Ũndũ Tũtonya Kũnyuva Ndeto sya Kwendeesya sya Kwambĩĩsya Ũneeni
1. Kũtũmĩa ndeto sya kwendeesya ĩla tũkwambĩĩsya ũneeni na andũ kũtethasya ata?
1 O tondũ mũndũ ũtonya kwĩthĩwa na mea ma kũya ĩtina wa kũnywʼa kaĩndũ, kũnyuva ndeto syĩ kwendeesya sya kwambĩĩsya ũneeni nĩkũtonya kũtuma mwene nyũmba atwĩthukĩĩsya. O na kau ndeto sya kwambĩĩsya ũneeni nitonya kwĩthĩwa itailyĩ ũndũ ũmwe saa syonthe, o ta lĩu wĩ mũyo, twaĩle kwĩyũmbanyʼa tene nĩ kana syĩthĩwe syĩ sya kwendeesya. (Nth. 15:28) Twaĩle kwĩka ata nĩ kana twĩthĩwe na ndeto sya kwendeesya sya kwambĩĩsya ũneeni?
2. Tũtonya kũnyuva ata ndeto sya kwambĩĩsya ũneeni ila itonya kwendeesya mwene nyũmba?
2 Neenea Maũndũ Ala Mekwendeesya Mwene Nyũmba: Ndeto sitũ sya kwambĩĩsya ũneeni syaĩlĩte kwendeesya mwene nyũmba ethĩwa nĩtũkwenda atwĩthukĩĩsye. Kwoou, ĩla ũkwĩyũmbanyʼa, sũanĩa maũndũ ala mendeeasya andũ ma kĩsio kyenyu. Nĩmethĩwa mendeeawʼa nĩ silikalĩ nzeo, kwĩthĩwa na mũsyĩ mũtanu, kana kwĩkala vandũ vate na kaũ? Nĩkwĩthĩwa andũ nĩmendete kumya woni woo, sũanĩa ĩkũlyo yĩla ũtonya kũkũlya nĩ kana meyĩelesye. No ũtũmĩe ilungu sya ũndũ tũtonya kwasya ila syĩ nthĩnĩ wa Ũthũkũmi Witũ wa Ũsumbĩ kũnyuva nzĩa ĩmwe ya kwambĩĩsya ũneeni na ũimĩtũmĩa kwosana na kĩsio kyenyu? Mavinda kwa mavinda ĩla mwĩ na Ũthaithi wa Mũsyĩ, no mũsũanĩe nzĩa imwe mũtonya kũtũmĩa kwambĩĩsya ũneeni?
3. Twaĩle kwĩka ata nĩ kana twambĩĩsye ũneeni kwosana na syĩthĩo na mĩĩkĩĩo ya andũ?
3 Sũanĩa Syĩthĩo sya Andũ na Mĩĩkĩĩo Yoo: Kũndũ kũmwe, andũ mendaa mũeni avika kwoo awete kĩtumi kya kũmathokea vu kwa vu. Kũndũ kũngĩ, andũ monaa ne ndaĩa mũeni avika kwoo kwamba kũmakethya na kũmanyana namo. Nasyo isionĩ ingĩ nĩtwĩthĩaa andũ mũĩkĩĩo woo ũtamavatĩte kũsoma Mbivilia. Nũndũ wa ũu, wĩthĩawa tũtonya kũweta kana twĩneeneaa maũndũ maumĩte Mbivilianĩ ĩla tũkwambĩĩa kũneena namo. (Meko 2:14-17) Ĩndĩ ĩla twamathokea ya mbee andũ mate ma ndĩni sya Kĩklĩsto, kana mate ma ndĩni, nĩ ũseo tũkalea kũweta kana twĩneenea Mbivilia. No tũwete ĩũlũ wa Mbivilia twamasyokea.—Meko 17:22-31.
4. Nĩ maũndũ maũ twaĩle kũsũanĩa ĩla tũũnyuva ndeto sya kwambĩĩsya ũneeni?
4 Ndeto sya Kwambĩĩsya Ũneeni: Nyuva nesa ndeto sya kwambĩĩsya ũneeni. Nĩ ũseo ũkatũmĩa ndeto nini na syĩ laisi kũeleeka. Nĩ ũndũ wa vata kũsũanĩa ũndũ tũkũineena. Neena wĩ mũtanu na ũyonanyʼa kwendeewʼa kuma ngoonĩ nĩ mwene nyũmba. Kũatĩĩa maũndũ asu twaweta kũkatũtetheesya kũnyuva ndeto sya kwendeesya sya kwambĩĩsya ũneeni, ila ĩtonya kũtuma andũ mendeewʼa nĩ kũya “mesanĩ ya Mwĩaĩi.”—1 Ako. 10:21.