa ‘ũvoo mũseo wa ũsumbĩ’ ũla twaĩle kũtavanyʼa. (2 Vet. 3:7; Mt. 24:14) Nthĩ ĩkambĩĩa kũtwʼĩkĩthwʼa nzaũ ĩtina wa ala athũku kwanangwa kaũnĩ wa Ali–Maketoni.—Sav. 37:34.
4. Twĩ na ũĩkĩĩthyo mwaũ wa kana no twĩanĩsye kwenda kwa Yeova?
4 Ũtwi witũ wa kwĩkala kwosana na kwĩyumya kwitũ na wa kwĩka kwenda kwa Yeova nitatawa nũndũ andũ aingĩ nĩmavĩngaa ũvoo wa Ũsumbĩ. (Yoa. 15:19) O na ũu wĩ o vo, twĩ na mũĩkĩĩo kana Yeova akaendeea kũtũtetheesya twĩanĩsye kwenda kwake, o tondũ watetheeisye Amosi.—2 Ako. 3:5.